Mateusa 23
23
Jesus ta rondora varongwa morwavalirongi womatjangwa noVafalisayi
1Kutunda opo Jesus kwa tanterere mbunga novarongwa vendi asi: 2“Valirongi womatjangwa noVafalisayi posipundi saMosesa va hingira. 3Omu rugane oku tomu sikisa mo nayinye eyi ava mu tantere. Nye walye omu honene yirugana yawo, yeeyi awo kapi ava rugana eyi ava tanta. 4Awo kumangaika nomudigo donondigu, tava di kambaike poyipepe yovantu, nye awo vene kapi va hara kuguma ko mpili nyara. 5Awo kuyininkira asi yirugana yawo yi moneke kovantu. Tareni omu ava dwara maliva gomanene gokupungwira nontanto doVeta zaMosesa, nye nonyerera doyikoverero yawo yiwo sa unene womu. 6Nye awo kwa hara mavega gomawa po poyipito noyipundi yovanamakuto monosinagoge 7nomalikunda‐kundo gopomarandero, hena asi vantu ava va tumbure po asi ‘Murongi’. 8Nye one walye omu va tarerere, va mu tumbure asi ‘Varongi,’ yeeyi murongi gweni gumwe tupu, one hena namuvenye vezimo limwe tupu. 9Nye one hena nagumwe si ngomu tumbura apa pevhu asi ‘Guhyeni,’ yeeyi Guhyeni gumwe tupu, nye age meguru ga kara. 10One walye hena ava mu tumbura asi ‘Vapitisili,’ yeeyi mupitisili gweni gumwe tupu, Kristusa. 11Nye gomunene po pokatji keni a kare mukareli gweni. 12Ogu a linenepeke, ngava mu nunupika, ano ogu a linunupeke, ngava mu nenepeka.
Jesus ta pe usima valirongi womatjangwa noVafalisayi morwauyilipaki wawo
13“Ani nane vakwetu, one valirongi womatjangwa noVafalisayi, mu vayilipaki one! One vantu kuvazedilira Untungi weguru, va ha hwilira mo. Nye one nyonevene kapi omu zi mo, ano ava va hara kuza mo, yiyo omu va silike asi va ha za mo.
[ 14“Ani nane vakwetu, one valirongi womatjangwa noVafalisayi, vayilipaki one! One kulya po nonzugo dovadike nu, ntani nomu lininkisa mu kanderere makanderero gomare. Yipo nye nava mu pangwisa momudigu!]
15“Ani nane vakwetu, one valirongi womatjangwa noVafalisayi, vayilipaki one! One kuvindakana sirongo nefuta, asi mu tezwilise po nampili gumwe. Ano eyi na litezurura, tomu mu ninki hena a hamene koMundiro gwanarunye, a mu pitakane hena nyonevene pwaruvali!
16“Ani nane vakwetu, one vapitisili wonontwiku one. One kutanta asi, ‘Nsenesi gumwe a gana ntembeli, oyo neisi, nye ogu a gana ngorodo zomontembeli, yige ana lipe sirugana sokusikisa mo mugano.’ 17Ani one mavaya hena one vatwiku! Esi sa vhura po sikwawo nani sipi so, ngorodo ndi ntembeli ezi azi pongora ngorodo? 18Hena asi, ‘Muntu nsenesi a gana sizambero, oyo neisi, nye nsene a gana sigava sonzambo, esi sina kara po, ntani na kara nosirugana sokusikisa mo mugano.’ 19Vatwiku one! Esi sa vhura sikwawo sipi so, sigava ndi sizambero esi asi pongora sigava? 20Ano nye, ogu a gana sizambero, yige a si gana sene neyi nayinye eyi ayi kara po. 21Ano ogu a gana ntembeli, yige a zi gana nogu ga kara mo. 22Ano ogu a gana eguru, yige a gana sipundi saKarunga nogu ana si hingire.
23“Ani nane vakwetu, one valirongi womatjangwa noVafalisayi, vayilipaki one! One kugava yiumurongo yehidi lyokutovesesa, ano nye eyi ya nenepa po moVeta zaKarunga one nombili si nayo: uhungami noufenkenda noulimburukwi. Eyi yiyo nye mwa hepa kurugana, one mwa hana kusiga yikwawo. 24One vapitisili wovatwiku, one kudinda ko ndi, nye ngameru tomu mininine.
25“Ani nane vakwetu, one valirongi womatjangwa noVafalisayi! Mu vayilipaki one! One kukuhwa nkinda nosiyaha kooko kontunda, nye monda zaso kwa zura yomahaka nomadowo. 26Ani ove Mufalisayi gomutwiku, kuhura tanko nda zonkinda ndi zosiyaha, makura ntunda zaso nazo ngano nazi kuhuka!
27“Ani nane vakwetu, one valirongi womatjangwa noVafalisayi, vayilipaki one! One kwa lifana nonontoko edi va limbagura: kuditara yiwo sa uwa womu, nye monda zado kwa zura yigorogogo yovafe nouworedi nkenye ou. 28None yimo mwa fana komeho zovantu: kontunda kwa hungama, nye monda kwa zura uyilipaki noumbudi.
Jesus ta divisa valirongi womatjangwa noVafalisayi mfuto zawo
29“Ani nane vakwetu, one valirongi womatjangwa noVafalisayi, vayilipaki one! One kutunga nontoko dovaporofete, tomu limbagura yidiworokeso yomamanya yovahungami, 30oku tomu tanta asi, ‘Ngano si mouzuni woguhyetu twa kere ose, ngano kapi twa kere nousima kohonde zovaporofete.’ 31Ngesi one kuna kugava undipo asi, one vana wovarudipagi wovaporofete. 32Ngomu ngoso, sikiseni mo nye eyi va varekere ozinyakurweni. 33One mazoka, valitundakani wonombaroka! Ngapi omu ngomu yoworoka kokumupangwira koMundiro gwanarunye? 34Ame yipo nye nina kumutumina vaporofete novakonentu novalirongi womatjangwa. Vamwe mo ngomu ya va dipaga, tomu va pampara kosilivindakano, ano ava vamwe mo monosinagoge deni ngomu ya va geragwira, tomu ya va tjida‐tjidire mwa za yitata. 35Yiyo nye ngomu gwanena nzo zohonde zovahungami ava mwa dipagera mouzuni, kutunda kohonde zaAbeli gomuhungami dogoro nokohonde zaSakaliya, munwaBarakiya, ogu mwa dipagerere pokatji kontembeli nosizambero. 36Yosili nina kumutantera asi, mfuto zoyininke nayinye eyi ngava zi gwana vantu ava!
Jesus ta hahura Jerusarema
37“Jerusarema, Jerusarema! Ove tupu o dipaga vaporofete, to va toona nomamanya ava va ku tumina. Rungapi na here kupongaika vana woge, moomu azi pongaike nhunhwa vana momavava gazo, nye one nokupura si! 38Tareni, nzugo zeni mawoko‐woko ngazi kara. 39Yeeyi ame tani mu tantere asi, kutunda apa kapi ngomu mona nge hena dogoro noku ngomu ninka asi, ‘Va mu pande ogu ana kuwizira medina lyaHompa!’ ”
Currently Selected:
Mateusa 23: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
