Marukusa 7

Nompo dava vanare

1Vafalisayi novalirongi vamwe womatjangwa ava va tundire koJerusarema, kwa ya lipongaikilire Jesus. 2Awo kwa mwene varongwa vendi vamwe tava li mboroto nomawoko gokudira kuwapa, kuninka asi gokudira kukuhuka kompo zawo.

3Yeeyi Vafalisayi noVajuda navenye kapi ava li va hana kulikuhwa nawa‐nawa komawoko gawo, mokukwama mpo zava vanare. 4Nsene tava tundu komarandesero, nokulya si va hana kulikuhwa. Yinzi hena yikwawo eyi ava koneke mokukwama nompo, ngwendi ekuhwo lyononkinda notuvaza noyipako yongoporo nomauro.

5Yipo nye va mu pulire Vafalisayi novalirongi womatjangwa epuro eli asi: “Varongwa woge morwasinke ava dilire kuliza nonompo dava vanare, ava lye nondya, awo va hana kukuhwa mawoko gawo?” 6Gwina ta va tantere asi: “Jesaya nani ga hungika yombinga zeni, vambudi one, apa ga pumbire moomu va tjanga asi:

‘Mbunga ezi kufumadekesa nge konomurungu,

nye nomutjima dawo ure name da kara.

7Mawoko‐woko ava fumadeke nge,

erongo lyawo, nompangera dosintu.’

8“One kusiga Veta zaKarunga, tomu kakatere konompo dovantu.”

9Makura ta va tantere asi: “Mwa yi diva nawa‐nawa yokutulira Veta zaKarunga rumpenga, mu kwame nompo deni! 10Ngwendi moomu ga tente Mosesa asi, ‘Fumadeka oguhwo nonyoko,’ hena asi, ‘Ogu a tuku guhwe ndi zina, a fe.’ 11Nye one kutanta asi, muntu nsene ana tantere oguhwe ndi ozina asi, ‘Eyi nkare ni mu kwafere, yiyo “korobani”, kuninka asi nzambo,’ 12makura tomu mu sigi a dire kukwafa hena guhwe ndi zina. 13Yimo nye ngoso omu pepura nkango zaKarunga morwanompo deni edi omu rongo. Poyili hena yimwe yoyinzi yangesi eyi omu rugana.”

Eyi ayi nyateke muntu

14Jesus ta zigida hena mbunga, ta zi tantere asi: “Purakeneni nge namuvenye oku tomu zuvhu nawa. 15Kutupu seyi asi tundu ponze si hwilire momuntu asi si mu nyateke. Ano nye yininke eyi ayi pwaga mo momuntu, iyo ayi mu nyateke. 16Ogu ga kara nomatwi gokuzuvha, a zuvhe!”

17Eyi ga tunda pombunga a ze kembo, varongwa vendi tava mu pura yombinga zosifanekeso oso. 18Jesus ta va tantere asi: “Nani none nondunge kutupu? Kapi mwa diva asi nayinye eyi ayi tundu ponze yi hwilire momuntu, nokuvhura si kumunyateka? 19Yeeyi kapi ayi zi momutjima gwendi, nani mezimo moomu, yi pwage mo.” Pokuuyunga ngesi Jesus kwa fatwilire asi nondya nadinye kwa kuhuka. 20Makura ta tanta asi: “Ano nye eyi ayi pwaga momuntu, kunyateka muntu. 21Yeeyi monda monomutjima dovantu kupwaga mo magazaro gomadona noruhonda, nowidi nedipago 22netezo lyononkwara nomakumwinina noufeke nepiyagano nomfudu neswau noyirundo nougova. 23Maudona nagenye aga, monda aga tundu, makura taga nyateke muntu.”

Epuro lyomukadi gomupagani

24Kutunda opo Jesus ta katuka a ze koyiha yoyirongo oTirusi naSidoni. Makura ta hwilire membo, ga hana kuhara asi muntu a yi dive. Nye ya mu vhulire kulihoreka. 25Mukadi gumwe, ogu ga kere namunwendi gompepo zondona, naruvali si ta mu zuvhu, makura ta wiza, ta mu gwire konompadi dendi. 26Mukadi kwa kere Mugereka, Musiliya‐Fonisiya kutunda komvharerwa zendi. Makura ta mu likwambere a tjide mo mpepo zondona mwamunwendi gomukadi. 27Nye Jesus ta mu tantere asi: “Pomuhowo kusiga tanko vana va kute, kapisi uhunga kuhokora vana nondya va di pe nombwagona.” 28Nye mukadi ta mu limburura asi: “Nhi, Hompa, tumbwagona nato yangoso kulya ruvhugunyu oru aru kukumuka konondya dovanona.” 29Nye Jesus ta mu tantere asi: “Morwankango ezi, zende tupu, mpepo zondona zina tundu mo mwamunoge.” 30Makura ta zi kembo, ta ka gwana munwendi age ana rara pouro, ano mpepo zondona zina mu tundu.

Jesus ta verura sipuru‐puru

31Makura Jesus ta tundu mosirongo saTirusi a pite zaSidoni. Ta siki kekurudiva lyaGalireya, pokatji kosirongo soYitata Murongo. 32Tava mu retere muntu gosipuru?-?puru, ogu a uyunga kukokomena, va mu hundire a mu kambeke mawoko. 33Makura Jesus ta mu gusa po, ta mu twara pompengi a ligore kombunga. Ta mu zweke nonyara momatwi, ta fiza, ta gumu eraka lyendi. 34Makura ta ligamene keguru, ta likumida, ta mu tantere asi: “Effata”, kuninka asi ‘Situka’. 35Makura naruvali si matwi gendi taga situka neraka lyendi tali manguruka, ta hungike kuuyunga. 36Jesus ta va silike asi va ha ka yi tantere vantu. Ano moomu ga damekere kuvasilika, yimo moomo va damekere kuyisanseka. 37Awo kwa tetukire unene, tava tanta asi: “Nayinye age kuyirugana nawa, wokudira kuzuvha kuna kuzuvha, ano wokudira kuuyunga kuna kuuyunga.”

Currently Selected:

Marukusa 7: KWN

Highlight

Compare

Copy