Numeri 12
12
Miliyama tava mu futisa
1Mosesa kwa kwere mukadi goMuetiopiya, makura Miliyama naArona tava mu pe usima. 2Awo tava tanta asi: “Nani Hompa mwaMosesa mwelike a uyungire? Omu mwetu nani namo kapi a uyungire mo?” Hompa kwa zuvhire eyi va uyungire. (3Mosesa kwa kere mugara gomulinunupiki kupitakana navenye vepevhu.)
4Va liharuka ko, Hompa ta tantere oMosesa naArona naMiliyama asi: “Ame kuna hara moutatu weni mu pwage mu ze koNkongoronzugo zoMagwanekerero.” Awo tava katuka, va ze ko. 5Hompa makura ta hegumuka meremo lyokufana emungundi, ta sikama pevero lyoNkongoronzugo, ta va zigida asi: “Arona, Miliyama!” Mouvali wawo tava hedere komeho, 6makura Hompa ta tanta asi: “Zuvheni eyi nina kutanta! Nsene vaporofete vana kara mokatji keni, ame kuvamonekera nyamwange momamoneko, tani uyunga nawo mononzodi. 7Ano nsene nomuntu gwange Mosesa nina kuuyunga, malisigo aga kara po. Ame kwa mu tura mo moupangi wombunga zange Israeli. 8Ame kuuyunga nendi ose kuna kulitara, tani mu dukwire, kapisi moyisewe, nosinhwi sange seesi ga si mona! Omu nomu vhura nye kupatanesa muntu gwange Mosesa ngapi nye?”
9 Hompa kwa va handukilire pokutunda po a ze. 10Ano tupu lya lipora po eremo poNkongoronzugo, Miliyama nare yina mu vavere yingondwe, gwa vau ngwendi enoto. Arona ta mu tarurura, ta mu mono asi noyingondwe ana kara. 11Makura ta tantere Mosesa asi: “Hekurwange, wa ha tu tarerera tu simbe mafutiro morwanzo zetu zosiugova. 12Wa ha mu sigilira a fane ngwendi situntumika esi va hampuruka, aro ruha rumwe nare rwa wora.”
13Mosesa makura ta kugu kwaHompa asi: “Ani Karunga, yingasi mu verura!”
14 Hompa ta limburura asi: “Gazara asi nsene oguhwe va mu fizira mosipara, ngano kapi a fe nomuga mazuva gatano‐nagavali. Ano siga va mu pwagese mo mokamba a ka likerere sivike simwe. Ngasi pwa, ntani ngava mu tengwidira mo.” 15Miliyama kwa mu pwagesere mokamba, ta ka likerera mazuva gatano‐nagavali, mbunga kapi za rundurukire po dogoro noku va mu tengwidilire mo. 16Awo tava tundu po nye poHaseroto, tava ka tura kamba zawo momburundu zaParani.
© Egwanekerobibeli Lyanamibia 1987, 2003
© Bible Society of Namibia 1987, 2003