Rukasa 18

Sifanekeso somufisayendi nomupanguli

1Jesus kwa va sansekerere sifanekeso sokuninka asi ava kanderere, walye ava dwapa. Ta tanta asi: 2“Mositata simwe mwa kere mupanguli ogu nga dili kutjira Karunga, age hena kapi nga fu nse vantu. 3Mositata oso mwa kere hena mufisayendi ogu nga wiza nkenye apa komupanguli ogo, ta mu tantere asi, ‘Tu pangura nava twa lizona nawo.’ 4Siruwo sosinene mupanguli kapi ga here, makura ga ninka ta lipura asi, ‘Nampili moomu ani dili kutjira Karunga, kapi ana fu nse vantu, 5tani yi rugana, morwa mufisayendi ogu ta sipageda nge. Tani mu pangwire, neisi nga ninka a ya twe nge nomomeho.’ ” 6Hompa makura ta tanta asi: “Purakeneni ogu mupanguli gomudona omu ana kutanta! 7Makura Karunga a dire nye kupangwira vahoroworwa vendi ava ava mu likwambere mutenya nomasiku, ndi a lirange kuvakwafa ndi? 8Ame tani mu tantere asi, age ta va pangwire usimbu‐simbu. MunwaMuntu ntene nga wiza, nye nga ya gwana ko tupu epuro mouzuni ndi?”

Sifanekeso soMufalisayi nomufutisi gomutero

9Jesus kwa sansekerere vamwe ava va limona uhungami yiyo va dina vakwawo sifanekeso esi asi: 10“Vagara vavali kwa kandukire kontembeli va ka kanderere, gumwe Mufalisayi, ano mukwawo mufutisi gomutero. 11Mufalisayi ta sikama a likerere, makura ta kanderere yokuhamena kwamwene asi, ‘Karunga, tani ku pandura, yeeyi ame kapi na fana vantu peke — vamahaka novanayimpempa novahondedi, ndi ngwendi gogu mufutisi gomutero ogu. 12Ame kudilira nondya ruvali mosivike, ame hena kugava yiumurongo yeyi ani gwana nayinye.’ 13Muteresi age kwa sikeme ure nakauke, nekeguru si kapi ga here kutara ko, nye ta litoona ponturo, ta tanta asi, ‘Karunga, fira nge nenda, ame munanzo!’ 14Ame tani mu tantere asi, ogu gokuhulilira kwa zire kembo lyendi age ana hungama, kupita gwina gomuhowo. Yeeyi ogu a linenepeke mwene, kumununupika, ano ogu a linunupike mwene, kumunenepeka.”

Jesus novanona

15Awo kwa reterere Jesus vanona asi a ya va kambeke mawoko. Varongwa eyi va yi mona, makura tava va kava. 16Nye Jesus ta va zigida va wize kwendi, ta tanta asi: “Sigeni vanona va wize kwange! Mwa ha va kava, morwa vangoso yiwo wa hamena Untungi waKarunga. 17Yosili nina kumutantera asi, ogu a dili kutambura Untungi waKarunga moomu a u tambura munona, narumwe si asi nga hwilire mo.”

Mugara gongawo

18Mupangeli gumwe kwa pulire Jesus asi: “Murongi gomuwa, yinke eyi nani rugana asi ngani ka pinge mwenyo gwanarunye?” 19Jesus ta mu limbura asi: “Yinke ono kutumbwira nge asi gomuwa. Kutupu ogu ga wapa, gumwe tupu a huru, yige Karunga. 20Yipango amesi wa yi diva: ‘Walye o hondere,’ ‘Walye o dipaga,’ ‘Walye o vaka,’ ‘Walye o rundire mukweni,’ ‘O fumadeke oguho nonyoko.’ ” 21Mugara ta tanta asi: “Nayinye eyi ame kwa gusa kuyisikisa mo kutunda kounona wange.” 22Jesus eyi ga yi zuvha, ta mu tantere asi: “Posili hena sininke simwe sa ku pira po: zende o ka randese eyi wa weka, makura o ka yi gavere vahepwe, ngo ka gwanene po emonazuni meguru; makura ntani nye no ka wiza o ya kwame nge.” 23Ano mugara apa ga zuvhire eyi, makura ta guvarara unene, yeeyi age kwa kere ngawo zonene.

24Ano Jesus eyi ga mu mona ana guvarara unene, ta tanta asi: “Ee, udigu musi womu wokuza moUntungi waKarunga ava va weka emona lyenzi. 25Yokupita ngameru mezuru lyonsonga hasa ureru, ya livhura neyi yokuza ngawo moUntungi waKarunga.” 26Makura ava va yi zuvhire, tava pura asi: “Yilye nye ogu nga gwana eparu?” 27Nye Jesus ta va limburura asi: “Eyi ya digopa kovantu, kwaKarunga ureru.”

28Peturusa yipo ga mu tanterere asi: “Ko tara si, ose amesi nayinye twa siga yiyo atu ku kwama.” 29Jesus ta va tantere asi: “Yosili nina kumutantera asi, kutupu ogu a sigi embo lyendi ndi vakurona vendi ndi vakuru vendi ndi vamumbya vendi ndi mukadendi ndi vana vendi, nye morwaUntungi waKarunga, 30asi nga dire kugwanena po yoyinzi mouzuni ou, ano mwenyo gwanarunye mouzuni wokomeho.”

Ediviso lyautatu lyorunyando

31Jesus kwa twere owo murongo navavali pompengi, ta va tantere asi: “Tareni, ose koJerusarema tuna vyukeni, ano nayinye eyi va tjanga vaporofete yokuhamena MunwaMuntu, ngayi ka sika mo nye. 32Yeeyi age ngava ka mu gava kovapagani, tava ka mu zora tava ka mu rugana momudona, makura ngava ka mu fizire mazeze. 33Ngava ka mu geragura, tava mu dipaga. Nye mezuva lyautatu nga vhumbuka koufe.” 34Nye awo kapi va kwete egano lyeyi, yeeyi nonkango edi kwa di va horekere, awo kapi va yi zuvhire eyi ga uyungire.

Jesus ta verura mutwiku gomoJeliko

35Jesus apa ga hedere popepi naJeliko, mugara gumwe gomutwiku age kuna hingire konzira a hedere. 36Ano eyi ga zuvha mbunga tazi piti po, ta pura asi: “Yinke oyo?” 37Vena tava mu tantere asi: “Ani Jesus Munasareta ana kupita po.” 38Mutwiku makura ta zigire asi: “Jesus Munasareta, fira nge nkenda!” 39Ava va pitire komeho, tava mu kava asi a mwene. Nye age ta zigire ko nye unene asi: “MunwaNdafita, fira nge nkenda!” 40Makura Jesus ta sikama, ta ninki asi va mu mu retere. Gwina eyi ga heda pepi, Jesus ta mu pura asi: 41“Eyi ono hara nani ku ruganena, yinke?” Age ta limburura asi: “Hompa, ninka nge ni mone hena.” 42Jesus ta mu tantere asi: “Mona! Epuro lyoge lina ku parura.” 43Naruvali si mutwiku nare kuna kumona, makura ta kwama Jesus oku ta fumadeke Karunga. Ano mbunga nazinye eyi za yi mona, makura tazi hamberere Karunga.

Currently Selected:

Rukasa 18: KWN

Highlight

Compare

Copy