Marukusa 6

Jesus tava mu paya moNasareta

1Jesus makura ta tundu ko, ta zi kositata sekulira lyendi, varongwa vendi tava mu kwama. 2MEsabata ta tameke kuronga mosinagoge. Sinzi sava va mu zuvhire, va tetukire, tava tanta asi: “Oku ga gwana eyi yininke hena kupi? Ukonentu mukwasinke va mu pa mwene ogu? Hena nomu a rugana‐rugana yitetu eyi ngapi? 3Nani mwene ogu kapisi yige muhongi goyikungu, munwaMariya, age hena mukurwaJakopo naJosesi naJuda naSimoni? Nani kapisi vampanza vendi vaava twa kara nawo?” Makura tava mu nyenge. 4Makura Jesus ta va tantere asi: “Muporofete kapi ava mu paya, ntudi mositata soundambo nemekoro nemembo lyawo.” 5Opo kapi ga vhulire hena kuruganena po sitetu nampili simwe, ntudi yooyo yokukambeka vaveli vamwe mawoko va veruke. 6Makura age kwa tetukire uhapuli wawo.

Etumo lyovarongwa murongo navavali

Kutunda opo Jesus ta gendagura monomukunda dopopepi, a ronge. 7Age kwa zigidire ava murongo navavali, ta va tumu vavali‐navavali, makura ta va pe nonkondo dokupangera nompepo donondona. 8Makura ta va pangere asi va ha pitura yuma va gende nayo monzira, ntudi mpango azi huru, nonondya si, nondyato si noyimaliva si melimba, 9ntudi yicamakaku konompadi, hena ta va tantere asi: “Mwa ha dwara yikoverero yivali.” 10Ta va tantere hena asi: “Nkenye eli embo ngomu za, kareni moomo dogoro noku ngomu tunda mo. 11Nsene ngava dira kumutambura ndi va nyoke kumupurakena, pitakaneni oku tomu kukumuna mbundu konompadi deni, yi kare umbangi wawo. (Yosili nina kumutantera asi, udigu wositata oso ngau pitakana waSodoma naGomora mEzuva lyoMpanguro.)”

12Kutunda opo awo tava zi va ka udise asi vantu va litezurure, 13oku tava tjida mo nompepo donondona dononzi pokugwaveka vaveli nomagadi oku tava va verura.

Nomfa daJohanesa Mukuhwi

14Hompa Herodesa nage ga mu zuvhire, yeeyi edina lyaJesus kwa fumanene. Vamwe tava tanta asi: “Johanesa Mukuhwi ana pinduka koufe, yiyo nye dina kuruganena nonkondo edi mwendi.” 15Ano vamwe tava tanta asi: “Eliya.” Nye vamwe hena asi: “Muporofete ngwendi vaporofete vanare.”

16Apa ga yi zuvhire Herodesa, ta tanta asi: “Johanesa ogu na teta mutwe, yige googo ga pinduka koufe.” 17Morwa Herodesa kwa tuminine Johanesa, va ka mu kwate va mu pandeke, a ya ze modorongo mokonda zaHerodiyasa, mukadamumbyendi Filipusa, ogu ga kwere. 18Yeeyi Johanesa kwa tanterere Herodesa asi: “Nokuwapa si asi o guse mukadamumbyoge.” 19Ano Herodiyasa, yipo nye nga mu lisa nomeho, age ana hara asi va mu dipage, nye nomu si, 20yeeyi Herodesa kwa tjilire Johanesa, morwa ga mu divire nawa asi muhungami, age mupongoki, makura ta mu kungu. Nkenye apa nga mu zuvhu, tayi mu pe sitangalimba, nye age kwa here kumupurakena.

21Ano ezuva limwe, Herodiyasa lya mu wapere, pedano lyosipito sehampuruko lyaHerodesa, makura ta zigida masimbi gendi gomanene novapitisili woyita novanamadina womoGalireya, va ya lye sipito. 22Eyi pwa wiza munwagoogo Herodiyasa gomukadona a dane, Herodesa nava va kere kositafura tayi va hafesa. Makura hompa ta tantere mukadona ogo asi: “Hundira nge tupu nkenye eyi ono hara, ni yi ku pe.” 23Makura ta mu ganene asi: “Hundira nge tupu nkenye eyi, nani yi ku pa, nampili ruha rumwe rountungi wange.” 24Makura mukadona ta pwaga, ta ka pura ozina asi: “Yinke nani ka hundira?” Nye ozina tava mu limburura asi: “Mutwe gwaJohanesa Mukuhwi.” 25Age ta genderere usimbu kuza kwahompa, ta mu tantere asi: “Na hara mu pe nge ntaantani mutwe gwaJohanesa Mukuhwi porupasa.” 26Makura hompa ta guwu unene, nye morwamugano mvhongwa novantu ava va kere kositafura, tayi mu vhuru kumupatanena. 27Makura hompa ta tumu usimbu mudipagi gwendi nepamperekedo lyokukareta mutwe gwaJohanesa. Gwina ta zi kodorongo, ta ka teta Johanesa mutwe, 28ta gu simbire porupasa, makura ta gu gava komukadona. Mukadona nage ta ka gu gava kozina. 29Varongwa vendi apa va yi zuvhire, tava wiza va ya guse simpu sendi, va ka si horeke montoko.

Jesus ta kutike mayovi gatano

30Vapostoli kwa ya pongere kwaJesus, tava ya mu tantere nayinye eyi va ka rugene neyi va ka rongere. 31Makura ta va tantere asi: “Wizeni nyonelike kevega lyomaporeza, mu ka pwizumuke kanunu.” Yeeyi vantu vanzi ngava wiza po oku tava tundu po, noruveze si rooru va gwene rokulya.

32Makura awo tava zi mowato kevega lyomaporeza. 33Vantu wovanzi va va mwene awo tava ka za, awo hena va divire oku vana vyuka. Makura awo kwa gendere pevhu kutunda koyitata nayinye, va ya hove kuyaponga po. 34Jesus apa ga zaukire, ta mono mbunga zonene, makura nkenda tazi mu gwire, morwa awo kwa kere ngwendi nonzwi da hana musita. Makura ta tameke kuvaronga yoyinzi. 35Eyi lya gomboka, tava mu wizire varongwa vendi, tava tanta asi: “Evega eli mapuku, ezuva hena lina toko. 36Va ninka, va ze, va vhure kukalirandera nondya mwaza nomukunda nomambo.” 37Nye age ta va limburura asi: “Va peni ko one yokulya.” Vena tava mu tantere asi: “Tu ze nye tu ka va randere mboroto zonoranda nomurongo ne, tu ya va pe va lye ndi?” 38Nye age ta va pura asi: “Nomboroto dingapi muna kara nado? Komu ka di tara si.” Tava ka di tara, tava tanta asi: “Ntano, nonomfi mbali.”

39Makura Jesus ta tantere varongwa vendi, va hingidike vantu tumbunga‐tumbunga powayi wafoko?-?foko. 40Makura vantu tava hingire motumbunga, tomafere‐mafere nonomurongo‐ntano‐ntano. 41Age ta gusa nomboroto odo ntano nonomfi odo mbali, ta ligamene keguru, ta pandura Guhwe, ta tetagura nomboroto, ta di pe varongwa vendi va di gavere vantu, nonomfi mbali nado ta di va gavere. 42Makura navenye tava li, tava kuta. 43Ruhupwa ronomboroto oru rwa hupire ko tava ru pongaike, yikumba murongo nayivali tayi zura, nokonomfi nako kwa hupire. 44Ava va lire nomboroto odo, kwa kere vagara mayovi gatano.

Jesus ta gendi pomema

45Kutunda opo Jesus ta kanderekeda varongwa, va perame mowato va rute mesinya koBetesaida, siruwo esi ana kutuma mbunga, zi tengauke kwawo. 46Eyi ga mana kuvarekera va ze, ta rondo kondundu a ka kanderere. 47Kongurova wato pouli pokatji kehanza lyekurudiva, age gelike konze zediva. 48Nye apa ga mwene asi tava mono udigu mokuduga morwamalikandano nompepo, momasasiku, ta va wizire age ta gendi kontunda zomema. Age kwa here asi a va pitakane. 49Apa va mu mwene ta gendi pekurudiva, kwa gazarere asi sinkisauka, makura tava litakumine unene. 50Yeeyi navenye va mu mwene, makura tagu va pwaga. Nye age ta uyunga nawo, ta va tantere asi: “Gu mu dame tupu, nyame, mwa ha tjira.” 51Makura ta perama nawo mowato, mpepo tazi litura. Vena kwa tetukire unene, neisi va tanta va diva. 52Yeeyi kapi va kwete egano lyositetu sonomboroto morwaukukutu wonomutjima dawo.

Jesus ta verura vaveli womoGenesareta

53Awo makura tava rutu mesinya, tava wiza moGenesareta, yimo va ya hegekere. 54Kwa zauka tupu mowato, vantu nare vana mu dimburura. 55Awo makura tava tjirana mwaza mukunda, va mu retere vaveli awo poyintali, nkenye oku va mu zuvhire asi yiko ana kara. 56Nkenye oku ga zire, monomukunda nomoyitata ndi momambo, ngava tura vaveli pomarandesero, oku tava mu hundire asi a va sige, va gume nampili komukunkuro gosikoverero sendi. Makura navenye ava va mu gumine, tava veruka.

Currently Selected:

Marukusa 6: KWN

Highlight

Compare

Copy