MIKA 4
4
Epangero lyaHompa lyanapenye lyombili
(Jes 2:1-4)
1Momazuva ogo gana kuwiza
ndundu apa za kere ntembeli
ngazi kara zonde unene
kupitakana nadinye,
tazi litumbu mo
monondundugona nadinye.
Nomuhoko dononzi
ngadi dukira kwazo,
2ano vantu vado ngava tanta asi:
“Tu rondeni kondundu zaHompa,
kontembeli zaKarunga gwaIsraeli.
Yeeyi age nga tu ronga eyi ana
tu harere asi tu yi rugane;
ngatu genda mononzira edi
ga horowora.
Morwaerongo lyaHompa
kutunda moJerusarema;
moSiyoni yimo a uyungisire
vantu vendi.”
3Age ga tura po nompata pokatji konomuhoko
pokatji kovanankondo wovanene
wopopepi nava wokoure.
Nomfuro dawo ngava di
hambura yipururu
ano magonga gawo matemo.
Nomuhoko narumwe si hena
kuza koyita,
narumwe si hena kuliwapaikira yita.
4Nkenye ogu nga kara mompora
moyikunino yamwene
yoyindjembere nomaukuzu,
kutupu ogu nga mu tjilisa.
Hompa Munankondo nadinye
yige ana yi tumbwidire eyi.
5Nkenye muhoko kutongamena
tagu limburukwa karunga gwago,
nye ose ngatu tongamena, tatu
limburukwa Hompa
Karunga gwetu narunye nanarunye.
Israeli nga tengura ko koupika
6 Hompa kuna kutanta asi: “Ruveze runa siki mo rokupongaika mbunga ezi na pangura, ava va ka hepera moupika. 7Awo kuna remana kuna kara ure nembo, nye ava va hupa po tani ka ninka evareko lyepe nawo, makura ngava ka kara muhoko gomunene. Ame ngani va pangera kondundu zaSiyoni, kutunda posiruwo oso dogoro narunye.”
8Ano ove Jerusarema omu ga kara Karunga ngomusita, ogu ana kunomena nonzwi dendi, nga kara sitata sepangero lyosirongo esi sa kere soge. 9Eyi ono kukugira ngoso unene nani yinke? Yinke ono kuhepera ngoso ngwendi mukadi ana zegama? Morwa kupira koge nye hompa ndi morwa kufisa koge vapukuruli? 10Mbunga ove zaJerusarema, zuvha kukora ove o tuge ngwendi mukadi ogu ana kuhampuruka. Ano nye ntaantani, to tundu mo mositata o ze o ka tunge mosirongo sosanzara. Ove kuhepa kuza koBabironi, Hompa yiko nga ka ku gamenena kononkore doge. 11Nomuhoko dononzi, kuna lipongaike di ku rwise. Awo kuna kuuyunga asi: “Jerusarema yige kumuhanagura po! Sitata esi ngatu si tura mapuku!” 12Nye nomuhoko edi, kapi dina diva magazaro gaHompa. Awo kapi vana dimburura asi, awo kuna lipongaike va ya va futise moomu ava hwaga yilya porupare.
13 Hompa ta tanta asi: “Mbunga ove zaJerusarema, zende o ka futise nonkore doge! Ame ngani ku ninka munankondo ngwendi ntwedu zonombinga doyivera nomakondo gongoporo. Ove ngo lyatanga nomuhoko dononzi nougawo wawo ou va hakana ngo u retera nge, ame Hompa gouzuni naunye.”
Currently Selected:
MIKA 4: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
