MIKA 1
1
1Siruwo esi va kere oJotamu naAhasi naHisikiya ohompa vaJuda, yipo ga gavere Hompa mbudi ezi kwaMika, gomositata saMoreseti. Hompa kwa horwerere Mika yininke nayinye eyi yokuhamena Samaliya naJerusarema.
Siliro morwaSamaliya naJerusarema
2Zuvheni eyi, one nomuhoko nadinye;
purakeneni eyi namuvenye ava
mwa kara pevhu!
Hompa Mupangeli nga kara
mbangi zokumuvyuka.
Purakeneni!
Age kuna kuuyunga montembeli
zendi zemeguru.
3 Hompa nga tunda mevega
lyendi lyokupongoka;
nga hegumuka, ta gendi
kondungu zondundu.
4Makura nondundu
ngadi hemuka konhi zendi
ngwendi magadi pomundiro;
ngadi konkomokera monomuramba
moomu aga ndandumuka mema kondundu.
5Nayinye eyi ngayi horokera morwavantu vaIsraeli kwa zona, va simapeka kwaKarunga. Yilye ogu nga va pa unzoni wousima waIsraeli? Amesi nkurusitata, Samaliya! Unzoni walye woukarunga woyimpempa moJuda? Amesi Jerusarema no! 6Ano Hompa ta tanta asi: “Samaliya ngani mu ninka a kare ndambo zohando mosansara, evega lyokutapeka yindjembere. Hando zomositata ngani zi powomwena momuramba, ano matateko gositata ngaga kara mawoko‐woko. 7Vakarunga vawo navenye wovawa ngava va swaununa, nayinye eyi va gava konohondedi dontembeli ngayi hanauka po komundiro, ano mafano gaso nagenye ndambo zomawoko‐woko ngazi kara. Samaliya nayinye eyi kwa yi gwanena moruhonda, ano apa ngesi nonkore dendi ngadi yi twara, di ka yi tongamenene nakopeke.”
8Makura Mika ta tanta asi: “Morweyi yiyo nye ngani lilira oku tani keme. Mokulikida ruhodi rwange ame ngani genda nompadi‐mpadi norutu‐rutu. Ngani kuga ngwendi mbanze‐tani guwu ngwendi mpo. 9Yironda yaSamaliya nokuvhura si kuyiverura, ano Juda nage ngosikwawo yimo ana kuhara kuhepa; ehanauko lina ka sika komarungavero gaJerusarema mwene, omu mwa kara vantu vange.”
Nkore kuna kuhedera Jerusarema
10Wa ha yi tantera nonkore detu moGata yokuhamena kugwa kwetu; va ha ku mona omu ono kulira. Vantu womoBete‐Reyafara, likideni kuzumbanesa kweni ekwafo pokuligarumuna mombundu! 11Vantu vaSafire tava zi koupika marutu‐rutu nonomuga dawo. Ava va kara moSanani, kapi vana kupwaga mo mositata sawo. Nsene ngomu zuvha vantu womoBete‐Eseli tava lili, yi diveni asi kutupu udukiro oko. 12Vantu womoMaroto kuna kundindira nowoma epeperero, morwa Hompa ana reta ehanduko pepi naJerusarema. 13Ava mwa kara moRakisi, kutireni nonkambe koturukara toyita. One kwa kwama nonzo daIsraeli yiyo mwa tulisa Jerusarema nzo. 14Vantu vaJuda, ngesi rekereni sitata saMoreseti‐Gata. Ohompa vaIsraeli kapi ngava gwana ekwafo kositata saAkisibu.
15Vantu womoMaresa, Hompa nga mu gava konkore, ezi ngazi kwata sitata seni. Vagendesi vaIsraeli ava va fumana ngava ka vanda mekombombo lyaAduramu. 16Vantu womoJuda, kurureni nohuki deni mokulilira vana ava mwa hara. Limbarumuneni nyaamweni ngwendi makuvi, morwa vana veni ngava va mu gusa, va va tware koupika.
Currently Selected:
MIKA 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
