Marukusa 15

Jesus komeho zaPiratusa

1Makura ngurangura zonene vapristeli wovanene kumwe nomasimbi novalirongi womatjangwa nosigongi mudima somasimbi tava tura po etokoro. Eyi vana mana kupandeka Jesus, tava mu twara, va ka mu tambeke Piratusa. 2Makura Piratusa ta mu pura asi: “Nani ove o hompa goVajuda?” Makura gwina ta limburura asi: “Nyove ono kuyitanta.” 3Vapristeli wovanene tava mu retere po mausima gokumuhamena gomanzi. 4Kutunda opo Piratusa ta mu pura hena asi: “Ove nokulimburura si yuma? Ko tara si, maumbangi ngesi gokukuhamena aga vana kureta po.” 5Nye kutunda opo Jesus neisi hena ga limbwilire, dogoro Piratusa ta tetukire mo.

Jesus tava mu tokwere nomfa

6Piratusa nkenye apa mosipito soPaska kwa yikire kumangurura nkwate zimwe, zeezi vana mu hundire. 7Pwa kere gumwe edina lyendi Barabasa, ogu ga kere modorongo novaruretesandjorongani vakwawo, ogu ga dipagere muntu mondjorongani zawo. 8Makura mbunga tazi zogomoka, va mu hundire, a va ninkire moomu mwanare. 9Kutunda opo Piratusa ta va pura asi: “Muna hara asi ni mu mangwilire ogu hompa goVajuda ndi?” 10Morwa ga divire asi vapristeli wovanene kwa mu mu reterere morwamfudu. 11Nye kutunda opo vapristeli wovanene tava zeda mbunga, zi hundire asi a va mangwilire Barabasa. 12Piratusa ta va limburura hena asi: “Yisinke eyi muna hara ni mu ruganene ogu omu tumbura asi hompa goVajuda?” 13Vena tava zogomoka hena asi: “Mu pampara kosilivindakano!” 14Piratusa ta va pura asi: “Udona musinke ga rugana?” Nye tava zogomoka unene asi: “Mu pampara kosilivindakano.” 15Ano morwakuhara Piratusa kufa mbunga nonkenga, yiyo nye ga va mangwililire Barabasa. Eyi ga mene kutoonesa Jesus nonongora, ta mu gava va ka mu pampare kosilivindakano.

Vakwayita tava swaura Jesus

16Kutunda opo vakwayita tava twara Jesus keharango lyomonda, eli lya kere erombe lyomupangeli Piratusa. Makura tava zigida vakwayita navenye va ponge kumwe. 17Makura tava mu dwareke erwakani lyegeha, ntani vana ganga nkata zomega va zi mu ture komutwe. 18Makura tava tameke kumumorora asi: “Moro, hompa goVajuda!” 19Ntani vana mu toona noruu komutwe oku tava mu fizire oku tava tu nongoro, va mu fumadeke. 20Eyi va mana kumuzora ngoso, tava mu hutura olyo erwakani lyegeha, va mu dwareke yikoverero yamwene. Makura tava mu gusa po va mu tware, va ka mu pampare kosilivindakano.

Jesus tava mu pampara kosilivindakano

21Vakwayita hena kwa sininikire Simoni gomoKirene, ogu va gwanekerere nendi, age ta tundu komapya, guhyaArekisandeli naRufusi, a simbire Jesus silivindakano sendi. 22Kutunda opo tava mu twara kevega lyaGorogata, kuninka asi ‘Evega lyoyikora.’ 23Makura tava mu pe vhinyu zokuvhonga nomira asi a nwe. Nye age kapi ga zi tambwire. 24Eyi va mana ngoso kumupampara kosilivindakano, tava ligavere nye yikoverero yendi ponkedi zafungu‐fungu. 25Vili kwa kere zautatu, apa va mu pamparere kosilivindakano. 26Sitjangwa sousima wendi sa mu kere keguru lyendi, kwa si tjenge asi: ‘Hompa goVajuda.’ 27Awo hena kwa mu pamparere kumwe novamahaka vavali, gumwe korulyo rwendi, ano ogu mukwawo korumoho rwendi. ( 28Matjangwa makura taga sikilire mo aga aga tanta asi: “Kwa mu varwira kovanausima.”)

29Varupitanzira kwa mu swawire unene, tava puku nomutwe dawo oku tava tanta asi: “Hee, ove ogu goguzungurura ntembeli o zi tunge momazuva gatatu tupu! 30Lipopera sa nye nyamoge oko kosilivindakano, o turuke ko!” 31Novapristeli wovanene novalirongi womatjangwa nawo ngosikwawo va mu zorere oku tava litantere vene navene asi: “Ani vakwawo ntani a popera, nye mwene nokuvhura si kulipopera! 32Kristusa, Hompa gwaIsraeli a turuke ko nye no kosilivindakano, tu yi tare, ntani natu pura.” Navaava va mu pamparerere nendi, nawo tava mu swaura.

Nomfa daJesus

33Eyi za sikire vili zomutwekatji, pevhu mudima tapa wiza ekurundema dogoro nokovili zautatu kositenguko. 34Moyiha yovili zautatu, Jesus makura ta zigire nezwi lyenene asi: “Eli, Eli, lama sabaktani?”, kuninka asi, ‘Karunga gwange, Karunga gwange, yisinke yokusigilira nge?’ 35Ano vamwe ava va sikamene po pokuyizuvha eyi, tava tanta asi: “Komu tara si, Eliya ana kuzigida.” 36Gumwe ta duka a ka zwide sisampo novhinyu zoururu, ta si tura koruu a si mu nwise, ta tanta hena asi: “Tanko tu tare nsene asi Eliya na wiza, a ya mu turure ko.” 37Kutunda opo Jesus ta zigire nezwi lyenene, makura nare gwa tenda.

38Va tare ko, emukehe lyokuteta ntembeli monda lina tauka pavali kutunda keguru dogoro pevhu. 39Mupitisili govakwayita efere, ogu ga mu sikamenene komeho, apa ga mu mwene omu guna kupwa mo, ta zigire asi: “Yosili nani MunwaKarunga ga kere.” 40Pwa kere hena vakadi, ava va yi litarerere ure. Pwava kwa kere po Mariya Mangadarena naMariya zinyaJakopogona naJosesi, naSarome, 41ava va mu kweme oku tava mu kerere age moGalireya, nosinzi sovakadi vamwe, ava va zire kumwe nendi koJerusarema.

Evhumbiko lyaJesus

42-43Apa lya gombokere, tapa wiza munasigongi somasimbi gumwe gekuto, Josefa gomoAremateya, ogu ga ndindilire nage Untungi waKarunga. Kwa kere ezuva lyomaliwapaikiro, kutanta asi ezuva lyokuhova kEsabata. Makura tagu mu dama a ze kwaPiratusa a ka hundire simpu saJesus. 44Nye Piratusa kwa tetukire pokuzuvha asi nare ana fu. Makura ta zigida mupitisili govakwayita efere, a ya mu pure asi nare ana fu, ndi ngapi? 45Piratusa eyi ga zuvha komupitisili govakwayita efere asi Jesus ana fu, makura ta gava simpu sendi kwaJosefa. 46Josefa makura ta randa ekehe lyezera, ta gusa simpu, ta si dingire mekehe lyezera, ta si tura montoko ezi va tjokwera memanya. Makura ta sindumwine ko emumanya kevero lyontonko. 47Mariya Mangadarena naMariya, zinyaJosesi, awo kuna kutara apa vana kumurangeka.

Currently Selected:

Marukusa 15: KWN

Highlight

Compare

Copy