MIKA 3
3
Mika ta pe usima vagendesi vaIsraeli
1Purakeneni, one vapangeli vaIsraeli! One nyone mwa fira kudiva eyi ya hungama, 2nye makura yiyo mwa nyenga yoyiwa, mu hare po yoyidona. One kuhuva vantu vange uzuni, tomu hende ko nyama koyisupa yawo. 3One kulya po vantu vange. Tomu va huwu yipapa, yisupa yawo tomu yi tavagura moomu ava tetagwire nyama mokayiga. 4Siruwo tasi wiza apa ngomu kuga kwaHompa, nye age kapi nga mu limburura. Kapi nga purakena makanderero geni, morwa mwa rugana yoyidona.
5Vaporofete kukumbagera vantu vange pokutumbwidira mpora ava ava va futu, ano ava ava dili kuvafuta tava va harere yita. Kovaporofete ava Hompa ta tanta asi: 6“Vaporofete one, ezuva lyeni lina ka sipeta; ezuva tali mu tokere. Morwa one kuzapwisa vantu vange, yipo nye ngomu dilira kukara hena nomamoneko gosiuporofete, kapi ngomu vhura hena kupumba yuma.”
7Ava ava pumbu yokomeho ngava swauka pokudira kukara po. Navenye ngava va nunupika, morwaKarunga kapi nga va limburura.
8Ano ame ko, Hompa ta zwida nge nompepo zendi nononkondo, ta pe nge egano lyouhungami nomupampi gokusansekera mbunga zaIsraeli nonzo dazo. 9Purakeneni nge, one vapangeli vaIsraeli, one ava mwa nyenga uhungami, tomu gadura youhungami yi kare epuko. 10One kuna kutungira sitata saKarunga, Jerusarema, ketateko lyedipago nouhahungami. 11Vapangeli wositata kupangera morwamfuto zombumbo, vapristeli kufwaturura Veta morwamfuto, vaporofete kugavera mahororo va gwanene po yimaliva, navenye kulikarwira asi Hompa nawo ga kara. Tava tanta asi: “Nayimwe si ngayi tu guma. Hompa nose ana kara.”
12Ano mwarweni ngava purwira Siyoni ngwendi epya, Jerusarema nga kara ndambo zohando, ano ntembeli wiza ngau kara.
Currently Selected:
MIKA 3: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
