Rukasa 1
1
Etwaromo
1Wovanzi kwa tjanga esanseko lyoyininke eyi ya horoka mokatji ketu, 2yiyo va yi tu sansekera ava va yi mwene, vaudisi woMbudi zoNgwa kutunda ketameko. 3Ano pokuyikona‐kona name moomu ya likwama‐kwama, yina wapere nge kuyikutjangera ove Tiofirusa gekuto, 4asi o dive usili woyininke eyi va ku ronga.
Ediviso lyehampuruko lyaJohanesa Mukuhwi
5Posiruwo saHerodesa, hompa gwaJudeya, kwa kere mupristeli gumwe edina lyendi Sakaliya, gombunga zaAbiya. Mukadendi Elisabeta gemezimo lyaArona ga kere. 6Ano awo navenye mouvali wawo, kwa kere vahungami kosipara saKarunga. Awo ngava sikisa mo yipango nayinye nonompangera daHompa nawa‐nawa. 7Awo kapi va peke muna, yeeyi Elisabeta nganze ga kere. Awo mouvali wawo kwa kurupire unene.
8Ezuva limwe Sakaliya kwa ruganene yirugana yendi youpristeli kosipara saKarunga porufo rwendi rwankenye ezuva. 9Ano mokukwama nkedi zovapristeli, yige sa kwete po sihoroweso asi a ka hwikire nzambo zedumba lyewa posizambero. Age makura ta hwilire montembeli zaHompa. 10Ano mbunga nazinye zovantu kwa sikamene ponze zi kanderere posiruwo sonzambo zedumba lyewa. 11Muengeli gwaHompa makura ta mu monekere, ta sikamene korulyo rosizambero sonzambo zedumba lyewa. 12Ano Sakaliya eyi ga yi mona ngoso, makura tagu mu pwaga, tau mu gwana woma. 13Nye muengeli ta mu tantere asi: “Wa ha tjira, Sakaliya, yeeyi ekanderero lyoge lina zuvhika kwaKarunga, ano mukadoge nga ku hampurukira munona gomugara, ove makura ngo mu ruke Johanesa. 14Ove ngo kara nehafo lyenene, ano vantu wovanzi ngava hafera ehampuruko lyendi! 15Yeeyi nga kara munene kosipara saHompa. Age kapi nga nwa vhinyu ndi yinwa yononkondo. Age nga zura Mpepo zoKupongoka kutunda mezimo lyozina. 16Age nga tengwidira sinzi soVaisraeli kwaHompa Karunga gwawo. 17Age nga kara mpitameho zaKristusa, nga kara nompepo nononkondo ngwendi muporofete Eliya. Age nga gwanekedesa hena oguhya novana, vahezuvhu ta va tengwidire koyigazo yovahungami. Nga wapaikira Hompa vantu, va kare muhoko gwendi.”
18Makura Sakaliya ta pura muengeli asi: “Omu ngayi kara‐kara yene eyi ngapi. Ame nyame ogu ni mugara gomukurona, mukadange nage hena ana kurupa?” 19Ano muengeli ta mu limburura asi: “Ame nyame Ngabiliyera ogu ani sikama kosipara saKarunga, ame kuna tumu nge ni ya uyunge noge, ni ku retere mbudi ezi zongwa. 20Moomu ngoso, to siti ezwi, kapi ngo vhura kuuyunga dogoro nekezuva eli ngayi sika mo eyi, morwa ono nyoka kupura nonkango dange edi ngadi sika mo posiruwo sado.”
21Mbunga ezi za ndindilire Sakaliya, kwa tetukilire eyi ya ka mu keresere mo ntaka montembeli. 22Nye eyi ga pwaga mo, kapi ga vhulire hena kuuyunga nawo. Awo makura tava diva asi age kuna ka mona emoneko montembeli. Age kwa sitire ngorooro, yooyo ana kuuyunga nawo rupuru‐puru makura.
23Eyi ga pwa mazuva gendi goukereli, Sakaliya makura ta tengura kembo lyendi. 24Kapi pwa pita mazuva, makura mukadendi Elisabeta ta kara marutu gavali, ta vanda makwedi gatano, ta tanta asi: 25“Momazuva aga gokuhulilira, Hompa ana tara nge, a guse nge nomuga mokatji kovantu!”
Ediviso lyehampuruko lyaJesus
26Eyi ga mu pita Elisabeta makwedi gatano‐nakumwe, Karunga ta tumu muengeli Ngabiliyera kositata somoGalireya, edina lyaso Nasareta, 27a ka tware mbudi komukadona ogu va dira kuguma rumwe, edina lyendi Mariya, age Josefa gemezimo lyaNdafita ga mu vandekerere. 28Muengeli eyi ga wiza kwendi, ta tanta asi: “Moro! Hompa ga ku swera unene, age kumwe noge ana kara!” 29Mariya nonkango edi domuengeli kwa mu reterere udigu wounene. Ta lipura asi, ekundo eli yinke lina kutanta. 30Ano muengeli ta mu tantere asi: “Mariya, wa ha tjira, yeeyi Karunga ana ku fire nkenda. 31Tara, ove ngo kara marutu gavali, ngo hampuruka mukeke gomugara, makura ngo mu ruke Jesus. 32Age nga kara munene, age ngava mu tumbura asi MunwaKarunga gekeguru‐guru. Ano Hompa Karunga nga mu pa uhompa wazinakuru Ndafita. 33Age nga pangera rudi rwaJakopo dogoro narunye, ano uhompa wendi kapi ngau paka uhura.”
34Mariya makura ta tantere muengeli asi: “Eyi omu ngayi genda, ame na hana mugara, ngapi?” 35Muengeli makura ta limburura Mariya asi: “Mpepo zoKupongoka ngazi ku wizira, ano nonkondo dogu gekeguru‐guru ngadi ku kudumika. Yiyo nye ngava tumbwira munona ogu ngo hampuruka asi Mupongoki, MunwaKarunga. 36Tara si, munwanyoko Elisabeta nage nezimo ana kara lyomunona gomugara moukurupe wendi. Ngomu mu tumbura sa asi nganze. Ano oku ngesi kwedi kwendi kwautano?-?nakumwe. 37Yeeyi Karunga nayimwe si eyi ayi mu tjindire.”
38Mariya makura ta tanta asi: “Ame ni mukereli gwaHompa. Yi horokere nge tupu moomu ono tanta.” Muengeli makura ta tundu po pwendi.
Mariya ta zi ugenda kwaElisabeta
39Momazuva ogo yipo ga katukire Mariya, ta genderere kuza kosirongo sonondundu kositata simwe somoJudeya. 40Age makura ta hwilire membo lyaSakaliya, ta morora Elisabeta. 41Ano Elisabeta kwa zuvha tupu emororo lyaMariya, makura munona ta vatauka mezimo lyendi. Elisabeta ta zura Mpepo zoKupongoka, 42ta zigire asi: “Ove kwa fumana mokatji kovakadi, nogo munona ogo ngo ka humpuruka nage kwa fumana! 43Ee, erago musinke eli lina gwana nge lyokuwizira nge ugenda zinyaHompa gwange? 44Yeeyi tupu lina ya gu ezwi lyemororo lyoge momatwi gange, makura munona yiyo ana vatauka mezimo lyange morwaehafo. 45Ano gerago googu ga pura asi, eyi ga mu tantera Hompa, ngayi sika mo!”
Rusumo rwaMariya rwetango
46Mariya makura ta tanta asi:
“Mutjima gwange tagu tangauka Hompa,
47ano mwenyo gwange nago kuna hafa unene morwaKarunga,
Muzowoli gwange.
48Yeeyi age ana diworoka usigona womukereli gwendi,
morwa kutunda pwanaina nomuhoko nadinye ngadi tumbura nge
asi ni munerago.
49Yeeyi Munankondo ana ruganene nge yoyinene,
edina lyendi kwa pongoka.
50Age kufira nkenda ava ava mu tjira,
ava vana kara po nava ngava ka kara ko.
51Age kwa rugana yirugana yononkondo nokuwoko kwendi.
Ava va linenepeka monomutjima dawo
yiyo ga va haraganesa po.
52Age kwa kandura ko vanankondo koyipundi yawo,
yiyo ga zerura vasigona.
53Age kwa kutika wonzara neyi yoyiwa,
vanangawo yiyo ga va tjida po mawoko‐woko.
54Age ana diworoka etumbwidiro lyendi kozinyakurwetu,
yiyo ana kwafa mukereli gwendi Israeli,
55moomu ga tanterere ozinyakurwetu Abirahamu,
nava va kweme ko dogoro narunye!”
56Mariya makura ta kara kwaElisabeta makwedi gatatu ngoso, makura ta tengura kembo lyawo.
Johanesa Mukuhwi tava mu hampuruka
57Ano siruwo saElisabeta sokuhampuruka tasi siki mo nye, makura ta hampuruka munona gomugara. 58Ano vamaparambo nekoro lyendi apa va zuvhire asi Karunga ana mu fire nkenda zokufa nokutara, makura tava ya mu hafesa ko.
59Ano mezuva lyautano‐nautatu tava wiza va ya rugane munona yovamba. Awo kwa here va mu ruke Sakaliya, edina lyoguhwe. 60Nye ozina tava tanta asi: “Kapisi lyolyo, edina lyendi yilyo Johanesa.” 61Awo tava mu limburura asi: “Mekoro lyoge mutupu ogu va ruka rumwe edina olyo!” 62Awo makura tava uyungisa oguhwe morupuru‐puru, va va pure asi, awo yilye ogu vana hara kumuruka. 63Sakaliya makura ta hundire siperende, ta tjanga po asi: “Edina lyendi yige Johanesa.” Makura navenye tava tetuka. 64Poopo ngoso makura kana kendi neraka lyendi tali mahuka, age makura ta uyunga a tangauke Karunga. 65Vamaparambo navenye tau va kwata woma. Yininke eyi nayinye kwa lihanenene konomukunda nadinye dokonondundu daJudeya. 66Ano navenye ava va yi zuvhire, ngava yi lipura monomutjima dawo asi: “Munona ogu muntu musinke nga kara ogu?” Yeeyi nonkondo daHompa kwa kere pwendi.
Rusumo rwaSakaliya rwetango
67Oguhwe Sakaliya kwa zulire Mpepo zoKupongoka, makura ta porofeta asi:
68“Va mu fumadeke Hompa Karunga gwaIsraeli,
yeeyi ana ya dingura muhoko gwendi
a ya gu wapaikire ezoworo.
69Ana tu tumbire Muzowoli gononkondo,
age gemezimo lyomukereli gwendi Ndafita.
70Eyi yiyo ga uyungisisire nare
tuna tovaporofete vendi wokupongoka
71asi, age nga tu popera kononkore detu
nokononkondo danavenye ava va tu nyenga.
72A fire ozinyakurwetu nkenda,
age a diworoke egwanekero lyendi lyokupongoka.
73Age kwa ganenene zinyakurwetu Abirahamu
74asi nga tu popera kononkore detu,
makura ngatu mu kerere twa hana utjirwe,
75tu kare vapongoki novahungami kosipara sendi
mazuva nagenye goukaro wetu.
76“Ano ove munwange ngava ku tumbura asi
muporofete gogu gekeguru‐guru,
yeeyi ove ngo pita komeho zaHompa,
ngo mu lyalyakanesere nonzira dendi.
77Ngo divisa muhoko gwendi yokuhamena ezoworo
nedongonono lyononzo dawo.
78Karunga gwetu ana tu fire nkenda
pokutupumisira ezuva lyeparu,
79li rete uzera kwava va kara momundema
nomomundwire gonomfa,
a ya vyukise nompadi detu monzira zombili.”
80Munona makura ta kuru, ta koro moMpepo. Aga kwa kere momburundu dogoro kezuva eli ga horokerere Israeli.
Currently Selected:
Rukasa 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
