Marukusa 5

Jesus ta verura munampepo zondona gomoGerasa

1Makura tava ka kavera mesinya mwina lyekurudiva mosirongo soVagerasa. 2Tupu ga tunda Jesus mowato, ta mu simbagwire mugara ogu ga tundililire monontoko domomamanya. Age kwa kere nompepo zondona. 3Age kwa tungire monontoko, nagumwe si nga vhuru kumumanga nampili nomauketanga. 4Rorunzi ngava mu pandeke komaguru nokomawoko, nye yipandeko yokomawoko ta yi ndembagura, ano yokomaguru ta yi myanga, nagumwesi ga mu fundire. 5Nkenye apa masiku nomutenya nga tendaganene monondundu nomonontoko oku ta ligeragura mwene nomamanya.

6Kwa mona tupu Jesus kookwina, nare ana vhunduruka, a mu dukire. Ta ya mu gwire komeho zendi 7oku ta takuma nezwi lyenene asi: “Name nove hena pwasinke, Jesus, MunwaKarunga gekeguru‐guru? Ame tani ku ganangeda kwaKarunga, wa ha hepeka nge.” 8(Age kwa yi uyungire, morwa Jesus kwa zi tanterere asi: “Ove mpepo zondona, pwaga mo momugara ogu o ze.”) 9Makura ta zi pura asi: “Nyovelye?” Azo tazi mu limburura asi: “Nyame mbunga, morwa ose tu vanzi.” 10Makura tazi mu lihenge unene asi ga ha di tjida mo mosirongo.

11Porwanondundu pwa kere utanga woyinguru una kulya po. 12Makura nompepo tadi mu lihenge asi: “Tu siga tu hwilire moyinguru.” 13Makura ta di pulisire. Ado tadi pwaga mo, tadi hwilire moyinguru. Makura utanga wokusika pomayovi gavali ngoso, tau rundumukire mekurudiva, tau fu mema.

14Makura vasita vayo tava tjwayukire kositata nokonomukunda va ka dimbwire vantu, makura vantu tava pu ko, va ka tare eyi yina horoka. 15Eyi va wiza pwaJesus, va tare, ogu ga kere nombunga zonompepo donondona gogu ana hingire, ana dwara, nonondunge dendi. Makura tagu va pwaga. 16Ava va yi mwene, tava va sansekere omu ya gendere yomunampepo zondona neyi yoyinguru. 17Makura tava mu kanderere asi a tunde mo mosirongo sawo.

18Nye Jesus apa ga peramene mowato, mugara ogu ga kere nonompepo donondona, ta mu likwambere a kare ngano pwendi. 19Nye age kapi ga yi mu tere eho, ta mu tantere asi: “Zende kembo kovakweni, o ka va tantere sikururugana esi ana ku ruganene Hompa, nomu ana ku fire nkenda.” 20Kutunda opo age ta zi, a ka sansaike mosirongo soYitata Murongo nayinye eyi ga mu ruganena Jesus. Makura navenye tava tetuka.

MunwaJairusa nomukadi goruhonde

21Eyi ga ka hegekere hena Jesus wato mesinya mwina, nkurumbunga tazi ya mu pongere, age konontere dekurudiva.

22Makura tapa wiza mwenyasinagoge gedina Jairusa. Kwa mu mona tupu, makura ta mu gwire konompadi dendi 23oku ta mu kanderere unene asi: “Munwange gomukadi pomutjima vana tara. Wiza o ka mu kambeke kuwoko, makura ta veruka age a paruke.” 24Makura Jesus ta zi nendi, ano mbunga zonene tazi mu kwama, tazi mu umbilikida.

25Pwa kere mukadi goruhonde ga ru verere nomvhura murongo nambali. 26Nga hepa unene kononganga oku lya pwililire emona lyendi, nye ngwendi ehamba kuna kulisangumuna. 27Age kwa zuvhire yaJesus, makura ta pene eyanga, ta kwata sikoverero sendi konyima, 28morwa age kwa gazarere asi: “Sinene tupu ni guma nampili kosikoverero sendi, nyame kuveruka.” 29Naruvali si ntundiliro zohonde zendi nare zina siti, makura ta lizuvhu asi ana veruka. 30Makura Jesus eyi ga lizuvhire asi nonkondo mwendi dina tundu, ta piruka ta pura mbunga asi: “Ogu ana gumu nge koyikoverero, yilye?” 31Varongwa vendi tava mu limburura asi: “Amesi ono mono mbunga omu zina ku umbu, nye simpe tupu hena o pura asi, ‘Yilye ogu ana gumu nge koyikoverero?’ ” 32Makura ta vanza?-?vanza a mone ogu ana yi rugana. 33Ano mukadi ogu kwa kere nehuhwe noutjirwe mokulidiva eyi ya mu horokerere asi yisinke.

Ta wiza ta ya mu gwire mevha oku ta mu tantere nawa‐nawa nayinye. 34Nye age ta mu tantere asi: “Munwange, epuro lyoge lina ku parura, zende mombili, ove hena o veruke koudigu woge.”

35Jesus age simpe kuna kuuyunga, vantu tava tundu kembo lyamwenyasinagoge, tava tanta asi: “Munoge ana dogoroka. Yinke hena ono kurorwera Murongi?” 36Nye Jesus nombili si konkango ezi vana kuuyunga, makura ta tantere mwenyasinagoge asi: “Gwa ha ku pwaga, pura tupu.” 37Kutunda opo nagumwe si ga ninkire a ze nendi, ntundi oPeturusa naJakopo naJohanesa, mumbyaJakopo velike. 38Eyi ga wiza ngoso membo lyamwenyasinagoge, a tare yizo sa ndjorongani, vantu kuna kukwenauka, tava lili. 39Kwa hwilira mo tupu, ta va tantere asi: “Eyi muna kuzogomokera oku tomu lili yinke? Munona kapi ana dogoroka, kuna rara tupu.” 40Awo nye tava mu zoro sirungu. Nye age ta va tjida mo navenye va pwage. Ta gusa guhyamunona nazina nava ga wizire nawo, makura ta hwilire omu ga kere munona. 41Age makura ta gusa kuwoko komunona oku ta mu tantere asi: “Talita kumi,” kuninka asi: “Mukadona, ame tani ku tantere asi, pinduka!” 42Naruvali si mukadona nare ana pinduka, kuna kugendagura, yeeyi age gonomvhura murongo nambali ga kere. 43Nye awo tayi va pe sikumwamurungu. Age ta va pamperekeda yi dire kudivikwa komuntu. Hena ta va tantere, va mu pe nondya a lye.

Currently Selected:

Marukusa 5: KWN

Highlight

Compare

Copy