Mateusa 14

Nomfa daJohanesa Mukuhwi

1Moruveze oro mukukumo gwaJesus kwa sikire kwaHerodesa, hompa gwaGalireya. 2Makura age ta tantere varombe vendi asi: “Muntu ogo, googo Johanesa Mukuhwi, yige ga vhumbuka koufe. Yipo nye dina kuruganena nonkondo odo mwendi.”

3Yeeyi Herodesa kwa kwatesere Johanesa, tava mu manga, tava ka mu tura modorongo morwaHerodiyasa, mukadamukurwendi Filipusa. 4Johanesa nga kovekeda kutantera Herodesa asi: “Ove nokuwapa si kukwara ogo.” 5Herodesa kwa here kumudipaga, nye age kwa kere noutjirwe wovantu, morwa ngava gazara asi Johanesa muporofete.

6Nye mezuva lyosipito sehampuruko lyaHerodesa, munwaHerodiyasa gomukadi kwa danene udano pokatji kovanasipito; ou wa zire Herodesa komutjima. 7Yiyo nye ga mu tumbwidilire nomugano asi na mu pa nkenye tupu eyi na mu hundira. 8Morwezedagwiro lyozina ta tanta asi: “Pakereni nge apa porupasa mutwe gwaJohanesa Mukuhwi!” 9Hompa makura ta guwu unene. Nye morwamugano novanasipito ga tokwere asi va gu mu pe. 10Makura ta tumu, va ka tetere Johanesa mutwe moomo modorongo. 11Mutwe gwendi tava gu reta porupasa, tava gu pe mukadona, age nage ta gu twara kozina. 12Varongwa vendi makura tava wiza, tava ya gusa simpu, tava ka si vhumbika. Kutunda opo makura tava zi, tava ka yi dimbwira Jesus.

Jesus ta kutike emumbunga

13Apa ga yi zuvhire Jesus, makura ta tundu poopo mowato, ta zi kevega lya hana muntu, a ka likerere. Nombunga domoyitata tadi yi zuvhu, makura tava mu sikura pevhu. 14Apa ga hegekere Jesus, a mone mbunga zonene, ta va fire nkenda, makura ta verura vaveli vawo.

15Eyi lina kugomboka, varongwa vendi tava mu wizire, tava ya mu tantere asi: “Eli amesi evega lyomapuku, alyo hena nare line toko. Siga vantu va ze komambo, va ka rande nondya.” 16Nye Jesus ta va tantere asi: “Yinke eyi nava zira, nyone nomu va pa sakulya va lye.” 17Awo tava mu limburura asi: “Ose apa kuna kara po nonomboroto ntano nonomfi mbali tupu.” 18Makura age ta va tantere asi: “Di retereni nge oku.” 19Makura age ta tantere mbunga, zi hingire powayi. Ta gusa nomboroto odo ntano nonomfi mbali, ta ligamene keguru, ta pandura Guhwe, ntani ana kudibamagura, ta di pe varongwa vendi, va di gavere vantu. 20Navenye tava li tava kuta. Nye ruhupwa tava ru pongaike, tava zwida yikumba murongo nayivali. 21Ava va lire, kwa kere mayovi gatano govagara, nsene o dira kuvarera ko vakadi novanona.

Jesus ta gendi pomema

22Jesus makura ta tumangeda usimbu varongwa va perame movato, nkumwe va rute mesinya, siruwo esi na rekera vantu. 23Apa ga mene kuvarekera, makura ta rondo gelike kondundu, ta ka kanderera. Lya litokerere, age gelike oko. 24Ano eyi una ka sika wato pokatji kehanza lyekurudiva, mankumpi taga u zangagwida, yeeyi wa litwire mompepo. 25Momasasiku Jesus ta va wizire, age kuna kugenda pomema. 26Apa va yi mwene varongwa, age ta gendi pomema, tagu va pwaga, tava ninki asi: “Sinkisauka.” Makura tava takuma morwawoma. 27Nye Jesus ta genderere kuvatantera asi: “Gu mu dame, nyame, gwa ha mu pwaga.” 28Peturusa ta mu tantere asi: “Hompa, nsenesi nyove, ninka nge name ni gende pomema, ni wize koge.” 29Jesus asi: “Wiza!” Peturusa makura ta tundu mo mowato, ta gendi nage pomema, ta zi kwaJesus. 30Nye apa ga mwene epepo tali koro, tagu mu pwaga, ta vareke kudama, makura ta zigire asi: “Hompa, popera nge!” 31Ngapa katu popi, Jesus nare ana gonyonona kuwoko kwendi a mu nyangure, makura ta mu tantere asi: “O munepurogona ove, wa singanyekera yisinke?” 32Kutunda opo tava perama nye mowato, epepo nalyo tali litura. 33Ava va kere mowato, tava ya mu ligandere mevha oku tava tanta asi: “Hawe, yosili nani o MunwaKarunga.” 34Kutunda opo makura tava rutu nye, va ka hegeke koGenesareta. 35Vantu wosirongo oso apa va dimbwilire asi yige, tava tumu nontumi konomukunda dopopepi, va mu retere vaveli navenye. 36Awo kwa mu kwaterere rukusi asi a va sige, va gumagure kononyerera dosikoverero sendi. Nye nkenye tupu ogu ga gumine ko, ga verukire namunye.

Currently Selected:

Mateusa 14: KWN

Highlight

Compare

Copy