MIKA 2
2
Sigwana sava ava hepeke vahepwe
1Ee, nani udigu musi ngau gwana ava ava vangarara oku tava gazara udona! Eyi lina kusa, sinene vana yi gwanene evega, tava rugana udona ou kava gazara. 2Nsene mapya vana hara, tava ga gusa; va hare nonzugo, tava gusa. Kutupu epata ndi emona lyomuntu lyokuyoworoka.
3Ano Hompa ta tanta asi: “Ame kuna kugazara ni mu retere ezonauko eli ngomu dira kuhenduka. Ngesi moudigu muna kulizweka nyamweni, kapi ngomu genda hena ukeka. 4Apa ngasi wiza siruwo oso, vantu ngava ruganesa esanseko lyeni ngosihonena sezonauko, tava dimbi rusumo oru rwezumbaneso lyekwafo kombinga zeni asi:
Tuna hanauka po nuunu!
Hompa ana gusa sirongo setu,
yiyo ana si gava kwava
va tu twara upika.”
5Ano apa ngasi wiza nye siruwo sokutengwida sirongo kovantu vaHompa, one ko kapi ngomu gwana ko yuma.
6Vantu tava udisire nge asi: “Wa ha tu udisira. Wa ha udisa yokuhura opo. Karunga kapi nga tu swaukisa. 7Ove kuna kugazara asi vantu vaIsraeli mefingiliro vana kara ndi? Hompa kwa zumba nye edidimiko lyendi ndi? Nye sili age kuvhura a yi rugane oyo ndi? Nani ava ava rugana youhunga kapi a va uyungisa age nombili?”
8 Hompa ta limburura asi: “One kurwisa vantu vange ngwendi nonkore. Vantu kutengura koyita, tava gazara asi komambo mpora, nani nye one kuna va ndindire mu vake marwakani konomugongo dawo. 9One kutjida vakadi wovantu vange momambo aga va hara, ano vana vawo tomu va hakana matungiko gange dogoro narunye. 10Tundeni po apa mu ze; patupu ugami hena apa. Nonzo deni dina retere evega eli ehanauko.
11“Vantu ava kwa hara muporofete ogu a gendi age ana zura yimpempa nomakoto a tante asi: ‘Tani mu porofetere asi vhinyu noyinwa yononkondo ngayi mu zulira.’
12“Nye ame ngani mu pongeka kumwe, Vaisraeli namuvenye ava mwa hupa po. Ngani mu pongeka kumwe ngwendi nonzwi mosiunda. Moomu aga zura maliro nonzwi, nosirongo seni yimo hena ngasi zura vantu wovanzi.”
13Karunga nga va panwina nzira, ta va gusa mo moupika. Ngava pwagera momarungavero gositata, tava zi vana manguruka. Mupangeli gwawo, Hompa mwene, yige nga va pitisira.
Currently Selected:
MIKA 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
