MIKA 5

1Mbunga ove zaJerusarema, pongaikeni vakwayita veni! Ose vana tu konderekeda! Awo kuna kurwisa mugendesi gwaIsraeli!

Karunga ta tumbwidire mupangeli gokutunda moBeterehema

2 Hompa ta tanta asi: “Ove Beterehema Efurata, ove nyove sitata simwe sosinunu‐nunu moJuda, nye moge yimo ngani gusa mupangeli gwaIsraeli, gemezimo lyokutunda kwanare.”

3Ano Hompa nga zumbilira mbunga zendi kononkore dazo dogoro ogu gokuhampuruka ta ka hampuruka munwendi gomugara. Vantu womosirongo sendi ava va kara moupika, ngava ka lipakerera novakwaawo. 4Apa nga wiza, nga pangera vantu vendi nononkondo edi ngadi tunda kwaHompa nemefumano lyaHompa Karunga mwene. Mbunga zendi ngazi yoworoka, yeeyi ava vantu womouzuni ngava dimburura unene wendi, 5age nga reta mpora.

Eparuro nepanguro

Vasiliya apa ngava homona sirongo setu va pitire momakuma gepopero, ose ngatu tuma ko vagendesi vetu wononkondo va ka va rwise. 6Awo ngava funda Vaasiliya nononkondo doyirwiso, makura ngava tu parura koVaasiliya apa ngava homokera sirongo setu.

7Mbunga zaIsraeli ezi zina hupu po ngazi fana ngwendi eme lyepe eli nga tuma Hompa konomuhoko dononzi nomema aga gana kara koyitji yina kukura. Awo ngava kara kwaKarunga, kapisi kovantu. 8Ano ava ngava hupa mo monomuhoko ngava fana ngwendi nyime ana kusana nondya mowiza ndi komaliro. Age ta vatukire mononzwi, ta di nyanyagura nokudibwaragura — kapi ngapa kara hena endindiro lyeparuro. 9Israeli nga funda nonkore dendi, ta di haraganesa po nadinye.

10 Hompa ta tanta asi: “Posiruwo oso, ame ngani gusa nonkambe deni nokuhanagura turukara tweni toyita. 11Yitata yomosirongo seni nayo ngani yi hanagura po nokuzungura po makuma geni nagenye gepopero. 12Ame ngani hanagura po hena umpure weni ou omu ruganesa, ngani mu sige mawoko‐woko mwa hana nonganga. 13Ame ngani haraganesa po vakarunga woyimpempa nomamanya gonongundi dokupongoka. Ove kapi ngo kanderera hena yininke eyi wa rugana nyamoge. 14Ame ngani zungurura po mafano gakarunga gomukadi Asera mosirongo seni nokuhanagura po yitata yeni. 15Ame ngani handuka unene, tani tengwida kuwoko nomuhoko nadinye edi da dira kulimburukwa kwange.”

Currently Selected:

MIKA 5: KWN

Highlight

Compare

Copy