Mateusa 5

Eudiso lyopondundu

1Apa ga mwene Jesus nombunga dovantu, makura age ta rondo kondundu, ta ka hingira. 2Varongwa vendi makura tava wiza kwendi, age makura ta zahura kana kendi, ta va rongo asi:

Erago lyene‐lyene

3“Vanerago vava va kara nousigona womomutjima,

yeeyi Untungi weguru wawo.

4Vanerago vava ava guwu,

yeeyi ngava va hengagwida.

5Vanerago vava va kuruka,

yeeyi sirongo yiwo ngava si weka.

6Vanerago vava ava fire nzara nenota uhungami,

yeeyi ngava va kutika.

7Vanerago vava wonkenda,

yeeyi ngava va fira nkenda nawo.

8Vanerago vava wonomutjima da kuhuka,

yeeyi ngava ka mona Karunga.

9Vanerago vava ava retesa po mbili movantu,

yeeyi ngava va tumbura asi vana vaKarunga.

10Vanerago vava ava hepere morwauhungami wawo,

yeeyi Untungi weguru wawo.

11“None vanerago, nsene vantu tava mu swaura oku tava mu hepeke, tava mu uyungire yoyidona nayinye moyimpempa‐mpempa tupu morwarwange. 12Omu hafe oku tomu hamberere, yeeyi asi mfeto zeni nene unene meguru. Yimo ngorooro va hepekere sa novaporofete, ava va mu hoverere.

Mungwa nouzera

13“One nyone mungwa gouzuni. Ano mungwa nsenesi gu hakumpara, kosinke hena ngava gu tovesa? Ago kutupu hena sikwafo, ntudi kooko kuguzugumina ponze, va gu lyatange vantu. 14One nyone uzera wouzuni. Sitata esi sa kara pondundu, kapi asi hapara. 15Hena nomuntu si, ogu a hwameke ramba, ta zi tura konhi zolyata, kuzitura kontunda, ntani zi temena navenye ava vana kara monzugo. 16Nosite seni naso yimo nasi temena vantu, asi ava mone yirugana yeni yoyiwa, ava fumadekere po Guhyeni gemeguru.

YoVeta zaMosesa nomatjangwa govaporofete

17“Mwa ha gazara asi ame kwa wizira ni ya mangurure Veta ndi matjangwa govaporofete. Kapi na wizira emangururo, ame esikisomo lya reta nge. 18Yeeyi ame yosili nina kumutantera asi, nampili eguru nevhu li dongonoke, koVeta zaKarunga nokaninkegona si kaaka ngaka tunda ko, dogoro noku ngayi sika mo nayinye. 19Nkenyogu a mangurura sipango simwe nampili sosinunu‐nunu, nye a ronge vantu ngesi, ngava mu tumbura asi age yige nga nunupa po moUntungi weguru. Nye nkenyogu a yi sikisa mo oku ta yi rongo, ngava mu tumbura asi age yige nga nenepa po moUntungi weguru. 20Ame tani mu tantere asi, ntudi uhungami weni au pitakane wovalirongi womatjangwa nou woVafalisayi, ntani ngomu hwilira moUntungi weguru.

Yosipango sautano

21“Mwa zuvha asi vanare kwa va tanterere asi, ‘Walye o dipaga, ano nkenye ogu a dipaga, ga fira kumupangura.’ 22Nye ame tani mu tantere asi, nkenyogu a handukire mukwawo, ga fira kumupangura. Ano a kare ogu a ninki mukwawo asi, ‘Sininke somawoko‐woko ove,’ ga fira kumupangura masimbi. Ano a kare ogu a ninki asi, ‘Evaya tupu eli,’ ga fira kumukandwira moMundiro gwanarunye. 23Nsene o reta sigava sonzambo kosizambero, nye ove o diworoke asi pweli mukweni ogu ono kudira kuzora nendi, 24siga tanko nzambo zoge posizambero, o ka lipe mbili namukweni, ntani nye no ka tengura o ya zambe sigava soge kwaKarunga.

25“O genderere kulizuvha nonkore zoge paapa ono kugenda nendi monzira, neisi mpamwe nga ku twara komupanguli, ano mupanguli a ka ku rundwilire komuporosi, a ka ku tware modorongo. 26Yosili nina kukutantera asi, kapi ngo pwaga mo, ove wa hana kufuta dogoro nokosenda zokuhulilira.

Yosipango soutano‐nasimwe

27“Mwa zuvha sa omu va tanta asi, ‘Walye o hondere.’ 28Nye ame tani mu tantere asi, nkenyogu a tara mukadi, nye a mu dovaukire, nare ana mu honderere momutjima. 29Nsenesi eho lyoge lyrulyo tali hara kukupukisira konzo, li korora mo o li zugumine kwina. Yeeyi ngesi koge hasa, nsenesi o zumbanesa ruha roge rumwe rorutu, kumwe sa neyi yokukazugumina rutu roge mudima moMundiro gwanarunye. 30Ano nsenesi kuwoko koge korulyo taku hara kukupukisira konzo, ku kamuna ko, o ka ku zugumine kwina, yeeyi ngesi koge hasa, nsenesi o zumbanesa ruha roge rumwe rorutu, kumwe sa neyi yokukazugumina rutu roge mudima moMundiro gwanarunye.

Yomalizumbo

31“Kwa tanta hena asi, ‘Nkenyogu a zumbu mukadendi, a mu pe mbapira zomalizumbo.’ 32Nye ame tani mu tantere asi, ogu a zumbu mukadendi, age ga hana konda zoruhonda, nonkwara a mu tezesa. Hena ogu a kwara mukadi ogu va zumba, nage nonkwara a teza.

Yomugano

33“Mwa zuvha hena omu va tanta asi, ‘Walye o gana moyimpempa, nye o sikise mo eyi wa ganena Hompa.’ 34Nye ame tani mu tantere asi, nokugana walye omu gana, li kare eguru walye omu li gana, yeeyi alyo sipundi saKarunga, 35nevhu si walye omu li gana, yeeyi alyo silyato sonompadi dendi, naJerusarema si walye omu ganesa ko, yeeyi azo yizo mbara zaHompa gomunene. 36Nampili komutwe goge walye o ganesa ko, yeeyi ove kapi o vhuru kuninka ruhuki nampili rumwe asi ru zere ndi asi ru sovagane. 37Omu ninke tupu asi ‘Nhi’, ndi asi ‘Hawe’. Ano eyi ya pita opo kwa tunda moMudona.

Yokurugwida kuwoko

38“One mwa zuvha sa omu va tanta asi, ‘Yeho neho, yezego nezego.’ 39Nye ame tani mu tantere asi, walye omu lihokwa moyininke ya hana kuhungama. Nye nsene ana ku toona muntu ketama lyoge lyorulyo, mu pirwira nekwawo. 40A hare muntu kukupangwisa, nye a guse sikoverero soge, mu siga a gusilire nondjafa. 41A ku sininike muntu asi o ze nendi sinano sokilometa zimwe, genda nendi nokilometa mbali. 42O pe ogu a ku hundire, walye o zumine ogu ana hara kukuguza yuma momakongo.

Yeharo lyonkore

43“One mwa zuvha sa omu va tanta asi, ‘O hare mukweni, to nyenge gonkore zoge.’ 44Nye ame tani mu tantere asi, omu hare wonkore zeni, omu va ruganene yoyiwa ava va mu nyenga, one tomu kandererere mo ava ava mu rundire oku tava mu hepeke, 45asi omu kare mu vana vaGuhyeni gemeguru. Age kupumisira ezuva vadona novawa, age hena kurokesera mvhura vahungami novanzoni. 46Yeeyi nsenesi mu hara vaava va mu hara, yinke ngomu gwanena po? Amesi vafutisi womutero nawo yimo ava rugana. 47Ndi nsenesi mu likunda?-?kunda novakweneni velike, yinke muna kurugana yomulyo? Amesi vapagani nawo yimo ava rugana? 48Omu sikilire mo moomu ga sikilira mo Guhyeni gemeguru.

Currently Selected:

Mateusa 5: KWN

Highlight

Compare

Copy