Rukasa 4

Jesus tava mu heteke

1Jesus kwa tundire koJorodana, age ana zura Mpepo zoKupongoka. Azo tazi mu twara momburundu, 2omu ga ka mu hetekerere Satana mazuva nomurongo ne. Mazuva nagenye ogo, kapi ga lire nondya. Nye eyi ga pwa, makura nzara tazi mu kwata.

3Makura Satana ta tantere Jesus asi: “Nsene asi o MunwaKarunga, ninka mamanya aga ga lisitunuke nomboroto no!” 4Nye Jesus ta mu limburura asi: “Kwa tjanga va tjanga asi, ‘Muntu kapi a paruka komboroto zelike, nye kuparuka kwankenye nkango ezi azi tundu mokana kaKarunga.’ ”

5Makura Satana ta mu rondeke kondundu zonde, ngapa katu popi nare ana mu likida mauntungi nagenye gouzuni. 6Satana ta mu tantere asi: “Tani ku pe nonkondo nadinye edi nomauwa nagenye aga, yeeyi oyo kwa yi pa nge ni yi gave kwankenye ogu nina hara. 7Ano nsene asi o tongamena nge, ngano nayinye eyi tayi kara yoge.” 8Nye Jesus ta mu limburura asi: “Kwa tjanga asi, ‘O tongamene Hompa Karunga goge gelike oku to mu kerere makura!’ ”

9Kutunda opo Satana ta mu twara koJerusarema, ta ka mu rondeka keguru lyoruhungu rontembeli, makura ta mu tantere asi: “Nsene asi o MunwaKarunga, vatukira pevhu. 10Yeeyi kwa tjanga asi, ‘Age nga tantera vaengeli vendi va ku takamese.’ 11Hena asi, ‘Awo ngava ku pakera mbili, neisi ngo lipundura mpadi zoge komamanya.’ ” 12Jesus ta mu limburura asi: “Kwa tjanga hena asi, ‘Walye o heteke Hompa Karunga goge.’ ” 13Satana kwa mana tupu kuheteka Jesus, makura ta tundu po tanko pwendi.

Jesus ta vareke yirugana yendi moGalireya

14Jesus makura ta tengura koGalireya nononkondo doMpepo zoKupongoka. Mbudi zokumuhamena kwa lihanenene monomukunda nadinye. 15Age nga rongo monosinagoge dawo, makura navenye tava mu tangauka.

Jesus tava mu nyoka moNasareta

16Makura Jesus ta zi moNasareta, omu ga kulilire. Ano mEsabata ta zi mosinagoge moomu ga yika, makura ta sikama a rese. 17Age kwa mu pere buke zomuporofete Jesaya. Eyi ga zi penuna, makura ta litu pevega eli va tanta asi:

18“Mpepo zaHompa pozili pwange,

yeeyi age kwa gwaveka nge asi ani udisire

vahepwe Mbudi zoNgwa.

Age kwa tuma nge asi ani zuvhisire

nonkwate emanguruko,

ano vatwiku emahuko,

ni ya hepurure ava va kara moruhepo,

19oku tani divisa mumvho ogu

nga parura Hompa vantu vendi!”

20Age makura ta zi kudumike ozo buke, ta zi gava komukareli, ta zi, ta ka hingira, nye navenye ava va kere mosinagoge, meho kwendi kwelike gana nwike. 21Age makura ta va tantere asi: “Naina etjangwa eli lina siki mo, nanyamweni muna lizuvhire ko.” 22Navenye kwa mu pandadekere, tadi va tetura nonkango donongwa edi da tundire mokana kendi, makura tava tanta asi: “Nani kapisi yige munwaJosefa ogu?” 23Age ta va limburura asi: “One nomu tantera nge nawa‐nawa sisewe esi asi, ‘Ndokotora, liverura nyamoge!’, hena asi, ‘Nayinye eyi twa zuvha ya horoka moKaperenaumu, nomositata soge somvharerwa yi rugana mo.’ ” 24Age ta tanta asi: “Yosili kutupu muporofete ogu ga kara nekuto mosirongo sawo. 25Yosili nina kumutantera asi, vafisavaya vawo vanzi va kere moIsraeli age Eliya pweli, apa lya rondere eguru nomumvho ntatu nomakwedi gatano‐nakumwe, apa lya wizire erumbu lyenene mosirongo nasinye. 26Nye Eliya kowo navenye kapi va mu tumine ko, kukamutuma nye komufisayendi gokoSarufata moSidoni. 27Ano vanayingondwe ava va kere moIsraeli age muporofete Elisa pweli, vanzi. Powo nagumwe si va verwire po, kukaverura po Namani goMusiliya.” 28Navenye ava va kere mosinagoge, apa va yi zuvhire eyi, makura tava handuka unene. 29Ano awo makura tava mu tjida mo mositata sawo, tava mu twara kononkenkera dondundu ezi va tungira sitata sawo, asi va mu zundwire pevhu. 30Nye ta piti pokatji kawo, ta ka za.

Mugara gompepo zondona

31Jesus makura ta gurumuka ta zi koKaperenaumu, sitata somoGalireya, ta rongo vantu mEsabata. 32Vantu kwa tetukire unene kerongo lyendi, yeeyi erongo lyendi kwa kere lyononkondo. 33Nye mosinagoge mwa kere mugara ogu ga kere nompepo zondona zokunyata. Age makura ta zigire unene asi: 34“Hi! Ose noge hena pwasinke, ove Jesus goMunasareta? Nani ove kuna wizire o ya tu zonagure po? Ame na ku diva azi ove o Mupongoki gwaKarunga!” 35Jesus ta tugumukire mpepo asi: “Mwena, tunda mo mogo muntu?” Azo makura tazi mu gandere pokatji kawo, tazi tundu mo mwendi azo za hana kumurugana momudona. 36Navenye tava tetuka, tava lipura‐pura asi: “Nkango musinke ezi, zokuninka nye kutantera tupu nompepo dokunyata nepangero nononkondo, nye makura tadi tundu mo?” 37Makura mukukumo gokuhamena Jesus tagu lihanene mosirongo mudima.

Jesus ta verura vantu wovanzi

38Jesus makura ta katuka ta pwaga mo mosinagoge, ta ka hwilira membo lyaSimoni. Ngumweyi zaSimoni kwa verere unene uvera womorutu, awo makura tava mu mu tantere. 39Jesus ta zi, ta ka mu sikamena, ta tugumukire uvera, makura tau mu tundu. Poopo ngoso mukadi ta katuka, ta va ruganene ezumbu.

40Eyi lina gomboka, tava mu retere vaveli wovanzi womauvera peke‐peke. Jesus makura ta va kambeke mawoko gendi, ta va verura. 41Nompepo donondona nado kwa tundire movantu wovanzi oku tadi zigire asi: “Ove Kristusa, MunwaKarunga!” Age ta di tugumukire a di nyokere asi da ha uyunga, yeeyi da mu divire asi yige Kristusa.

Jesus ta udisa moJudeya

42Eyi kwa sa ko, Jesus makura ta tundu mo a ze kevega lyomaporeza. Nye mbunga tazi mu papara tazi ka mu gwana, azo tazi mu silike asi ga ha tunda po pwawo. 43Nye age ta va tantere asi: “Ame nyame tupu kukaudisira hena moyitata peke Mbudi zoNgwa zoUntungi waKarunga, yeeyi yiyo va tumina nge.” 44Age makura yiyo nga udisa monosinagoge domoGalireya.

Currently Selected:

Rukasa 4: KWN

Highlight

Compare

Copy