Numeri 11
11
Evega lyedina Tabera
1Mbunga tazi tameke kutangwinina Hompa morwamahudi gazo. Hompa, apa ga yi zuvhire, ta handuka, makura ta tumine mbunga mundiro. Tagu twera mokatji kawo, tagu veveke po ruha rumwe rokamba. 2Mbunga makura tazi kugu unene kwaMosesa, a zi kwafe. Gwina ta kanderere kwaHompa, makura mundiro tagu dimi. 3Evega olyo makura tava li ruku Tabera, morwa mundiro gwaHompa kwa twerere mokatji kawo.
Mosesa ta horowora vagendesi nomurongo ntano nambali
4Mbunga zovanayirongo ezi za gendere kumwe noVaisraeli kwa dowokerere unene nyama, noVaisraeli si vene nawo tava tameke kutanguna asi: “Kupi oku a tundu ogu a ku pa ko kanyama! 5MoEgipite ngatu lyaalya tupu nomfi mawoko‐woko. Ndi o gazare nye rwene rupotera nakatjama nehidi ndi dene nonyanga nonohaki nye! 6Nonkondo detu ntaantani dina tu pu. — Kutupu nampili nakauke yokulya, lya sa lya sililira, zoozo mana zelike!”
7(Mana kwa lifene nonombutogona dononzera dosiuhenga. 8Vantu ngava gendagura va zi toragure, ngava zi goga ndi tava zi tu usura, ngava zi tereke ndi tava zi kanga yikuhuna. Utovara wazo ngwendi mboroto zokuduvisa komagadi gononzwe. 9Eme ngali gwire mokamba kumwe nomana masiku.)
10Mosesa nga zuvhu kutanguna kombunga nazinye, awo kuna sikama nombunga nombunga pomavero gonotenta dawo. Hompa kwa va handukilire unene. Mosesa tayi mu guvike, 11ta tantere Hompa asi: “Yinke ono kuruganena nge momudona ngesi? Yinke yokunyengerera nge? Yinke yokupera nge upangi wovantu navenye ava? 12Kapisi nyame na va unga ndi asi nyame na va vhara. Yinke nye yokupakera nge ngwendi mutakamesi ni va simba‐simbe momawoko gange ngwendi vakeke monzira nazinye dogoro kosirongo esi wa tumbwidira ozinyakurwawo? 13Oku nkare ni zi gwane zene nyama zokupa emumbunga nalinye lya hura apa kosi? Awo kuna kuliranena nge asi, tu pa nyama tu lye ose, ove. 14Ame name nyamelike nokuvhura si kukara moupangi wemumbunga nalinye eli, nokuyitompora si. 15Nsene yimo ngorooro no rugana nge, fira nge tupu nkenda o dipage nge, ntani nani dira hena kukara noruhepo rokuhura apa.”
16 Hompa kwa tanterere Mosesa asi: “Pongeka vagara nomurongo ntano‐nambali womakuto, ava va kara masimbi gombunga, va retera nge koNkongoronzugo zoMagwanekerero, va tantera va sikame nzega noge. 17Nani hegumuka ni uyunge noge, ano mpepo ezi na ku pa, nawo yiko nani ya va pa. Makura ngava ku kwafe moupangi wovantu ava, asi udigu wa ha ku kerera hena nyovelike. 18Ano tantera nye mbunga: ‘Likuhwireni ezuva lyomungura, yeeyi nyama zokulya ngomu zi gwana nye. Hompa ga zuvha kulirana kweni noyiuyunga yeni asi muna hepa nyama, neyi asi apa mwa kere moEgipite hasa. Hompa nga mu pa nyama, ano one ngomu zi lye. 19One ngomu zi lya, nye kapisi asi zezuva limwe ndi gavali ndi gatano ndi murongo ndi nomurongo mbali, 20nye zokwedi nakunye, dogoro ngazi ya mu pwagere momatwi, dogoro tomu verere mo. Eyi ngayi mu horokera morwa mwa nyoka Hompa ogu ana kara mokatji keni, nye one yiyo muna kumutangwinina, asi ngano kapi mwa tunda moEgipite nampili kanunu.’ ”
21Mosesa kwa tanterere Hompa asi: “Ame kuna kara mugendesi govantu 600 000, ngapi omu no uyunga asi ngani va pa nyama zina gwana po zokwedi kumwe? 22Oku ngadi tunda nongombe nononzwi dokudipaga asi va gwaneke kosi? Nampili nomfi nadinye demefuta kuna di kombo mo, tava di gwaneke nye ndi?”
23 Hompa ta mu limburura asi: “Eh, nani unankondo wange uhura wa paka? Ove ntaantani nye o yi limonene, nsene eyi na tanta yosili ndi kapisi yimo.”
24Mosesa makura ta pwaga a ze kovantu a ka va tantere eyi ga uyungire Hompa. Age makura ta pongaike vagendesi nomurongo ntano‐nambali, ta va sikameke, va kundurukide Nkongoronzugo zoMagwanekerero. 25Hompa makura ta hegumuka meremo, ta uyunga nendi. Vagendesi nomurongo ntano‐nambali ta va pe nawo kompepo ngezi ga pa Mosesa. Apa za va wizire mpepo, tava zigire kuporofeta, nye kapi ya zire ntando.
26Vavali womovagendesi nomurongo ntano‐nambali oElidadi naMedadi, awo kwa kere mokamba, kapi va zire koNkongoronzugo. Moomo mokamba yimo za va wizilire mpepo, makura tava zigire kuporofeta. 27Ta duka nye mumati gumwe a ze a ka tantere Mosesa eyi vana kurugana oElidadi naMedadi.
28Ano Josuwa zaNunu ogu ga gusa nare kukwafa Mosesa kutunda koumati wendi, ta ziguruka kutantera Mosesa asi: “Tate, va kaveni.” 29Mosesa ta limburura asi: “Ono hara o liture mweyi yange? Ngano Hompa ta gava mpepo zendi kombunga zendi nazinye, asi navenye va uyunge ngwendi vaporofete, ngano nawa.” 30Makura Mosesa nomasimbi nomurongo ntano‐nambali goVaisraeli tava tengura kokamba.
Hompa ta tumu matongorokofu
31Ngapa katu popi Hompa ta tumu mpepo ezi za gusire matongorokofu kefuta, ago taga tuka meta zimwe ngoso kutunda pevhu. Ta ga ya mamene ga kundurukide kamba ga ze oko ngoso nokilometa nonokilometa komaruha nagenye. 32Vantu makura tava rugana mutenya mudima nomasiku mudima nezuva nalinye lyokukwama ko, tava kwata nye matongorokofu va ga pongaike maswaya nomaswaya. Kwa ga tawire va ga zaneke ga kundurukide kamba nazinye. 33Nyama azo simpe nokupwa si azo simpe haza vhukira, Hompa ta handukire vantu, ta tumu uvera womukagu mokatji kawo. 34Evega olyo kwa li rukire Nontoko doMasivano, yeeyi yipo va vhumbikire vantu ava va sivanenene nyama.
35Kutunda opo mbunga tazi katuka zi ze koHaseroto, oku va ka tulire kamba zawo.
© Egwanekerobibeli Lyanamibia 1987, 2003
© Bible Society of Namibia 1987, 2003