Rukasa 3

Eudiso lyaJohanesa Mukuhwi

1Momumvho gomurongo nantano gepangero lyahompa gwaRoma, edina lyendi Tibeliusi, age Pontiusi Piratusa mupangeli gwaJudeya ga kere, Herodesa hompa gwaGalireya, ano mumbyendi Filipusa mupangeli gwaItureya naTarekonitusa, ano Lisaniya mupangeli gwaAbirene, 2ano oAnasi naKayifasa yiwo vapristeli wovanene, yipo da wizire nonkango daKarunga kwaJohanesa zaSakaliya age momburundu. 3Johanesa nga gendi mwaza nomukunda daJorodana oku ta udisa asi: “Litezurureni, va mu kuhwe, makura Karunga a dongonone po nonzo deni.” 4Moomu va tjanga mobuke zomuporofete Jesaya asi:

“Ezwi kuna kuzigira momburundu asi:

‘Wapaikeni nkungwasirongo zaHompa,

mu lyalyakanese nonzira dendi!

5Nkenye edamenena va li fofere,

ano nkenye ndundu nokandundugona va yi mbandagure.

Nonzira dokupenga va di vyukise,

doyinganga va di lyalyakanese.

6Vantu navenye ngava mona eparu lyaKarunga!’ ”

7Johanesa makura ta tantere vantu ava va wizire kwendi a ya va kuhwe asi: “One mazoka, valitundakani wonombaroka. Yilye ogu ana mu tantere asi mu henduke ehandu lyenene lyaKarunga eli lina kuwiza? 8Omu rugane eyi yokumuhorora asi muna litezurura! Mwa ha tameka kulipopera nyonevene asi, ose ruvharo rwaAbirahamu! 9Ame tani mu tantere asi, Karunga kuvhura kuninka mamanya aga, ga kare ruvharo rwaAbirahamu. Nye nzimbu nare vana zi tura pedi lyoyitji. Nkenye sitji esi asi dili kuyima yiyimwa yoyiwa, ngava si komangera po, tava si zugumine momundiro.”

10Vantu makura tava mu pura asi: “Ose no, yinke natu rugana?” 11Ano Johanesa ta va limburura asi: “Ogu ga kara noyikoverero yivali, a pe ko ogu gorutu‐rutu, ano ogu gonondya nage ngosikwawo.” 12Vafutisi womutero nawo tava zi asi va ka va kuhwe, makura tava mu pura asi: “Murongi, ose ko no, yinke natu rugana?” 13Age ta va limburura asi: “Walye omu futisa yokupitakana pweyi va mu tantera.” 14Vakwayita nawo tava mu pura asi: “Ose nye no yinke natu rugana?” Age ta va tantere asi: “Nokuhakana si vantu ndi omu guse meyengwerero, yi mu gwanene eyi ava mu futu.”

15Endindiro lyenene tali tameke kupinduka movantu. Awo tava tameke kulimbilirwa kombinga zaJohanesa, tava gazara asi nampo yige Mesiyasa. 16Johanesa makura ta limburura navenye asi: “Ame kuna kumukuhwa nomema, nye ogu ana kuwiza ga pitakana nge mononkondo. Ame kapi na wapera kuditura tuliva tononkaku dendi. Age nga ya mu kuhwa noMpepo zoKupongoka nomundiro. 17Sizereso mokuwoko kwendi sa kara. Age nga wapeka rupare rwendi. Rukokotwa nga ru pungura mosihete, ano rungu nga ru swakerera momundiro ogu gwa ha dimi!”

18Johanesa kwa korangedere hena vantu mwapeke momunzi pokuvaudisira Mbudi zoNgwa. 19Nye Johanesa kwa uyungilire hompa Herodesa a mu vyuke, yeeyi age kwa kwere Herodiyasa, mukadamukurwendi Filipusa, neyi nga rugana hena yimwe yoyinzi yoyidona. 20Sosidona hena esi ga gwedererere ko Herodesa, sokutura Johanesa modorongo.

Jesus tava mu kuhu

21Eyi va pwa vantu navenye kuvakuhwa, naJesus nage vana mu kuhu, a hokwe kukanderera, makura eguru tali zeguruka. 22Mpepo zoKupongoka zokufana ngwendi nkutji tazi mu tembere. Ano ezwi tali tundu meguru, tali tanta asi: “Ove Munwange ogu na hara, wa za nge komutjima.”

Malitundakano gezimo lyaJesus

23Jesus apa ga tamekere sirugana sendi, ado nomvhura dendi nomurongo ntatu. Age kwa kere munwaJosefa zaEli, yimo ngava mu gazarere vantu. 24Eli munwaMatate, Matate zaRevhi, Revhi zaMereki, Mereki zaJona, Jona zaJosefa, 25Josefa zaMatatiya, Matatiya zaAmosa, Amosa zaNahumu, Nahumu zaEsili, Esili zaNagayi, 26Nagayi zaMati, Mati zaMatatiya, Matatiya zaSemeyi, Semeyi zaJoseke, Joseke zaJoda, 27Joda zaJowanani, Jowanani zaResa, Resa zaSerubabeli, Serubabeli zaSeratiyeli, Seratiyeli zaNeli, 28Neli zaMereki, Mereki zaAdi, Adi zaKosama, Kosama zaElimodamu, Elimodamu zaEra, 29Era zaJosuwa, Josuwa zaEliyasera, Eliyasera zaJolimu, Jolimu zaMatate, Matate zaRevhi, 30Revhi zaSimiyoni, Simiyoni zaJuda, Juda zaJosefa, Josefa zaJonamu, Jonamu zaEliyakimu, 31Eliyakimu zaMeleya, Meleya zaMena, Mena zaMatata, Matata zaNatani, Natani zaNdafita, 32Ndafita zaJese, Jese zaObete, Obete zaBowasa, Bowasa zaSalimoni, Salimoni zaNasoni, 33Nasoni zaAminadabu, Aminadabu zaAdimina, Adimina zaAreni, Areni zaHesironi, Hesironi zaPeresi, Peresi zaJuda, 34Juda zaJakopo, Jakopo zaIsaka, Isaka zaAbirahamu, Abirahamu zaTera, Tera zaNahore, 35Nahore zaSaruki, Saruki zaReyu, Reyu zaPareki, Pareki zaEbera, Ebera zaSara, 36Sara zaGainani, Gainani zaArupagadi, Arupagadi zaSema, Sema zaNowa, Nowa zaRameki, 37Rameki zaMatusara, Matusara zaHenoka, Henoka zaJaredi, Jaredi zaMaharareli, Maharareli zaKainani, 38Kainani zaEnosi, Enosi zaSete, Sete zaAdamu, Adamu zaKarunga.

Currently Selected:

Rukasa 3: KWN

Highlight

Compare

Copy