Marukusa 11

Jesus ta hwilire moJerusarema pasiuhompa

1Eyi va wiza pepi naJerusarema, poyiha yaBetefage naBetani pondundu zoMauzwe, Jesus ta tumu varongwa vendi vavali, 2ta va tantere asi: “Zendeni komambo gena muna pe yipara. Pokukasika kweni nomu ka gwana sindongiligona, aso vana si kuminine, aso ga hana kusironda rumwe muntu. Ka si ditureni, mu ka si rete. 3Nsenesi pweli ogu na ka mu pura asi, ‘Yinke muna kuyiruganena oyo?’ ka mu limburureni asi, ‘Hompa ana si hepa. Ta ka si tengwida tupu ntaantani.’ ”

4Makura awo tava zi, va ka gwane sindongiligona sesi, vana kuminine ponze zerungavero. Makura tava si kumununa. 5Vamwe ava va sikamene po, tava va pura asi: “Yinke muna kurugana mu kumunune oso sindongiligona?” 6Avena tava va limburura moomu ga va tanterere Jesus. Makura tava va sigi. 7Makura vena tava reta sindongiligona kwaJesus, tava zara po yikoverero yawo, age ta rondo po. 8Sinzi sovantu tava zara yikoverero yawo monzira, ava vamwe kuna kutetagura nomutayi koyitji va di zare monzira. 9Ava va pitire komeho nava va kweme konyima tava zigire asi:

“Hosiyana!

Wee‐wee! Va mu pande ogu

ana kuwizira medina lyaHompa!

10Va u pandadeke

untungi waGuhyetu Ndafita wokomeho,

Hosiyana keguru‐guru!”

11Makura Jesus ta zi moJerusarema, ta hwilire montembeli. Eyi ga mana kutarurura nayinye, azo hena ngurova, ta pwaga ta zi kumwe nava murongo navavali koBetani.

Efingiliro lyoukuzu wa hana kuyima

12Eyi kwa sa ngurangura, va tunde moBetani, Jesus tazi mu kwata nzara. 13Makura ta monene sitji soukuzu ure, aso sa foko‐foko, ta si hedere, asi mpamwe na gwana ko yuma. Eyi ga si hedera, neisi ga gwene ko, yihako yooyo yelike, yeeyi kapisi yiro ruveze rokuyima ekuzu. 14Makura Jesus ta si tantere asi: “Narumwe si hena nga lya muntu yiyimwa yoge!” Eyi varongwa vendi va yi zuvhire.

Jesus ta wapeke ntembeli

15Kutunda opo tava wiza koJerusarema. Jesus makura ta zi montembeli, ta tjida mo varandesi novarandi montembeli, oku ta gandanga yitafura yovatjindji woyimaliva noyipundi yovarandesi wononkutji. 16Nagumwe si googu ga sigire a damune sininke montembeli a si twarerere. 17Makura ta rongo ta va tantere asi: “Amesi va tjanga asi, ‘Nzugo zange ava zi tumbure asi zekanderero zonomuhoko nadinye.’ Makura one yiyo muna zi paka zi kare sipwapwa sovamahaka.”

18Vapristeli wovanene novalirongi womatjangwa tava yi zuvhu, makura tava papara asi ngapi omu nava yi gendesa, va mu dipage. Yeeyi awo kwa mu tjilire, morwa erongo lyendi kwa tetwire mbunga mudima. 19Apa lya tokere, makura Jesus novarongwa vendi tava pwaga mo mositata.

Varongwa tava lirongere ko koukuzu

20Jesus novarongwa vendi eyi va pita ngura‐ngura zonene, tava mono sitji soukuzu aso sina kukuta kutunda konondandani daso. 21Peturusa nani haga yi kwatera, makura ta mu pura asi: “Murongi, ko tara si nye, esi sitji soukuzu ko fingire, sina kukuta sa!” 22Jesus ta va limburura asi: “Omu kare nepuro lyaKarunga. 23Yosili na kumuntantera, nkenye ogu nsenesi a tantera ezi ndundu asi, ‘Zeruka po o ka ligandere mefuta,’ nye age ga hana kukara nesinganyeko momutjima gwendi, nye a pure tupu asi, eyi nina kutanta nayi horoka, makura tayi mu horokere moomu ana tanta. 24Yipo nye nina kumutantera asi nayinye eyi omu hundire mekanderero, pureni asi muna yi gwana nare, nye yosili ngomu yi gwana. 25Apa omu kanderere kansika, omu gusire po tanko mukweneni, nsene ana kara nousima weni, nkumwe nga mu gusire po none Guhyeni gemeguru mausima geni. 26(Ano nsene mu dira kuligusira‐gusira po, Guhyeni gemeguru nage si kapi nga mu gusira po maunzoni geni.)”

Jesus tava mu pura yononkondo dendi

27Awo kwa wizire hena koJerusarema. Haga za Jesus mokugendagura montembeli, makura tava mu wizire vapristeli wovanene novalirongi womatjangwa nomasimbi, 28tava mu pura asi: “Nononkondo musinke o rugana eyi? Nogu ga ku pa nonkondo o yi rugane yilye?” 29Makura Jesus ta va limburura asi: “Name tani mu pura po sininke simwe, one hena mu limburure nge, ntani nani mu tantera asi nononkondo musinke ani yi rugana. 30Ekuho lyaJohanesa kupi lya tunda, meguru ndi kovantu? Limburureni nge.” 31Makura vena tava liyongo vene navene, tava uyunga asi: “Nsene tu tanta asi, ‘Meguru’, age ngano na tanta asi, ‘Eyi mwa dilire kumupura no?’ 32Ano tu tante hena asi, ‘Kovantu … ’ ” (Opo kwa tjilire nye vantu, yeeyi navenye va gazarere asi, Johanesa, muporofete mwene‐mwene.) 33Makura awo tava limburura Jesus asi: “Walye, ose nokuyidiva si.” Makura Jesus ta va tantere asi: “Name si kapi nani mu tantera asi nononkondo musinke ani rugana eyi.”

Currently Selected:

Marukusa 11: KWN

Highlight

Compare

Copy