Rukasa 19

Jesus naSakeusa

1Jesus kwa wizire moJeliko a pitakane. 2Amo mwa kere mugara gumwe, edina lyendi Sakeusa, mukurona govafutisi womutero, gongawo. 3Age kwa hetekere kumona Jesus asi yige yilye. Nye ya mu limbire morwambunga, yeeyi age kwa kere musupi komusika. 4Age makura ta duka a pite komeho, ta ka ronda koukuzu, asi nkumwe a wape kumona Jesus, yeeyi yipo na ka likura poopo. 5Ano Jesus apa ga wizire pevega opo, ta kankuka, ta mu mono. Makura ta mu tantere asi: “Sakeusa, genderera kuhumburuka ko, yeeyi naina membo lyoge na kukakara.”

6Sakeusa ta genderere kuhumburuka, makura ta mu tambura nehafo. 7Ano navenye apa va yi mwene, tava vhunguta asi: “Kuna zi kembo lyomugara gomunanzo.” 8Nye Sakeusa ta sikama, makura ta tantere Hompa asi: “Tate, tara, harufa zemona lyange tani zi pe vahepwe. Nsene pweli ogu na hakana yuma, tani yi mu tengwidire pwarune.” 9Jesus ta mu tantere asi: “Naina membo eli muna wiza eparu, morwa mugara ogu nage munwaAbirahamu. 10Yeeyi MunwaMuntu kwa wizira asi, a ya papare ava va zumbana oku ta va parura.”

Sifanekeso soyimaliva yongorodo

11Hava za mokupurakena eyi, Jesus ta va sansekere po hena sifanekeso simwe, morwa pepi naJerusarema va kere, neyi va gazarere asi Untungi waKarunga pokuwiza una kerere. 12Makura ta tanta asi: “Pwa kere mugara gumwe gemezimo lyovazuni, ga zire kosirongo sokoure, va ka mu ture mouhompa, ntani nga ka tengura. 13Age makura ta zigida vakareli vendi murongo, makura nkenye ogu ta mu pe simaliva songorodo, ta va tantere asi, ‘Yi ruganeseni dogoro noku ngani ka tengura.’ 14Nye vanasirongo kwa mu nyengere, makura tava tuminikida ko nontumi di ka tante asi, ‘Mugara ogo ose kapi tuna hara asi a kare hompa gwetu.’

15“Mugara ga ka tengura, age vana ka mu tura mouhompa. Ta tanta asi, va ka zigide ava vakareli ava ga sigilire yimaliva, a ya tare asi nkenye ogu nsonso zokuhura kupi ga gwanena po. 16Gopomuhowo ta wiza po, ta tanta asi, ‘Hekurwange, simaliva soge songorodo sa gwana ko nsonso zoyimaliva yikwawo murongo.’ 17Hompa ta mu tantere asi, ‘Yina wapa, nani o mukareli gomuwa. Ngomu wa limburukwa mweyi yoyisesu, yipo nye no gwanena nonkondo dokupangera yitata murongo.’ 18Gwauvali nage ta hedere po, ta tanta asi, ‘Hekurwange, simaliva soge songorodo sa gwanena po yimaliva yikwawo yitano.’ 19Nage ta mu tantere asi, ‘Nove to pangere yitata yitano.’ 20Gwautatu hena ta hedere po, ta tanta asi, ‘Hekurwange, simaliva soge sesi. Ame kwa si mangera posikayiwa, yiyo na si horeka. 21Yeeyi ame kwa tjira, morwa ove muntu gomudigu: ove kugusa eyi ya hana asi yoge, ove hena kuzangura eyi wa dira kukuna.’ 22Hompa ta mu tantere asi, ‘Ame tani ku pangwisa kononkango domokana koge, mukareli ove gomudona! Wa diva nge no asi ame ni muntu gomudigu, ani gusa eyi ya hana asi yange, ame hena kuzangura eyi na dira kukuna. 23Yisinke nye eyi wa dilira kutwarera nge yimaliva yange kombanga? Eyi na ka tengura, ngano na ya gwana emona lyange nonsonso zalyo.’ 24Ava va sikeme po, hompa ta va tantere asi: ‘Si mu guseni mu si pe ogu ana kara noyimaliva yongorodo murongo.’ 25Awo tava mu tantere asi, ‘Hekurwetu, age koyili nare yimaliva murongo.’ 26Nye age ta va tantere asi, ‘Ogu ga kara noyuma, kumupa yi mu vhukilire, ano ogu ya pira, kuyimugusa neyi ga kara nayo. 27Nye nonkore dange edi da dira kuhara asi ni kare hompa gwado, di reteni oku mu ya di dipage ame kuna kutara.’ ”

Jesus ta hwilire moJerusarema pasiuhompa

28Jesus kwa yi tanta tupu, makura ta twikire a ze koJerusarema. 29Apa ga sikire popepi naBetefage naBetani, pondundu ezi ava tumbura asi Ndundu zoMauzwe, ta tumu varongwa vendi vavali, 30ta va tantere asi: “Zendeni kositata esi sina mu kara komeho. Nsene nomu ka hwilira mo, nomu ka gwana sindongili somutanda vana mangerere, esi ga dira kuronda rumwe muntu. Nkumwe mu ka si kumunune, mu si rete. 31Nsene na ka mu pura muntu asi, ‘Yinke muna kusikumwinina?’ tanteni asi, ‘Hompa ana si hepa.’ ”

32Ava ga tumine makura tava zi, va ka yi gwene moomu tupu ka va tantere. 33Hava hokwa kukumununa sindongili, venyaso tava va pura asi: “Yinke muna kusikumwinina oso sindongili?” 34Awo tava limburura asi: “Hompa ana si hepa.” 35Makura tava si twara kwaJesus, tava zara yikoverero yawo posindongili somutanda, makura tava ninki Jesus a hingire po. 36Jesus eyi ana kugenda, awo tava zara yikoverero yawo monzira. 37Tupu ga wiza pepi naJerusarema porukunkumuko roNdundu zoMauzwe, makura mbunga zonene zovarongwa tazi tameke kuhamberera Karunga unene morwayirugana yononkondo nayinye eyi va mona. 38Tava tanta asi: “Va mu pande ogu ana kuwizira medina lyaHompa! Mpora meguru, Karunga a fumane meguru‐guru!”

39Vafalisayi vamwe mozo mbunga tava tantere Jesus asi: “Murongi, nyokera varongwa woge!” 40Age ta va limburura asi: “Tani mu tantere asi, nsene va mwena ava, ngano mamanya yigo naga zigira.”

Jesus ta lilire Jerusarema

41Jesus apa ga hedere pepi naJerusarema, a mone sitata, ta si lilire oku ta tanta asi: 42“Ani ngano nye kwa diva nomoomu mezuva lyoge, yininke eyi yokukuretera mbili! Nye pwantaantani kuna yi ku horeke. 43Yeeyi mazuva ngaga wiza, apa ngava sima vanyengi woge ekero, li ku kunduruke, awo ngava ku umbilikide, tava ku sitilikidire mo. 44Awo ngava ku myonena novana woge pevhu; moge kapi ngava siga mo emanya lina kara kekwawo, morwa ove siruwo sosiwa sapa ga ya ku dingwire Karunga, kapi wa si dimbwilire.”

Jesus ta zi montembeli

45Jesus kwa hwililire montembeli, makura ta tjida‐tjida mo varandesi nava vana kuranda. 46Makura age ta va tantere asi: “Kwa tjanga asi, ‘Nzugo zange, nzugo zokukandererera.’ Nye one yiyo muna zi paka zi kare sipwapwa sovamahaka.”

47Jesus nga rongo nkenye ezuva montembeli. Nye vapristeli wovanene novalirongi womatjangwa nomasimbi gomuhoko, kwa here asi va mu dipage. 48Nye namumwe si omu nkare va mu rugane, yeeyi vantu navenye kwa mu hamene, awo ngava mu purakene.

Currently Selected:

Rukasa 19: KWN

Highlight

Compare

Copy