Mateusa 9

Everuro lyosirema somondambo

1Jesus kwa peramene mowato, ta rutu ta ka sika kositata sendi. 2Makura tava mu retere sirema somondambo, aso sina rara pouro. Jesus eyi ga mona epuro lyawo, makura ta tantere sirema asi: “Gu ku dame, munwange, nonzo doge vana di ku dongwonene po.” 3Makura valirongi vamwe womatjangwa tava gazara monomutjima dawo asi: “Ogu ta swaura Karunga.” 4Apa ga divire Jesus magazaro gawo, ta va tantere asi: “Yisinke muna kugazarera yoyidona ngesi monomutjima deni? 5Yoyireru po yeyi yokuuyunga asi, ‘Nonzo doge vana di ku dongwenene po,’ ndi yokuuyunga asi, ‘Katuka o gende’? 6Nye mokumudivisa asi MunwaMuntu kwa kara nononkondo dokudongonona po nonzo pevhu, yiyo nina kutantera sirema asi, ‘Katuka, gusa uro woge, o ze kweni!’ ” 7Makura gwina ta katuka, ta zi kwawo. 8Ano mbunga eyi za yi mona, tagu zi pwaga, makura tazi fumadeke Karunga, ogu ga pa vantu nonkondo dokuhura apa.

Ehoroworo lyaMateusa

9Kutunda opo Jesus eyi ana genda‐genda ko, makura ta mono mugara, edina lyendi Mateusa, age ana hingire pomberewa zomutero, Makura ta mu tantere asi: “Kwama nge!” Gwina makura ta katuka, ta mu kwama.

10Haga za mokuhingira monzugo zaMateusa pokulya, makura taku wiza vafutisi womutero wovanzi novananzo, va ya hingire kumwe naJesus novarongwa vendi posiliro. 11Apa va yi mwene eyi Vafalisayi, makura tava tantere varongwa vendi asi: “Morwasinke a lire murongi gweni kumwe novafutisi womutero novananzo?” 12Eyi ga yi zuvha Jesus, ta va tantere asi: “Ava va kanguka kapi va hepa muhakuli, vaveli ntani yiwo va mu hepa. 13Nye zendeni, mu ka lironge eyi yina kutanta yokuninka asi, ‘Ame ufenkenda na hara, kapisi nzambo.’ Yeeyi kapi na wizira asi ni ya zigide vahungami, vananzo na wizira.”

Yediliro lyonondya

14Kutunda opo varongwa vaJohanesa tava wizire Jesus, va ya mu pure asi: “Morwasinke atu dililire nondya ose noVafalisayi nkenye apa, nye varongwa woge va hana kudilira?” 15Jesus ta va tantere asi: “Nani vanasipito sononkwara kuvhura kuguva, age mukwali simpe nawo ana kara? Nye ngapa wiza mazuva aga ngava mu va gusa, ntani nye ngava dilira nawo.

16“Nagumwe si a tura sivandeko sosipe posikoverero sosikuru‐kuru, morwa yeeyi asi esi sosipe neisi si zomoka po, si sige po entomo lyenene. 17Ano muntu kapi a dwire vhinyu zompe monompunda dononkuru‐nkuru, neisi di tauka, vhinyu zi tjike mo, makura nompunda tadi zonauka. Ano vhinyu zompe kuzidwira monompunda donompe, ntani yi kara po nayinye.”

MunwaJairusa gomukadona nomukadi gokuvera

18Haga za Jesus mokuvantantera eyi, ga tara ko, mupangeli gumwe gogu ana kuwiza, ta mu twire nongoro, ta uyunga asi: “Munwange gomukadi ntaantani ana kufa. Wiza o ka mu kambeke kuwoko koge, makura ngano na ka paruka.” 19Makura Jesus ta katuka, ta mu kwama kumwe novarongwa vendi.

20Va liharuka ko, mukadi ogu ga verere ehamba lyohonde nomvhura murongo nambali, ta mu hedere, ta gumu konyerera zimwe zosikoverero sendi. 21Yeeyi age kwa gazarere momutjima gwendi asi: “Nampili ngano kosikoverero sendi tupu nina gumu, makura tani veruka.” 22Jesus makura ta piruka, ta mu tara, makura ta mu tantere asi: “Gu ku dame, munwange, epuro lyoge lina ku popere.” Mukadi makura ta veruka movili zoozo.

23Ano apa ga ya sikire Jesus monzugo zomupangeli, a mone vasiki woturumbendogona nombunga za kere mondjorongani, 24ta va tantere asi: “Liporeni ko, yeeyi mukadona kapi ana fu, kuna rara ana rara.” Makura tava mu zoro. 25Eyi ana mana kuvatjida mo va pwage, makura ta hwilire mo, a ka mu kwate kokuwoko. Makura mukadona ta pinduka. 26Mukukumo gweyi tagu lihanene mosirongo mudima.

Jesus ta verura vatwiku vavali

27Jesus ga tunda opo a ze komeho, vatwiku vavali makura tava mu kwama, tava zigire asi: “MunwaNdafita, tu fira nkenda!” 28Eyi ana ka hwilira monzugo, vatwiku tava mu hedere. Jesus makura ta va pura asi: “Muna pura asi ame kuvhura kuyirugana ndi?” Vena tava mu limburura asi: “Nhi, Hompa.” 29Makura ta va kwatadara pomeho gawo, oku ta uyunga asi: “Yi mu horokere moomu muna yi pulire.” 30Meho gawo makura taga mahuka. Jesus makura ta va ngongomekeda unene asi: “Takameseni, mwa ha yi zigauka kovantu.” 31Nye awo tava zi, tava ka mu divisa mwa za sirongo mudima.

Jesus ta verura sipuru‐puru

32Eyi va tunda opo va ze, makura vantu tava retere Jesus sipuru‐puru esi sa kere nompepo zondona. 33Eyi ga tjida mo mpepo zondona, makura sipuru‐puru tasi uyunga. Mbunga tazi tetuka, tazi tanta asi: “Yangesi ha twa kara, simpe kapi twa yi mona mo rumwe moIsraeli.” 34Nye Vafalisayi tava tanta asi: “Age nononkondo domupangeli gwado a tjidisa mo nompepo donondona.”

Jesus ta fire nkenda vantu

35Jesus nga gendagura moyitata nayinye nomonomukunda nadinye, oku ta rongo monosinagoge dawo, ta udisa Mbudi zoNngwa zoUntungi waKarunga, oku hena ta verura nkenye ehamba nankenye uvera nokuyova nakunye. 36Eyi ana mono mbunga, makura tazi mu gwire nkenda, morwa yeeyi va hepere va lifane nononzwi dokuzumbana da hana musita. 37Makura ta tantere varongwa vendi asi: “Muzangu gwene munzi, nye varugani vasesu. 38Yipo nye nomu hundilira mwenyamuzangu, asi a tume komuzangu gwendi varugani.”

Currently Selected:

Mateusa 9: KWN

Highlight

Compare

Copy