Mateusa 24

Jesus ta uyunga yehanaguro lyontembeli

1Jesus apa ga pwagere montembeli a ka ze, varongwa vendi tava mu wizire, makura tava mu likida nonzugo dontembeli. 2Nye Jesus ta va tantere asi: “Eyi nayinye tomu yi mono sa? Yosili nina kumutantera asi: nemanya si limwe lyeeli ngali kara kontunda zekwawo, eli ngava dira kuzungurura.”

Yomalilimbo nomahepeko

3Kutunda opo Jesus eyi ana hingire poNdundu zoMauzwe, varongwa vendi tava mu hedere, awo vana kara velike, tava mu pura asi: “Tu tantera asi, ezuvake ngayi horoka yene eyi? Sidiviso sewizo lyoge nesi souhura wouzuni sipi so?”

4Jesus ta va limburura asi: “Takameseni, neisi nava mu pukisa. 5Yeeyi vanzi ngava wizira medina lyange, tava ya likisaukire asi, ‘Nyame Kristusa.’ Awo makura ngava ya pukisa vantu wovanzi. 6One ngomu zuvha yita nonomukukumo dayo. Takameseni, gwa ha mu pwaga. Morwa nampili ngayi horoke, nye uhura simpe kapi una siki mo. 7Yeeyi nomuhoko ngadi lilimba‐limba, ano yi kare yirongo, nayo ngayi lilimba‐limba. Napenye ngapa kara marumbu nomakankamo gevhu. 8Nye nayinye eyi ngayi kara ngwendi ntundiliro zezegamo.

9“Ntani ngava mu gava nye, va mu hepeke momudona, makura tava mu dipaga. One nkenye muhoko ngagu mu nyenga morwedina lyange. 10Makura ntani ngava puka sinzi sawo mepuro, ngava liheta‐hete oku tava linyenganyenga vene navene. 11Ngapa horoka vaporofete wovanzi woyimpempa, awo ngava pukise wovanzi. 12Morwakuvhuka koudona, yiyo ngali tendera eharo lyovantu wovanzi. 13Nye ogu nga didimika dogoro kouhura, yige nga yoworoka. 14Nye Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.

Yidiviso yezonauko lyedona

15“Ngomu mona ezonauko lyedona mevango lyokupongoka, eli ga uyungire muporofete Ndaniyera, gokuyiresa a yi kwate egano. 16Makura ava va kara moJudeya, ngava tjilire konondundu. 17Ogu nga kara peguru lyonzugo, ga ha humburuka, a ka hare yininke monzugo zendi. 18Ano ogu nga kara mepya, ga ha tengura kembo, a ka hare sikoverero sendi. 19Ani nane vakwetu vakadi ava ngava kara nezimo, nava ngava zamweka momazuva ogo! 20Nye kanderereni asi etau lyeni ngali dire kukara pokufu ndi mEsabata. 21Ntani nye ngapa kara udigu wounene, ou wa dilire kukara po kutunda ketameko lyouzuni dogoro nokwanaina, wangoso hena kapi ngau kara po rumwe. 22Nye ngano mazuva ogo kapi ngava ga supipika, ngano nomuntu si gumwe nga yoworoka. Nye mazuva ogo Karunga ga supipikira morwavahoroworwa vendi.

23“Nsenesi muntu nga mu tantera asi, ‘Tareni Kristusa gogo,’ ndi asi, ‘Gogwina,’ mwa ha yi pura. 24Yeeyi ngapa kara oKristusa woyimpempa novaporofete woyimpempa, nye awo ngava rugana yidiviso noyitetu yoyinene. Nsenesi ngano kuvhura, novahoroworwa vaKarunga ngano nawo ngava va pukisa. 25Komu tara si: na yi mu tantere, ayo ya hana kuhoroka.

26“Apa ngava mu tantera asi, ‘Tareni, gogwina momburundu,’ mwa ha za ko. Ndi asi, ‘Tareni, gogwina monzugo,’ mwa ha yi pura. 27Yeeyi moomu tupu aru vema ruvadi, ru tundilire koUpumezuva, ru ka livete koUtokero, nokuwiza kwaMunwaMuntu yimo ngaku kara.

28“Oku aku kara erambo, yiko aga pongo makuvi kooko.

Ewizo lyoMunwaMuntu

29“Udigu womazuva ogo ngau pwa tupu, makura ezuva tali sovagana, ku kare kwedi kapi ngaku gava site sako hena, ano nombungururu ngadi gwa keguru, di kare nonkondo deguru, ngadi linyunganga. 30Ntani ngasi moneka nye sidiviso saMunwaMuntu keguru. Vantu navenye vepevhu ngava kara mononkali, MunwaMuntu ngava mu mona, age ta wiza pomaremo geguru nononkondo dendi nouyerere wendi. 31Age nga tuma vaengeli vendi nomarumbendo gokupyopya unene. Awo ngava ya pongaika vahoroworwa vendi momaruha gane gouzuni, kutunda kosikondo simwe seguru dogoro nokosikwawo.

Sifanekeso soukuzu

32“Kositji soukuzu lirongereni ko sifanekeso esi asi: nsenesi nomutayi daso di tarara, yihako yaso ayo tayi pumine, muna diva nye asi kurombo pepi. 33Napaapa yimo ngorooro, nsenesi ngomu mona yininke eyi, ngomu dive nye asi yina siki, pevero ana kara. 34Yosili nina kumutantera asi, vantu ava vantaantani kapi ngava lipitira, yininke nayinye eyi ayo ya hana kuhoroka. 35-36Eguru nevhu ngali dongonoka, nye nonkango dange narumwesi kapi ngadi dongonoka.

Vantu ava vangare

37“Moomu tupu ya kere momazuva gaNowa, newizo lyaMunwaMuntu yimo ngali kara. 38Moomu tupu ngava li tava nu momazuva aga ga hovere ekuruhanzo, nomu tupu ngava likwara‐kwara dogoro nekezuva eli ga peramene Nowa memuwato, 39nye awo va hana kuyikwata egano dogoro noku rwa va gwanenene mo rukuruhanzo, ru va tware navenye, newizo lyaMunwaMuntu yimo ngorooro ngali kara. 40Ano ntani ngamu kara vagara vavali mepya: gumwe tava mu gusa po, ano ogu mukwawo tava mu sigi po. 41Povakadi vavali wokutwa ngava gusa po gumwe, mukwawo tava mu sigi po. 42Rungarareni, yeeyi kapi mwa diva asi Hompa gweni ezuvake nga wiza. 43Nye diveni asi nturagumbo nsenesi a diva asi siruwoke na wiza muwidi masiku, amesi ngano ta rungarara a vivike asi va dire kumuyomborora monzugo zendi. 44Yipo nye nomu liwapaikilira none, yeeyi MunwaMuntu nga wiza movili zohararasi.

Sifanekeso sovakareli vavali

45“Koge ove yilye nani mukareli gokulimburukwa gonondunge, ogu ga tumbire hekurwendi a kare mutunini govantu vendi, a va paape nondya posiruwo sado? 46Mukareli gwangesi erago, nsenesi a ya mu gwana hekurwendi, age ta ruganesa ngesi. 47Yosili nina kumutantera asi, gwangesi kumutumba, a kare mukungi gemona lyendi mudima. 48Nye nsenesi mukareli ogo mudona, ta ligazarere mwene asi, ‘Hekurwange kwa kara nomapingidi gokuwiza.’ 49Makura age ta kerere ko nye kupumanga vakareli vakwawo, oku ta li oku ta nu kumwe nononkorwe. 50Hekurwa zogu mukareli nga wiza mezuva lyohararasi nomovili ezi ga hana kudivira. 51Gwina age nga ya mu topagura, ta mu kandwire kovayilipaki, oku ngaku kara nye nonkali nomalikwetjo gomazego.

Currently Selected:

Mateusa 24: KWN

Highlight

Compare

Copy