Rukasa 2

Ehampuruko lyaMuzowoli

1Momazuva gena hompa gwaRoma, edina lyendi Augusitusi, ga penge mpangera asi uzuni mudima u litjangese mutero. 2Malitjangeso aga gomuhowo kwa kere po, age Kireniusi mupangeli gwaSiliya. 3Makura navenye tava zi va ka litjangese, nkenye ogu mositata sawo.

4Josefa nage ta katuka moGalireya, mositata saNasareta, a ze koJudeya, kositata sahompa Ndafita esi ava tumbura asi Beterehema, morwa age gezimo lyaNdafita ga kere. 5Kwa zire va ka litjangese naMariya ogu ga vandekerere. Siruwo oso age nezimo. 6Ano awo hava karera moBeterehema, siruwo sokuhampuruka kwendi naso sina siki mo. 7Ta hampurura mbeli zendi gomumati, ta mu dingire momakehe, makura ta mu rangeke mekungu lyokulira yimuna, morwa kapi va gwene nzugo membo lyovanangenda.

Vasita wononzwi novaengeli

8Momukunda ogo mwa kere vasita ava ngava kungu nonzwi dawo mezana masiku. 9Va liharuka ko, muengeli gwaHompa ana sikama pwawo, ano uyerere waHompa awo kuna kupaima pwawo. Awo kwa tukukire, tagu va pwaga unene. 10Nye muengeli ta va tantere asi: “Mwa ha tjira! Yeeyi tareni, ame kuna mu retere Mbudi zoNgwa ezi ngazi reta ruhafo rorunene kovantu navenye. 11Gaaga masiku ngesi aga vana mu hampurukire Muzowoli, yige Kristusa, Hompa, mositata saNdafita. 12Yidiviso yokumudimbwilisa yeyi: nomu ka gwana Munona vana dingire momakehe, age kuna mu rangeke mekungu lyokulira yimuna.”

13Va liharuka ko, mbunga zovakwayita vemeguru vana lihangwire nogo muengeli, makura tava dimbi efumadeko kwaKarunga asi:

14“Efumano kwaKarunga meguru‐guru!

Mpora pevhu kovantu ava ga hara!”

15Va tunda po vaengeli va ze meguru, vasita makura tava litantera‐tantere asi: “Tu zeni koBeterehema, tu ka tareni eyi yina horoka ko, eyi ana tu dimbwire Hompa.” 16Tava genderere ko, makura tava ka gwana oMariya naJosefa nomukeke ogu ana rara mekungu lyokulira yimuna.

17Vasita apa va yi mwene, makura tava va tantere eyi ga va tanterere muengeli yokuhamena mukeke ogu. 18Navenye ava va zuvhire eyi va sansekere vasita, kwa komokere. 19Nye nonkango nadinye edi Mariya age ta di pungura oku ta di teda momutjima gwendi. 20Vasita makura tava tengura oku tava fumadeke nokuhamberera Karunga kweyi nayinye eyi vana zuvhu neyi vana mono, moomu ka va tantere muengeli.

Jesus tava mu ruku

21Eyi ga pita po mazuva gatano‐nagatatu, asi ngano va ka rugane munona yovamba, makura tava mu ruku Jesus, edina lyeeli ga mu rukire muengeli, age simpe kapi ana horoka mo mosivharero sozina.

Jesus tava mu twara montembeli

22Apa ga pwire mazuva gokulikuhura kwawo poVeta zaMosesa, makura tava twara Jesus koJerusarema, va ka mu monekese kosipara saHompa, 23moomu va tjanga moVeta zaHompa asi: ‘nkenye munona gomumati gombeli va mu pongwere Hompa.’ 24Kwa here hena kuzamba nomputukuwa mbali ndi nonkutjigona mbali, moomu va panga moVeta zaHompa.

25Ano moJerusarema mwa kere mugara, edina lyendi Simiyoni. Mugara ogu kwa kere muhungami, age hena mutjiliKarunga, age kwa ndindilire ezoworo lyaIsraeli. Mpepo zoKupongoka hena kwa kere pwendi. 26Ano Mpepo zoKupongoka kwa mu horwerere asi kapi nga fa, age ga hana kumona Kristusa gwaHompa. 27Mpepo zoKupongoka makura tazi mu twara montembeli. Ano vakurona apa va retere mo munona Jesus, va ya mu rugane moomu za tanta Veta, 28Simiyoni nage ta mu gusa, makura ta hamberere Karunga asi:

29“Hompa, ntaantani siga nye muntu goge,

a ze nombili moomu wa tantere.

30Yeeyi meho gange gana mono eparu lyoge,

31eli wa rugana komeho zonomuhoko mudima,

32uzera wokuminikilira vapagani nzira zoge,

nefumano lyomuhoko goge Israeli.”

33Oguhwe nozina kwa va tetwire edi va mu uyungire. 34Simiyoni makura ta va swere, ta tantere ozina Mariya asi: “Tara, ogu munona kwa mu tulira po kupundura nokukatwisa wovanzi moIsraeli nosidiviso esi ngava ka si patana wovanzi. 35Ano rufuro ngaru tomona nomutjima goge, magazaro gonomutjima dononzi asi ngaga horoke poruzera.”

36Ana, muporofete gomukadi, munwaFanuera gomorudi rwaAseli, nage yimo ga kere. Age kwa kere mukurupe unene. Kutunda apa va mu kwere, age mukadona, kwa kere nayendi nomumvho ntano‐nambali. 37Siruwo oso age mufisayendi gonomumvho nomurongo ntano — nantatu nonomumvho ne. Age kapi nga tundu mo montembeli, nye nga kerere Karunga masiku nomutenya, a kanderere oku ta dilire nondya. 38Siruwo sooso nage ta wiza mo, ta fumadeke Hompa, age ta uyunga yokuhamena munona ogu kwanavenye ava va ndindira ezoworo lyaJerusarema.

Etenguro koNasareta

39Apa va sikisire mo nayinye moomu za tanta Veta zaHompa, makura tava tengura koGalireya, kositata sawo Nasareta. 40Munona makura ta kuru, ta koro, ta zura nondunge, ano nkenda zaKarunga kwa kere nendi.

Munona Jesus montembeli

41Vakurona vaJesus ngava zi nkenye mvhura kosipito soPaska koJerusarema. 42Ano Jesus apa ga sikire konomumvho murongo — nambali, makura tava zi kosipito koJerusarema moomu mwanare.

43Ano mazuva gosipito eyi ga pwa, makura tava tengura kembo, nye Jesus ta kara moJerusarema, vakurona vendi nkara dawo. 44Awo kwa gazarere asi mweli mombunga, makura tava gendi ezuva mudima, makura ntani nye vana kumupapara mwava vekoro lyendi nomovandambo. 45Ano apa va dilire kumugwana, makura tava tengura koJerusarema va ka mu papare.

46Mezuva lyautatu tava ka mu gwana montembeli, age kuna hingire mokatji kovarongi, ta va purakene oku ta va puragere. 47Navenye ava va mu purakenene, kwa va tetwire nondunge dendi nomalimbururo gendi. 48Eyi va mu mona vakurona vendi, makura tayi va tetura. Ozina tava mu tantere asi: “Munwange, yinke ono tu ruganene ngesi? Tara, oguhwo name omu tuna ku papara nompwagetjima.” 49Jesus ta va tantere asi: “Yinke eyi muna paparere nge? Kapi mwa diva asi, nyame tupu kukara mweyi yaTate ndi?” 50Nye awo kapi va zi kwete egano nkango ezi ga va tanterere.

51Jesus makura ta gurumuka ta zi kumwe nawo koNasareta, yiyo nga va zuvhu. Nye ozina tava pungura yininke nayinye eyi momutjima gwawo. 52Ano Jesus ta kuru moukonentu nomorutu nomokuwapera Karunga novantu.

Currently Selected:

Rukasa 2: KWN

Highlight

Compare

Copy