Marukusa 16

Evhumbuko lyaJesus

1Lya pwa Esabata, Mariya Mangadarena naMariya, zinyaJakopo, naSarome, tava randa sidumba asi va ka gwaveke simpu saJesus. 2Ngurangura zonene zezuva lyomuhowo lyosivike, tupu lina kupuma, nare vana ka sika kontoko. 3Awo tava lipura asi: “Yilye ogu na tu garumwina ko emumanya kevero lyontoko?” 4Va kankuke, emanya nare vana li garumuna ko, nye enene lya kere. 5Apa va hwililire montoko, tava mono mo mudinkantugara, age kuna dwara sikoverero sosire, kuna hingire korulyo. Ano awo tagu va pwaga unene.

6Makura mugara ta va tantere asi: “Neisi nagu mu pwagera. One kuna kupapara Jesus Munasareta, ogu kava vamberere. Ana vhumbuka, mutupu omu. Tareni si, evega eli kava mu tulire, lyolyo. 7Nye zendeni mu ka sansekere varongwa vendi naPeturusa asi: ‘Age nga pita komeho zeni koGalireya. Yiko ngomu ka mu mona, moomu ga mu tanterere.’ ”

8Awo makura tava genderere kupwaga mo, va duke po pontoko. Ekankamo netukuko yina va gwana. Ano awo hena nagumwe si ogu va yi tanterere ko, yeeyi awo kwa va pwagere gwa va pwagere.

Jesus ta monekere Mariya Mangadarena

9Jesus eyi ga vhumbuka ngurangura zonene zezuva lyomuhowo kosivike, ta howo kumonekera Mariya Mangadarena, mogu ga tjidire nompepo donondona ntano‐nambali. 10Age makura ta zi a ka sansekere ava va kere kumwe nendi, awo kuna guwu oku tava lili. 11Ano eyi va zuvha asi nomwenyo ana kara, yige ana mono, awo nokuyipura si.

Jesus ta monekere varongwa vavali

12Eyi ya pwa eyi, age makura ta monekere varongwa vavali mosinhwi peke, awo monzira zawo va ze kosirongo. 13Nawo va zire va ka yi sansekere vakwaawo, nye nawo si kapi va va pulire.

Jesus ta monekere varongwa murongo nagumwe

14Moruhura Jesus ta moneka mwene kowo murongo nagumwe, awo kosiliro vana kara, ta va popyere uhapuli noukukutu wonomutjima dawo, morwa kapi va pulire ava va mu mwene konyima zevhumbuko lyendi. 15Age makura ta va tantere asi: “Zendeni mouzuni mudima, mu ka udisire vantu navenye Mbudi zoNgwa. 16Nkenye ogu ana kupura, nye va mu kuhwe, nga paruka; nye ogu ana kunyoka kupura, ngava mu pangura. 17Ava ngava pura eyi, ngava gwana yidiviso yononkondo eyi: ngava tjida mo nompepo donondona medina lyange, ngava uyunga maraka gomape, 18ngava ka kwata mazoka, ndi nsene asi yuma youhungu vana nu, nayimwe si ngayi va tompora, awo ngava kambeka mawoko gawo kovaveli, makura tava veruka.”

Jesus tava mu twara meguru

19Hompa Jesus eyi ga mana kuuyunga nawo, makura tava mu gusa po va mu tware meguru, ta hingire korulyo rwaKarunga. 20Nye awo tava pwaga mo va ka udisire nakunye. Hompa nga rugana kumwe nawo oku ta koreke nonkango pokuvaruganesesa yitetu.

Currently Selected:

Marukusa 16: KWN

Highlight

Compare

Copy