Rukasa 21

Nzambo zomufisayendi

1Jesus eyi ga kankuka, ta mono vanangawo omu vana kutura mo yigava yawo mosikesa sontembeli. 2Ta mono hena mufisayendi gomuhepwe omu ana kutura mo tumalivagona tuvali. 3Makura age ta tanta asi: “Yosili, mufisayendi ogu kuna tura mo yoyinzi, ana pitakana navenye. 4Yeeyi navenye kwa horere ko kweyi ya va vhukira va gave yigava kwaKarunga, nye age moruhepo rwendi kuna gava nayinye eyi ga weka yokumuparura.”

Jesus ta uyunga yehanaguro lyontembeli

5Vamwe kwa uyungire yokuhamena ntembeli, asi va zi tunga nomamanya gomawa, yiyo va zi limbagura noyigava yomaurenga. Makura Jesus ta tanta asi: 6“Nayinye eyi muna kumona ngesi, ngaga wiza mazuva, nemanya si lyeeli ngali kara kontunda zekwawo, eli ngava dira kuzungurura.”

Maudigu nomahepeko

7Awo tava pura Jesus asi: “Murongi, siruwoke ngayi kara po yene eyi? Sidiviso sokufana ngapi ngasi kara po apa ngayi horoka?”

8Jesus ta va limburura asi: “Takameseni, neisi nava mu pukisa. Yeeyi vanzi ngava wiza ngwendi medina lyange, tava ya likisaukire asi, ‘Nyame!’ hena asi, ‘Siruwo sina siki mo!’ Nye mwa ha va sikura. 9Nye nsene ngomu zuvha yita nomalikataukiro gayo, gwa ha mu pwaga, yeeyi eyi yiyo yokuhoroka muhowo, nye kapisi yiwo uhura.” 10Age hena ta va tantere asi: “Nomuhoko ngadi livyuka ano yi kare yirongo ngayi livyuka.” 11Ako ngaku kara makankamo gomanene gevhu nerumbu pomavega peke‐peke nehamba lyomukagu; mamoneko gokutjilisa noyidiviso yoyinene ngayi tunda keguru.

12“Nye eyi ayo simpe ya hana kuhoroka, ngava mu kwata, tava mu hepeke, tava mu twara monosinagoge nomonodorongo nokoyipara yohompa neyi yovapangeli morwedina lyange. 13Eyi yiyo nye ngayi mu pa evega lyokusanseka Mbudi zoNgwa. 14Tureni nye eyi konomutjima, kapisi omu hove kugazara eyi nomu ka lipoperesa. 15Yeeyi ame ngani mu pa nonkango nounongo, asi nonkore deni ngadi ka yi vhure kumulimburura ndi kumupatanesa. 16One ngava ka mu gava novakurona veni vaava, novakuru veni novamumbya veni nekoro lyeni novakweneni, awo ngava dipaga po vamwe pweni. 17Ano navenye ngava mu nyengera morwedina lyange. 18Nye noruhuki si rooru rokomutwe gweni ngaru zumbana. 19Mokudidimika kweni yimo ngomu gwanena mwenyo.

Yehanauko lyaJerusarema

20“Ano nsene ngomu mona Jerusarema vana zi kundurukida vakwayita, diveni asi ehanauko lyazo pepi lina kara. 21Makura ava va kara moJudeya ngava dukire konondundu. Ano ava va kara mositata, ngava pwaga mo, ano ava va kara konomukunda va ha wiza mo. 22Yeeyi ago ngaga kara mazuva gerugwidokuwoko, asi ngayi sike mo nayinye eyi va tjanga. 23Nane vakwetu vakadi ava ngava kara nomazimo nava wokuzamweka mazuva ogo! Yeeyi udigu wounene ngau kara mouzuni mudima nehandukiro komuhoko ogu. 24Awo ngava fa konomemo dorufuro, ngava va tware koupika koyirongo nayinye. Jerusarema ngava zi lyatagura vapagani dogoro noku ngasi sika mo siruwo sawo.

Ewizo lyaMunwaMuntu

25“Kezuva nokokwedi nokonombungururu ngaku kara yidiviso. Pevhu ngapa kara udigu nompwagetjima zonomuhoko nsene asi efuta nomankumpi tayi pupire. 26Vantu ngava kara nowoma pokundindira eyi yina kuwiza mouzuni. Yeeyi nonkondo deguru ngava di nyunganga. 27Makura ntani nye ngava mona MunwaMuntu ta wiza age meremo, nononkondo dononzi nouyerere. 28Ano yininke eyi ntene tayi tameke kuhoroka, tareni keguru mu kankure nomutwe deni, yeeyi eparu lyeni pepi lina kara.”

Sifanekeso soukuzu

29Jesus makura ta va sansekere sifanekeso asi: “Omu tare koukuzu noyitji nayinye. 30Nsene tomu mono nye tayi pumine, nare muna diva asi kurombo pepi kuna kara. 31Ano nayeeyi nsene tomu yi mono tayi horoka, diveni asi Untungi waKarunga pepi nye una kara. 32Yosili nina kumutantera asi, vantu ava kapi ngava lipwira po, ayo eyi nayinye ya hana kuhoroka. 33Eguru nevhu ngayi haga, nye nonkango dange narumwe si ngadi haga.

Yitakameso

34“Omu litakamese nyamweni! Walye omu lizumbilire moyipito nomoyinwa yononkondo noyinka youzuni ou, ezuva olyo neisi ngali mu gwana hararasi. 35Yeeyi alyo ngali wizira navenye ava va kara pevhu hararasi, moomu aru mahuka rutenda. 36Ano omu takamese oku tomu kanderere nkenye apa, asi mu gwane nonkondo dokuyoworoka kwanayinye eyi ngayi wiza, nkumwe ngomu ka sikame komeho zaMunwaMuntu.”

37Jesus nga rongo montembeli mutenya, nye masiku ta ka kara kondundu ezi ava tumbura asi Ndundu zoMauzwe. 38Mbunga nazinye ngazi meneka ngurangura zonene zi ze montembeli, zi ka mu purakene.

Currently Selected:

Rukasa 21: KWN

Highlight

Compare

Copy