Marukusa 10

Jesus ta rongo yokuhamena nonkwara

1Kutunda opo Jesus ta katuka a ze mesinya mwina lyaJorodana mosirongo saJudeya. Mamumbunga govantu taga mu wizire hena, makura age ta va rongo moomu mwanare.

2Makura Vafalisayi vamwe tava mu wizire, va ya mu rave asi: “Mugara kuvhura tupu kuzumba mukadendi ndi?” 3Makura Jesus ta va limburura asi: “Eyi ga mu rawira Mosesa yinke?” 4Vena asi: “Mosesa kwa geve epulisiro lyokutjanga mbapira zomalizumbo, makura va lizumbe.” 5Jesus ta va tantere asi: “Morwaukukutu wonomutjima deni ga mu tjangerere Mosesa mpangera ezi. 6Nye petameko, pesito, Karunga kwa va sitire mugara nomukadi. 7Morweyi yipo a sigire mugara oguhwe nozina, a hamene mukadendi. Ano vantu ava vavali tava kara nye rutu rumwe tupu. 8Vangesi kapisi vavali hena, rutu rumwe tupu. 9Eyi ga mangakana Karunga, muntu walye a yi mangurura.”

10Makura varongwa vendi membo tava mu pura hena yokuhamena eyi. 11Age yipo ga va tanterere asi: “Nkenye ogu a zumbu mukadendi a kware nage peke, kuteza nonkwara. 12A kare mukadi, nsene a zumba yendi, a kware nage peke, kuteza nonkwara.”

Jesus novanona

13Makura Jesus tava mu retere vanona, a ya va gume. Varongwa tava tugumukire ava va va retere. 14Apa ga yi mwene Jesus, ta va nyokere, ta va tantere asi: “Sigeni vanona va wize kwange. Mwa ha va silika, yeeyi vangoso yiwo wa hamena Untungi waKarunga. 15Yosili nina kumutantera asi, nkenye ogu a dili kutambura Untungi waKarunga ponkedi zopanona, kapi nga za mo!” 16Jesus ta va dingilikida mawoko gendi, ta ga va kambeke a va tungike.

Mumati gongawo

17Haga za Jesus mokugenda monzira, tapa wiza mumati gumwe, ta ya mu twire nongoro, ta mu pura asi: “Murongi gomuwa, yisinke nye nani rugana ni gwane mwenyo gwanarunye?” 18Jesus ta mu tantere asi: “Yisinke yokutumbwira nge asi ni muwa? Patupu ogu ga wapa, ntudi gumwe tupu, Karunga googo. 19Nove wa diva yipango omu ayi tanta asi: ‘Walye o dipaga, Walye o hondere, Walye o vaka, Walye o rundire, Walye o nyokoma muntu, Fumadeka oguho nonyoko.’ ” 20Makura gwina ta mu limburura asi: “Murongi, ame oyo nayinye hana tunda kounona wange kuyikwama.” 21Makura Jesus ta mu nwike oku ana mu zi komutjima, ta mu tantere asi: “Simwe tupu sina ku hupire po: zende o ka randese nayinye eyi wa weka, o ka yi gavere vahepwe ngo ka gwane emonazuni meguru. Ntani no wiza o ya kwame nge.” 22Makura gwina nonkango odo tadi mu guvararesa, ta ka za neguwo, morwa emona enzi ga wekere.

23Kutunda opo Jesus ta vema oku ta vema oku, ta tantere varongwa vendi asi: “Ani udigu unene kwava va weka yoyinzi kuza moUntungi waKarunga.” 24Varongwa tagu va pwaga. Nye Jesus ta twikida ko hena, ta va tantere asi: “Vana vange, nani udigu wosi wokuza moUntungi waKarunga! 25Nda ngameru hasa ureru kuhwilira mezuru lyonsonga, kupita muntu gongawo kuhwilira moUntungi waKarunga.” 26Eyi awo kwa va pwagesere unene nomutjima, tava lipuragere vene navene asi: “Nsene yimo ngoso, yilye nye ogu nga vhura kuparuka?” 27Makura Jesus ta va tarurura oku ta va limburura asi: “Kovantu eyi yidigu, nye kapisi kwaKarunga, yeeyi kwaKarunga, nayinye yireru.”

28Kutunda opo Peturusa ta mu tantere asi: “Ko tara si, ose kwa siga nayinye, yiyo twa ku kwama.” 29Jesus makura ta uyunga asi: “Yosili nina kumutantera, kutupu muntu ogu a sigi embo lyendi ndi vana vazina ndi ozina noguhwe ndi mukadendi ndi vana vendi nomapya gendi mokonda zange noMbudi zoNgwa, 30a dire kumurugwida kuwoko rwefere moruveze oru rwantaantani, mambo novanavazina novana nomapya. Nampili tava mu hepeke simpe, nye mouzuni wokomeho nga gwana mwenyo gwanarunye. 31Nye sinzi sava wokuhova ngava kara vahulilili, ano vahulilili yiwo ngava kara wokuhova.”

Jesus ta divisa rwautatu runyando rwendi nonomfa dendi

32Apa va kere monzira zokuza koJerusarema, Jesus kwa pitire komeho zawo. Nye varongwa kwa tjilire, ano ava va mu kwamene, tagu va pwaga. Makura ta zigida ava murongo navavali va hede kwendi, a va divise eyi ngayi mu horokera asi: 33“Tareni, ose koJerusarema tuna kuzeni, nye MunwaMuntu ngava mu gava kovapristeli wovanene nokovalirongi womatjangwa. Awo yiyo ngava mu pangwira konomfa oku hena ngava mu gava kovapagani. 34Awo hena ngava mu zora oku tava mu fizire nokumugeragura nongora, ntani ngava mu dipaga, nye nga vhumbuka mezuva lyautatu.”

Ehundiro lyovana vaSebede

35Makura vana vaSebede oJakopo naJohanesa tava wiza kwaJesus, tava mu tantere asi: “Murongi, ose kuna hepa o tu ruganene nkenye eyi natu hundira.” 36Makura age ta va pura asi: “Yinke eyi muna hara ni yi mu ruganene?” 37Vena makura tava mu limburura asi: “Tu ninka ngatu kare gumwe korulyo roge, gumwe korumoho roge mouyerere woge.” 38Nye Jesus ta va tantere asi: “One kapi muna diva eyi muna kuhundira. Nani one kuvhura kunwa nkinda ezi nani nwa, nokumukuhwisa kekuho eli nava kuhwisa nge?” 39Makura vena tava mu limburura asi: “Nhi, kuvhura.” Makura Jesus ta va tantere asi: “Hawe, yimo yosili. Nkinda ezi nani nwa, none yizo ngomu nwa, li kare ekuho eli nava kuhwisa nge, none yilyo ngava mu kuhwisa. 40Nye kuhingira korulyo rwange nokorumoho rwange kapisi nyame gokuyipanga. Oyo yavaava va yi wapaikira.”

41Apa va yi zuvhire owo murongo, tava handukire oJakopo naJohanesa. 42Makura Jesus ta va zigida va wize kwendi, ta va tantere asi: “Amesi mwa diva asi, ava ava tara asi vapangeli wonomuhoko, awo kupanga, ano vanene wonomuhoko kudiruganesa nononkondo dawo. 43Nye kweni one ya ha kara ngoso. Ogu ga hara kukara munene pokatji keni, a kare mukereli gweni. 44Ano nkenye ogu ga hara upitameho, a kare mupika gwanavenye. 45NaMunwaMuntu nage si kapi ga wizire asi va ya mu kerere, age kwa wizira a ya kerere vantu, a ya gave mwenyo gwendi, gu kare sizoweseso sovanzi.”

Jesus ta mahura meho gaBaratimeusa

46Kutunda opo tava wiza koJeliko. Jesus apa ga pwagere moJeliko kumwe novarongwa nemumbunga lyovantu, mugara gomutwiku Baratimeusa zaTimeusa, age ana hingire konontere donzira ta hundagere. 47Apa ga zuvhire asi ogu yige Jesus gomoNasareta, ta zigire asi: “Jesus MunwaNdafita, fira nge nkenda.” 48Sinzi sawo tava mu kuyauka asi a mwene ko. Nye age ngwendi kuna kumusangumuna, ta zigire unene asi: “MunwaNdafita, fira nge nkenda.” 49Makura Jesus ta sikama, ta va tantere asi va mu zigide. Vena tava mu zigida ogo mutwiku oku tava mu tantere asi: “Gu ku dame tupu, katuka, ta ku zigida.” 50Makura age ta hutura erwakani lyendi, ta katuka, ta zi kwaJesus. 51Jesus makura ta mu pura asi: “Yisinke ono hara ni yi ku ruganene?” Mutwiku ta mu limburura asi: “Murongi, ame kuna hara kumona hena.” 52Makura Jesus ta mu tantere asi: “Zende, epuro lyoge lina ku parura.” Naruvali si nare kuna kumona ana kumona, makura ta kwama Jesus monzira.

Currently Selected:

Marukusa 10: KWN

Highlight

Compare

Copy