Mateusa 25

Sifanekeso sovakadona murongo

1“Untungi weguru ntani ngau kara hena ngwendi vakadona murongo, ava va gusire noramba dawo, va ka simbagwire mukwali. 2Awo kwa kere magova gatano, vanandunge nawo vatano. 3Magova taga gusa noramba dago, nye awo va hana kupitura mawoli. 4Nye vanandunge tava pitura yipako yomawoli nonoramba dawo. 5Ano siruwo esi ga liranga‐rangere mukwali kuwiza, makura navenye tava kumauka, tava rara.

6“Pokatji komasiku tapa zuvhika ezwi lina kuzigira asi, ‘Ani one, mukwali gogo ana kuwiza, mu simbagwireni!’ 7Makura vakadona navenye tava pinduka, tava wapaike noramba dawo. 8Makura magova taga tantere vanandunge asi, ‘Tu gusireni mo momawoli geni, noramba detu tadi dimi.’ 9Vena vanandunge tava limburura asi, ‘Hawe, walye nokugagwaneka si nose none. Yoyiwa, zendeni nyonevene kovarandesi, mu ka rande.’ 10Ha va za mokukaranda, mukwali ta wiza. Ano ava va liwapaikire, tava hwilire nendi monzugo zosipito sononkwara, makura evero tava li zedire.

11“Moruhura vakadona vakwaawo ntani nye vana kuwiza nawo, tava ya zigire asi, ‘Ani hompa, hompa, tu zegurura ko!’ 12Age ta va limburura nye asi, ‘Yosili nina kumutantera asi, ame kapi na mu diva.’ 13Yipo nye nomu rungararera, yeeyi mwa dira kudiva ezuva novili.

Sifanekeso sovakareli vatatu

14“Posiruwo oso, Untungi weguru ngau kara ngwendi mugara, ogu ga here kuza kougenda. Makura ta zigida vakareli vendi, a va sigire emona lyendi, va li mu kungire. 15Kwagumwe ta gava ko noranda mafere gatano, kwamukwawo mafere gavali, kogu gwautatu efere limwe. Nkenye ogu kwa mu pere yokuyereka ponondunge dendi. Kutunda opo age ta zi nye. 16Ogu ga gwene noranda mafere gatano, ta zi ta ka di ruganesa, ta ka gwanena po hena noranda nonkwawo mafere gatano. 17Nagoogu ga gwene noranda mafere gavali, ta ka gwanena po noranda nonkwawo mafere gavali. 18Ano nye ogu ga gwene noranda efere limwe tupu, ta zi ta ka sima ekero mevhu, ta ka vhumbika mo yimaliva yahekurwendi.

19“Eyi pwa pita siruwo sosire, vakareli owo hekurwawo makura ta wiza, a ya tare yimaliva yendi kumwe nawo. 20Ogu ga gwene noranda mafere gatano, ta wiza nonoranda nonkwawo mafere gatano, edi ga gwanenene po, ta uyunga asi, ‘Hekurwange, noranda mafere gatano wa pere nge, tara, na gwanena po hena noranda nonkwawo mafere gatano.’

21“Hekurwendi makura ta mu tantere asi, ‘Yina wapa, o mukareli gomuwa, kukuhuguvara tupu nani. Ngomu wa limburukwa mweyi yoyisesu, yiyo nye nani ku tumbira mweyi yoyinzi. Wiza o ya yigare kumwe name!’ 22Ogu ga gwene noranda mafere gavali, nage ta hedere po, ta tanta asi, ‘Hekurwange, noranda mafere gavali wa pere nge. Tara, na gwanena po hena noranda nonkwawo mafere gavali.’ 23Hekurwendi makura ta mu tantere asi, ‘Yina wapa, nani o mukareli gomuwa, kukuhuguvara tupu nani. Ngomu wa limburukwa mweyi yoyisesu, yiyo nye nani ku tumbira mweyi yoyinzi. Wiza o ya yigare kumwe name!’ 24Moruhura tapa hedere nye nogu ga gwene noranda efere limwe, ta tanta asi, ‘Hekurwange, ame na ku diva asi ove muntu gomudigu: ove kuteza oku wa dira kukuna, ove hena kuzangura oku wa dira kuzumbagera. 25Ame kwa tjilire, yiyo nye na zililire, ni ka vhumbike yimaliva yoge mevhu. Emona lyoge lyeli!’ 26Hekurwendi makura ta mu limburura asi, ‘Udona woge owo, mukareli ove. Ove kwa divire asi ame kuteza oku na dira kukuna, hena asi ame kuzangura oku na dira kuzumbagera. 27Yisinke nye eyi wa dilire kutwarera nge yimaliva yange kombanga, asi pomutengu gwange nampo ni ya gwane emona lyange kumwe nonsonso. 28Yi mu guseni, mu yi pe gwina gweyi yeyovi limwe. 29Yeeyi ogu ga kara noyuma, kumupa, yi mu vhukilire, ano ogu ya pira, kuyimugusa neyi ga kara nayo. 30Nye mukareli ogu ga hana sikwafo, mu zugumineni mekurundema lyoponze. Mwina yimo namu ka kara nonkali nomalikwetjo gomazego.’

Mbangwiliro zopouhura wouzuni

31“Apa nga wiza MunwaMuntu mouyerere wendi kumwe novaengeli vendi, ntani nga hingira posipundi souyerere wendi. 32Komeho zendi ngaku ponga nomuhoko nadinye dovantu. Makura age nga va hangura ngwendi moomu a hangura musita nonzwi koyikombo. 33Nonzwi nga di tura korulyo rwendi, ano yikombo korumoho rwendi. 34Makura Hompa nga tantera ava wokorulyo rwendi asi, ‘Wizeni oku, one ava ga swera Tate, mu ya ture moUntungi ou va mu wapaikira kutunda ketameko lyouzuni! 35Morwa apa za kwete nge nzara, one yiyo mwa pere nge ni lye. Na fire enota, one yiyo mwa pere nge ni nwe. Na kere ni mugenda, one yiyo mwa kevedere nge. 36Na kere nkagi, one yiyo mwa dwarekere nge. Na verere, one yiyo mwa tarerere nge po. Eyi na kere modorongo, one makura tomu wiza, mu ya tare nge ko.’ 37Vahungami ntani ngava mu limburura asi, ‘Hompa, ezuvake twa ku mwene, ono kara nonzara, tu ku pe o lye, ndi li ku kwate enota, tu ku pe o nwe? 38Hena ezuvake twa ku mwene o mugenda, tu ku kevede, ndi nkagi, tu ku dwareke? 39Hena ezuvake twa ku mwene, ove to vere ndi ono kara modorongo, tu ku tare ko?’ 40Hompa makura nga va limburura asi, ‘Yosili nina kumutantera asi, nkenye eyi mwa ruganena gomununu po povamumbya vange, nyame mwa yi ruganena.’

41“Age ntani nye nga tantera wokorumoho asi, ‘Zendeni kwi, one ava va fingilira, mu ze mekurundiro lyanarunye, eli va wapaikira Muzonaguli novaengeli vendi. 42Morwa apa za kwete nge nzara, one kapi mwa pere nge ni lye. Na kere nenota, one kapi mwa pere nge ni nwe. 43Na kere nkagi, one kapi mwa dwarekere nge. Na verere ndi apa na kere modorongo, one kapi mwa tarerere nge po.’ 44Makura nawo ntani ngava mu pura asi, ‘Hompa, ezuvake twa ku mwene, ove ono fu nzara ndi enota, ndi o mugenda ndi nkagi, ndi to vere ndi ono kara modorongo, tu dire kukukwafa?’ 45Age makura ntani nga va limburura asi, ‘Yosili nina kumutantera asi, nkenye eyi mwa dira kuruganena gomununu po povamumbya vange, nyame mwa dira kuyiruganena.’ 46Ava makura ngava za moruhepo rwanarunye, nye vahungami ngava za momwenyo gwanarunye.”

Currently Selected:

Mateusa 25: KWN

Highlight

Compare

Copy