Mateusa 20

Varugani wosikunino sovhinyu

1“Untungi weguru kwa lifana nanturagumbo, ogu ga menekerere ngura‐ngura zonene kokukakonga varugani womosikunino sendi sovhinyu. 2Makura tava lizuvhu komfuto zedenali limwe (poyiha yo — 20c), ta va tumu mosikunino. 3Movili zautano‐nane ta zi ko hena, ta ka gwana vamwe, awo vana sikama pomarandero, neisi vana kurugana. 4Makura age ta va tantere asi, ‘None zendeni mosikunino sange sovhinyu, nani ka mu futa mouhunga.’ 5Makura nawo tava ka za. Ano eyi ga za ko hena koyiha yovili zomurongo nambali nomontatu, ta ka rugana ngorooro. 6Movili zautano ta zi ko hena, ta ka gwana ko hena vamwe, awo vana sikama. Makura ta va pura asi, ‘Yisinke eyi muna sikamene apa ezuva mudima, one mwa hana kurugana yuma?’ 7Awo tava mu limburura asi, ‘Yeeyi sa ana dili kutukuta muntu.’ Age makura ta va tantere asi, ‘None zendeni mosikunino sange sovhinyu.’

8“Ano eyi lina siki pongurova, mwenyasikunino sovhinyu ta tantere muruganesi gwendi asi, ‘Zigida varugani, o ya va pe mfuto zawo. Hovera kwava vana hulilire, o ya hulire kwava vana howo.’ 9Ano ava va wizire movili zautano eyi va hedera po, nkenye ogu ta kwata edenali limwe. 10Ano nye ava va hovere eyi va wiza, tava gazara asi, awo nava va gweda ko. Nye nawo edenali limwe lyoolyo yilyo va kwete. 11Eyi va kwata ngoso, tava tangwinine nturagumbo, 12tava ninki asi: ‘Amesi ava vana hulilire, vili zimwe tupu vana rugana, nye ove yiyo ono va hetakanesa kumwe nose ava una kotongorora udigu wezuva noupyu walyo.’ 13Makura age ta limburura po gumwe asi: ‘Hewa, ame kapi nina kukurugana momudona. Nani kapi katu lizuvhu kedenali? 14Gusa po yoge o ze. Ame kuna hara kupa muhulilili ngwendi nyove. 15Nani ame nokuvhura si kuruganesa ko yininke yange moomu nina panga? Ndi nampo mfudu zina ku kara morwaunongo wange?’ 16Ngesi yimo ngava kara: wokuhulilira ngava kara wokuhova, ano wokuhova ngava kara wokuhulilira.”

Ediviso lyautatu lyorunyando

17Jesus makura ta katuka, a kanduke koJerusarema. Monzira yimo ga topwererere ko varongwa murongo navavali va likerere, makura ta va tantere asi: 18“Tareni, ose koJerusarema tuna vyuka. MunwaMuntu ngava mu gava kovapristeli wovanene nokovalirongi womatjangwa. Yiwo ngava mu tokwera konomfa, 19va mu gave kovapagani. Ngava ka mu zora meswau oku tava mu geragura, makura ngava ka mu pampare kosilivindakano, nye mezuva lyautatu nga ka vhumbuka koufe.”

Ehundiliro lyovana vaSebede

20Makura mukadaSebede ta mu wizire novana vendi, ta ya mu linyongamene, ta mu hundire yuma. 21Jesus makura ta mu pura asi: “Yisinke ono hara?” Gwina ta limburura asi: “Ninka asi vana vange ava vavali ngava ka hingire moUntungi woge, gumwe korulyo roge, ano ogu mukwawo korumoho roge.” 22Nye Jesus ta va limburura asi: “One kuhundira eyi mwa dira kudiva. Nkinda ezi ngani nwa none kuvhura kuzinwa ndi?” Awo tava limburura asi: “Nhi, kuvhura.” 23Makura ta va tantere asi: “Nhi, nkinda zange ngomu zi nwa, nye oko kuhingira korulyo nokorumoho ame nokuvhura si kukugava nyamwange, ako kwa wapera tupu vaava ga ku wapaikira Tate.”

24Apa va yi zuvhire owo murongo, makura tava handukire owo vantu namumbyendi. 25Makura Jesus ta va zigida, a ya va tantere asi: “Mwa diva asi, ohompa wonomuhoko kupangera nomuhoko dawo, ano vanene kudiruganesa nononkondo dawo. 26Nye kweni one ya ha kara ngoso. Ogu ga hara kukara munene pokatji keni, a kare mukareli gweni, 27ano ogu ga hara upitameho, a kare mupika gweni. 28NaMunwaMuntu nage si kapi ga wizira asi va ya mu kerere, age kwa wizira a ya kerere, a ya gave mwenyo gwendi, gu kare sizoweseso sovanzi.”

Jesus ta mahura meho govatwiku womoJeliko

29Apa va tundire moJeliko, emumbunga lyenene lya kweme Jesus. 30Va tare ko, vatwiku vavali vava, awo ha vana zi mokuhingira ponzira. Makura tava zuvhu asi Jesus ana kupita po, tava zigire asi: “Hompa, MunwaNdafita, tu fira nkenda!” 31Mbunga makura tazi va kava asi va mwene ko. Nye vena tava ziguruka kuzigira asi: “Hompa, MunwaNdafita, tu fira nkenda!” 32Makura Jesus ta sikama, ta va zigida, ta va pura asi: “Yisinke eyi muna harere nge nani mu rugana?” 33Avena tava mu limburura asi: “Hompa, tuna hara, meho getu o ga mahure!” 34Jesus makura tazi mu gwire nkenda, ta va kwatadara pomeho, meho gawo nare gana tondomoka, makura tava mu kwama.

Currently Selected:

Mateusa 20: KWN

Highlight

Compare

Copy