Mateusa 21

Jesus ta hwilire moJerusarema pasiuhompa

1Eyi vana ya likokerere pepi naJerusarema, va sike koBetefage poNdundu zoMauzwe, makura ta tumu varongwa vavali, 2ta va tantere asi: “Zendeni komukunda ogu guna mu kara komeho. Nomu ka sika tupu, makura tomu gwana sindongili esi vana kuminine, aso namunwaso. Ka si ditureni, mu ka si retere nge oku. 3Nkenye ogu na ka mu pura nkenye eyi, ka mu tantereni asi: ‘Hompa ana si hepa.’ Nage kapi na ka likwata‐kwata, nage naruvali si ta ka yi siga yi wize.”

4Nayinye eyi kwa horokerere, di sike mo nonkango domuporofete, ogu ga uyungire asi:

5“Tantereni vantu womoSiyoni asi:

Tareni, Hompa gweni ta wiza kweni negomoko.

Age ana higire posindongili,

ano sindongiligona, muna gwesi somurongero.”

6Varongwa tava zi, tava ka ninka moomu ga va tanterere Jesus. 7Tava ka reta sindongili nosindongiligona, makura tava zara po yikoverero yawo, tava mu rondeke po. 8Makura sinzi sovantu tava zara yikoverero yawo monzira. Ava vamwe tava tete nomutayi koyitji, tava di zara monzira. 9Mbunga ezi za pitire komeho nezi za kere monyima, tazi zigire asi:

“Hosiyana! Wee‐we, MunwaNdafita!

Va mu pande ogu ana kuwizira medina lyaHompa.

Wee‐we Karunga!”

10Eyi ana ya siki moJerusarema, mukukumo gwendi makura tagu lihanene mwa za sitata, tava pura asi: “Mugarake mwene ogu?” 11Mbunga makura tazi limburura asi: “Yige googo Jesus, muporofete gwaNasareta zomoGalireya.”

Jesus ta zi montembeli

12Konyima zeyi ntani ana hwilire Jesus montembeli. Makura ta tjida mo varandi novarandesi navenye montembeli. Yitafura yovasinti woyimaliva noyipundi yovarandesi wonomputukuwa ta yi gandanga. 13Makura age ta va tantere asi: “Kwa tjanga va tjanga asi, ‘Nzugo zange ava zi tumbure asi nzugo zokukandererera.’ Ano one yiyo muna zi paka zi kare sipwapwa sovamahaka.”

14Montembeli yimo va mu wizililire nye vatwiku noyirema, makura ta ya va verura. 15Apa va yi mwene nye vapristeli wovanene novalirongi womatjangwa oyo yitetu ga rugene, novanona ava va zigilire montembeli asi: “Wee‐we, MunwaNdafita!” makura tava handuka, 16tava mu tantere asi: “To zuvhu tupu omu vana kutanta vena?” Jesus ta va limburura asi: “Nhi, kapi mwa resa rumwe asi, ‘Ove kwa ronga vanona novakeke, va ku hamberere’?” 17Makura Jesus ta va sigi, ta tundu mo mositata, ta ka za moBetani, yimo nye ga ka rere.

Efingiliro lyoukuzu wa hana kuyima

18Eyi kwa sa, Jesus makura ta tengwire ko kositata, ta zuvhu nzara. 19Makura ta mono ukuzu konzira, ta u hedere, nye kugwana ko nye yihako yelike. Ta u tantere asi: “Narumwe si hena ngamu tunda moge yiyimwa!” Naruvali si ukuzu nare una kukuta. 20Apa va yi mwene varongwa, tava tetuka, tava pura asi: “Ngapi omu una kukuta ukuzu ou usimbu ngesi?” 21Jesus ta va limburura asi: “Yosili nina kumutantera asi: Nsene si mu kara nepuro, one mwa hana kusinganyeka, ngano kapisi ayi huru yeeyi yina horokere ukuzu yiyo ngomu rugana. Ngano kutantera tupu ngondundu ezi asi, ‘Damuka po apa, o ka gwire mefuta,’ makura tayi horoka. 22Nayinye eyi omu hundire pokukanderera, ngomu yi gwana, nsene mu pura.”

Jesus tava mu pura yononkondo dendi

23Jesus eyi ga za ngesi montembeli, vapristeli wovanene nomasimbi goVajuda tava mu wizire, age haga za mokuronga, tava mu pura asi: “Yininke eyi ove nononkondo dalye ono kuyirugana? Ogu ga ku pa nonkondo edi hena yilye?” 24Jesus ta va limburura asi: “Name tani mu pura ko epuro limwe. Nsenesi nomu li limburura, name ngano nani mu tantera asi kwalye na di gwana nonkondo, edi nina kuruganesa nado yininke eyi. 25Oku lya tundire ekuho lyaJohanesa kupi? KwaKarunga ndi kovantu?” Makura awo tava liyongo asi: “Nsenesi tu tanta asi ‘KwaKarunga,’ makura age ngano ta tu pura asi, ‘Eyi mwa dililire kupura Johanesa yisinke nye?’ 26Ano tu tante asi, ‘Kovantu,’ ose woma kovantu, yeeyi navenye Johanesa kumuninka asi muporofete.” 27Makura tava limburura Jesus asi: “Walye.” Makura age ta va limburura asi: “Moomu ngoso, name si kapi nani mu tantera asi nononkondoke ani ruganesa yininke eyi.

Sifanekeso sovana vavali wokulisiga

28“Ngapi nani omu muna kugazara? Pwa kere mugara novana vendi vavali wovagara. Makura ta zi kwagumwe, ta ka mu tantera asi: ‘Munwange, zende o ka rugane mosikunino sange sovhinyu naina.’ 29Makura gwina ta limburura asi: ‘Nina nyoka.’ Konyima ntani ana livere, makura ta ka za ko. 30Kutunda opo ta zi kwamukwawo, ta ka mu tantera ngoroorwina. Age ta mu limburura asi: ‘Nhi, Tate, nani za,’ nye kapi ga zire ko. 31Pwava vavali, yilye ogu ga rugene po mpango zaguhwe?” Awo tava mu limburura asi: “Gomuhowo.” Makura Jesus ta va limburura asi: “Yosili nina kumutantera asi, vafutisi womutero novakadi worukehe yiwo ngava ka mu lihovera kuza moUntungi waKarunga. 32Johanesa kwa wizililire, a ya mu likide nzira zouhunga, nye one kapi mwa mu pulire. Nye vafutisi womutero novakadi worukehe awo va mu pulire. One kumona mwa yi mwene, nye kutunda opo kapi mwa litezwilire, mu mu pure.”

Sifanekeso sovanasikunino sovhinyu wovadona

33Jesus kwa tente asi: “Purakeneni ko sifanekeso simwe hena. Pwa kere nturagumbo, ogu ga tapekere sikunino sovhinyu. Makura ta tura ko ngumbu, ta tungu mo sikameno sovhinyu, ta tungire mo hena ruhungu. Makura ta si heheda vanasikunino, mwene makura ta zi ugenda. 34Ano eyi sina siki siruwo sokupya yiyimwa, makura ta tumu ko nye vakareli vendi kovanasikunino, va ya hare eyi yendi. 35Nye vanasikunino tava heda ko va kwate vakareli; gumwe tava mu toona, ogu gumwe tava mu dipaga, ano ogu mukwaawo tava toona nomamanya. 36Kutunda opo ta tumu hena vakareli wovanzi, kupitakana wopomuhowo. Nava tava ya va rugana ngoroorwina. 37Moruhura makura ta va tumine nye munwendi, ta tanta asi: ‘Munwange nava ka mu tara nonsenyawoma.’ 38Nye vanasikunino eyi va mona muna ta wiza, tava litantere‐tantere asi: ‘Yige mupingi googu, tu zeni, tu mu dipageni, tu guse upingwa wendi.’ 39Makura tava mu kwata, tava mu zugumine kesinya kwina lyosikunino, tava mu dipaga.

40“Ngapi nye omu nga ya va tengeneka vene owo vanasikunino, apa nga wiza mwenyasikunino?” 41Awo tava mu limburura asi: “Vantu wovadona ngoso nga ya va dipaga momudona, sikunino makura nga si pe vanasikunino peke, ava ngava mu retera yiyimwa posiruwo sayo.” 42Jesus ta va tantere asi: “Hamwa kara mu rese momatjangwa asi:

‘Emanya eli va zumbire vatungi,

yilyo lya kara emanya lyemekovhu.

Hompa ga yi rugana,

makura yiyo yina kututetura.’

43“Yipo nye nina kumutantera asi, Untungi waKarunga ngava u mu gusa, va u pe muhoko peke, ogu ngagu yima yiyimwa yawo. 44(Ano ogu nga gwira pemanya eli, nga myoka. Nye pogu ngali gwira, nga swaunuka.)”

45Apa va yi zuvhire yifanekeso yendi, vapristeli wovanene noVafalisayi tava yi nongonona asi, yiwo yina tamba eyi ana kutanta. 46Makura tava hetaikire ko asi va kwate Jesus, nye tayi va limbi mokutjira mbunga, ezi za mu tere asi age muporofete.

Currently Selected:

Mateusa 21: KWN

Highlight

Compare

Copy