Rukasa 20

Jesus tava mu pura yononkondo dendi

1Ezuva limwe age Jesus haga za mokuronga vantu montembeli oku ta udisa Mbudi zoNgwa, makura vapristeli wovanene novalirongi womatjangwa nomasimbi tava mu wizire, 2tava mu pura asi: “Tu tantera asi, yininke eyi nononkondo musinke o yi rugana, nogu ga di ku pa nonkondo edi asi yige yilye?” 3Jesus ta va limburura asi: “Name tani mu pura ko sininke simwe, mu tantere nge asi, 4ekuho lyaJohanesa kwa tunda keguru ndi kovantu?” 5Makura awo tava liyongo asi, “Nsene tu tanta asi, ‘Keguru,’ makura age ngano na tu pura asi, ‘Eyi mwa dilire kumupura, yisinke nye?’ 6Ano nsene tu tanta asi, ‘Kovantu,’ ngano vantu navenye nava tu dipaga nomamanya, yeeyi Johanesa va mu diva nawa‐nawa asi muporofete.” 7Awo makura tava limburura Jesus asi kapi va diva oku lya tunda. 8Jesus makura ta va limburura asi: “Moomu ngoso, namesi kapi nani mu tantera asi nononkondoke ani ruganesa yininke eyi.”

Sifanekeso sovanasikunino sovhinyu wovadona

9Jesus makura ta sansekere vantu sifanekeso esi asi: “Pwa kere mugara gumwe ogu ga tapekere sikunino sovhinyu, makura ta si heheda vanasikunino, makura ta zi ugenda a ka kare ko siruwo. 10Ano eyi sina siki mo siruwo sokupya yiyimwa, makura ta tumu ko nye mukareli kovanasikunino, asi va ka mu pe ko mandjembere gamwe. Nye vanasikunino tava ka mu toona, tava mu tengwida mawoko‐woko. 11Ga ninka ta tumu ko hena mukareli gwapeke. Nage tava ka mu toona, tava mu rugana yifisamuga, makura tava mu tengwida mawoko‐woko. 12Age ta tumu ko hena gwautatu, nogu nage tava ka mu rwadeka, tava mu tjida. 13Mwenyasikunino sovhinyu ta lipura asi, ‘Omu nani rugana ngapi? Tani tumu ko munwange ogu na hara, mpamwe nava ka mu fa nse.’ 14Nye vanasikunino eyi va mu mona, tava litantera‐tantere asi, ‘Yige mupingi googo, tokweni tu mu dipageni, makura upingwa u kare wetu.’ 15Awo makura tava mu zugumine kesinya kwina lyosikunino, tava mu dipaga.

“Mwenyasikunino ngapi nye omu nga ya va tengeneka? 16Age nga wiza ta dipaga vanasikunino owo, makura sikunino ta si gava kwavamwe.” Vantu apa va yi zuvhire, tava tanta asi: “Nampili kuna manga!” 17Nye Jesus ta va tara, makura ta tanta asi: “Ngapi omu ayi tanta eyi va tjanga asi:

‘Emanya eli va zumbire vatungi,

yilyo lya kara emanya lyekekovhu.’

18“Ano ogu nga gwira pemanya eli, nga myoka. Nye pogu ngali gwira, nga swaunuka.”

Yomutero

19Vapristeli wovanene novalirongi womatjangwa tava hetaikire ko poopo kumukwata, yeeyi va divire asi age kuna kuuyunga sifanekeso esi sina va hamene, nye tayi va limbi mokutjira muhoko. 20Awo makura tava mu nomene, tava tumu ko nondadi dokulipaka kouhungami, asi va mu kwatere po mononkango, va mu gave komupangeli asi a mu pangure. 21Awo makura tava mu pura asi: “Murongi, twa diva asi eyi o uyunga oku to rongo youhunga. Twa diva asi kapi o tara kekuto lyomuntu, nye ove kuronga nzira zaKarunga mousili. 22Enye va yi tu pa tupu yokufutira hompa gwaRoma mutero, ndi hawe?” 23Nye Jesus ta nongonona magano gawo, ta va pura asi: “Eyi muna kuhetekera nge yinke? 24Likideni nge si simaliva. Efano eli nedina eli va tjanga po lyalye?” Awo tava limburura asi: “Lyahompa gwaRoma.” 25Makura age ta va tantere asi: “Nhi, omu futire hompa gwaRoma eyi ya mu hamena, ano Karunga nage yeeyi ya mu hamena.” 26Awo kwa va sumpilire kumukwata pomeho zombunga, tava mwena teete, lina va tetura elimbururo lyendi.

Vasadukayi nevhumbuko lyovafe

27Vasadukayi vamwe ava ngava tanta asi kutupu evhumbuko lyovafe, tava wiza kwaJesus, 28tava mu pura asi: “Murongi, Mosesa kwa tu pa Veta asi, ‘Mugara gokukwara nsene ana fu, nye age ga hana kusiga po vana, mumbya gogo mugara a kware mukadi ogo, a retere po mukurwendi vana.’ 29Pwa kere vagara vatano‐navavali mwazinyawo naguhyawo. Mbeli ta kwara mukadi, ta fu, age ga hana kusiga po vana. 30Sikwamambeli nage ta kwara mukadi ogo, ta fu ga hana kusiga po vana. 31Gwautatu nage ta mu kwara, dogoro moutano‐nauvali wawo. Navenye kwa fire va hana kusiga po vana. 32Moruhura mukadi nage ta fu nye. 33Pevhumbuko mukada yilye nga kara? Yeeyi navenye moutano‐nauvali wawo yige va kwere.”

34Jesus ta va limburura asi: “Vantu womouzuni ou kulikwara‐kwara. 35Nye ava wa wapera uzuni wokomeho nevhumbuko lyovafe, kapi ava likwara‐kwara. 36Yeeyi awo kapi ngava fa hena, awo ngava fana ngwendi vaengeli, awo hena vana vaKarunga, morwa awo vevhumbuko. 37Yokuhamena evhumbuko lyovafe, Mosesa ga yi horora mesanseko lyosihwa somega, omu ga tumbura Hompa Karunga asi ‘Karunga gwaAbirahamu naKarunga gwaIsaka naKarunga gwaJakopo.’ 38Age kapisi Karunga govafe, Karunga govanamwenyo, yeeyi navenye yige va kerera po nomwenyo.” 39Valirongi vamwe womatjangwa tava tanta asi: “Murongi, douhunga ono uyunga.” 40Kutunda opo nagumwe asi hena ga mu lipepekerere asi a mu pure.

Epuro lyokuhamena Mesiyasa

41Jesus ta va pura asi: “Ngapi nye omu nava uyunga asi Mesiyasa munwaNdafita? 42Yeeyi Ndafita mwene kwa mu tumbura moBuke zoMapisarome asi:

‘Hompa kwa tantere Hompa gwange asi,

Hingira korulyo rwange,

43dogoro noku ngani ninka nonkore doge

di kare ulyatero wonompadi doge.’

44“Ano nye nsenesi Ndafita kumutumbura asi ‘Hompa,’ ngapi nye omu na kara‐kara hena munwendi?”

Jesus ta rondora varongwa morwavalirongi womatjangwa

45Mbunga azo haza za mokupurakena, makura Jesus ta tantere varongwa vendi asi: 46“Omu takamese valirongi womatjangwa, ava va hara kudwara yikoverero yoyire nomalikunda‐kundo gopomarandero nomavega gomawa po monosinagoge nomavega govanekuto moyipito. 47Awo kumanena vafisavaya emona lyawo, awo kulininkisa mokukanderera makanderero gomare. Vangesi ngava va pangwira momudigu.”

Currently Selected:

Rukasa 20: KWN

Highlight

Compare

Copy