Mateusa 15
15
Veta zosintu
1Jesus kwa mu wizilire valirongi womatjangwa noVafalisayi womoJerusarema, va ya mu pure asi: 2“Ava varongwa woge, eyi ava tagurukire mpo zozinyakurwetu hena yisinke? Yeeyi apa ava li nondya, kapi ava likuhu komakwoko.” 3Age makura ta va limburura asi: “One po nye, yisinke omu tagurukire sipango saKarunga morwanompo deni? 4Karunga amesi kwa panga asi, ‘O fumadeke guho nanyoko,’ hena asi, ‘Ogu a tuku guhwe ndi zina, yige kufa.’ 5Nye one yimo omu tanta asi, ‘Nkenye ogu a tantere guhwe ndi zina asi, Eyi ya mu tumbukira yiyo nina kugava kwaKarunga, gwangesi asi kapi hena ga hepa kupakera guhwe nazina mbili.’ 6Yimo nye omu pepura nkango zaKarunga morwanompo deni. 7Kwa yi lipaka mwa yi lipaka!
Epumbo lyaJesaya nyone tupu lya tamba pokutanta asi:
8‘Ame Karunga muhoko ogu komarungu kwelike
agu fumadekesa nge,
nye nomutjima dawo ure name.
9Neisi ayi va kwafa pokufumadeka nge,
morwa awo kuronga Veta zosintu
ngwendi asi zaKarunga!’ ”
Eyi ayi nyateke muntu
10Makura Jesus ta zigida mbunga zovantu, ta ya zi tantere asi: “Purakeneni, one mu koneke nawa. 11Kapisi yeeyi ayi zi mokana yiyo ayi nyateke muntu, nye yeeyi ayi tundu mokana, yiyo ayi mu nyateke.”
12Varongwa vendi makura tava mu hedere, tava mu tantere asi: “Ono diva tupu asi Vafalisayi, apa vana zuvhu nkango ozo, kuna va koro?” 13Jesus ta va limburura asi: “Nkenye sikunwa, esi ga dira kukuna Tate gemeguru, ngava si dura mo. 14Va sigeni tupu: awo kwa twika, yiyo hena ava pitisire vatwiku.” 15Makura Peturusa ta mu ninki asi: “Tu fatwilira sifanekeso esi.” 16Nye Jesus ta va tantere asi: “Nani none si simpe mutupu egano? 17Simpe nokuyikwata si asi, eyi ayi zi mokana, mezimo tanko ayi zi, ntani nye vana kuyipwagesa mo. 18Nye eyi ayi tundu mokana, komutjima ayi tundu, eyi yiyo nye ayi nyateke muntu. 19Yeeyi momutjima yimo amu tundu magazaro gomadona nedipago noruhonda nederengo nowidi, noyimpempa nokuswaura Karunga. 20Eyi yiyo ayi nyateke muntu. Ano nye eyi yokulya nomawoko aga vana dili kukuhwa, kapisi yiyo ayi nyateke muntu.”
Epuro lyomukadi goMukanani
21Kutunda opo Jesus makura yipo nye ga zire koyiha yoyirongo oTirusi naSidoni. 22Makura mukadi gumwe goMukanani gomosirongo sooso, ta mu zigire asi: “Hompa, MunwaNdafita, fira nge nkenda! Munwange gomukadi ta hepa unene kompepo zondona.” 23Nye Jesus nonkango si zeezi zimwe ga mu limbwilire. Makura varongwa vendi tava mu hedere, tava mu tantere asi: “Mu ninka a ze kwi, yeeyi kuna kutukwama‐kwama, ta tu zogerere.” 24Nye age ta limburura asi: “Ame kwa tuma nge ni wizire nonzwi deedi da zumbana momuhoko gwaIsraeli.” 25Mukadi age kwa wiza tupu, ta ya ligandere mevha lyendi oku ta uyunga asi: “Hompa, kwafa nge!” 26Nye age ta tanta asi: “Eyi yokugusa mboroto zovanona, o zi zugumine nombwagona, kapisi yiwa.” Gwina mukadi ta tanta asi: 27“Ani yimo Hompa, nye tumbwagona nato kulya sa ruvhugunyu, oru aru kukumuka kositafura sohekurwato.” 28Makura Jesus ta mu tantere asi: “Mukadi ove, epuro lyoge enene unene madu, yi ku horokere moomu ono hara.” Ruveze rooro munwendi nare ana veruka.
Maveruro govantu wovanzi
29Eyi ga tunda opo Jesus, makura ta wiza kekurudiva lyaGalireya. Makura ta rondo kondundu, ta ka hingira. 30Makura mbunga zovantu wovanzi tazi mu wizire, zi rete yirema novazonauki noyipuru‐puru navamwe wovanzi ngoso. Tava ya va mu tulire konompadi, makura age ta va verura. 31Mbunga kwa tetukire unene, yipuru‐puru kuna kuuyunga, vazonauki vandjewa‐ndjewa, yirema kuna kulyateka kugenda, vatwiku kuna kumona. Makura tava fumadeke Karunga gwaIsraeli.
Ekutiko lyovantu mayovi gane
32Jesus ta zigida varongwa vendi kwendi, ta va tantere asi: “Mbunga ezi ame kuna kuzifira nkenda, morwa mazuva gatatu vana didimike va kare pwange, nye kupira natjaki. Ame kapi nina hara asi va tengure ngorooro nonzara zawo, kuvhura tava fire sikatji.” 33Nye varongwa vendi tava mu tantere asi: “Vantu tuna kara momburundu zangesi, kugwana kupi nomboroto dononzi ngano di kutike mbunga zokuhura apa?” 34Makura Jesus ta va pura asi: “Nomboroto dingapi muna kara nado?” Vena tava mu limburura asi: “Ntano‐nambali, notumfi tungapi tupu.” 35Age makura ta tantere mbunga, zi hingire pevhu. 36Ta gusa odo nomboroto ntano‐nambali nonomfi. Eyi ga mana kupandura Guhwe, ta di bamagura ta di pe varongwa vendi, tava di gavere vantu. 37Navenye kwa lya tava kuta. Pokupongaika ruhupwa tapa zura yikumba yitano‐nayivali. 38Vantu ava va kere po va lire, mayovi gane govagaragara mokugusa ko vakadi novanona.
39Jesus ntani nye ana rekere vantu va tengure, makura age ta perama mowato, ta zi komukunda gwaMagadani.
Currently Selected:
Mateusa 15: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
