Rukasa 17

Yononzo

1Jesus kwa tanterere varongwa vendi asi: “Maheteko gokuzonesa vantu yigo kuwiza, nye nane vakwetu muntu ogu a ga reta! 2Kwendi ogo hasa kumumangerera emumanya monsingo zendi, makura va mu zugumine mefuta, kapisi kumwe neyi yokupukisa kanona kamwe potu atu kwama nge. 3Omu litakamese nyamweni.

“Mukweni nsene si ana ku zono, mu nyokera, ano nsene a yi livera, mu dongwenena po. 4Ano nsene a ku zona rutano‐naruvali mezuva, nye a wize koge rutano‐naruvali a tante asi, ‘Tani livere,’ o mu dongwenene po.”

Yepuro

5Vapostoli kwa tanterere Hompa asi: “Hompa, tu gwederera ko kepuro lyetu.” 6Nye Hompa ta va tantere asi: “One ngano si kwa kara nepuro lyokuhura nampili pohuma zomositareta, ngano kuvhura tupu kutantera sitji esi sounyandi asi, ‘Damuka po apa o ka ndjikame mefuta,’ makura ngano naso tasi mu zuvhu.

Yirugana youkereli

7“Opo muna kara, pweli ogu ga kara nomukareli ogu a purura ndi kulisa yimuna, makura ntene ana wiza membo, a mu tantere asi, ‘Genderera oku yo lye,’ ndi? 8Amesi na mu tantera asi, ‘Tulira nge po murarero o limange nawa, makura o yete nge. Nange nani mana kulya nokunwa, nove ntani nye no lya oku to nu!’ 9Ndi na pandura tupu mukareli ogo asi, morwa ana rugana eyi vana mu tantere? Ame kapi nani yi pura oyo. 10None si yimo, nsene muna mana kurugana nayinye, eyi vana mu tantere, tanteni asi, ‘Ose tu vakareli wovahesi, yeeyi ose kuna rugana yeeyi vana tu pangere asi tu yi rugane makura.’ ”

Jesus ta verura vanayingondwe murongo

11Jesus apa ga zire koJerusarema, kwa gendere pokatji kaSamaliya naGalireya. 12Eyi ga hwilira momukunda gumwe, ta gwanekere novagara murongo woyingondwe. Awo kwa sikamene ure, 13tava zigire unene asi: “Jesus, murongi, tu fira nkenda!” 14Ano Jesus eyi ga va mona, ta va tantere asi: “Zendeni mu ka limonekese kovapristeli.” Hava za mokugenda, nare vana veruka. 15Ano gumwe po eyi ga limona asi ana veruka, makura ta tengura a ya fumadeke Karunga nezwi lyenene. 16Age ta gu kawomba komeho zaJesus, a mu pandure. Age Musamaliya ga kere. 17Makura Jesus ta pura asi: “Nani kapisi murongo vana veruka? Ava vatano‐navane kupi? 18Nagumwe si ogu ana tengura ko a ya hamberere Karunga, googu munayirongo gelike?” 19Age makura ta tantere mugara ogo asi: “Katuka o ze, epuro lyoge lina ku parura.”

Ewizo lyoUntungi waKarunga

20Vafalisayi vamwe kwa pulire Jesus asi Untungi waKarunga siruwoke ngau wiza. Age ta va limburura asi: “Untungi waKarunga, kapi au wiza noyidiviso yokumoneka. 21Kapi ngava tanta asi, ‘Tara apa!’ ndi asi, ‘Tara pena!’ hawe, yeeyi Untungi waKarunga mouli mokatji keni.”

22Jesus makura ta tantere varongwa vendi asi: “Mazuva taga wiza, apa ngomu hara kumona nampili ezuva limwe lyaMunwaMuntu, nye kapi ngomu li mona. 23Awo ngava mu tantera asi, ‘Tareni, gogu!’ ndi asi, ‘Tareni, gogwina!’ Mwa ha za ko ndi asi mu va kwame. 24Yeeyi moomu tupu aru vema ruvadi koyiha yimwe oku lya ka twa eguru, ru ka livete koyiha yikwawo oku lya ka twa eguru, naMunwaMuntu yimo nga kara mezuva lyewizo lyendi. 25Nye pomuhowo nga nyanda unene, ngava mu zumbe vantu ava vantaantani. 26Moomu tupu ya kere momazuva gaNowa, nomomazuva gaMunwaMuntu yimo ngayi kara. 27Awo ngava li oku tava nu, tava kwara, tava va pangere va kware dogoro nekezuva eli ga peramene Nowa memuwato. Makura emukuruhanzo kwa va wizire li va zonagure po navenye. 28Moomu tupu hena ya kere momazuva gaRoto: awo ngava li oku tava nu, nava randa oku tava randesa, ngava tapeke oku tava tungu. 29Nye ezuva eli ga tunda Roto moSodoma, makura endiro nomamanya gomundiro yokutunda meguru tayi va rokere nye yi va veveke po navenye. 30Nemezuva eli nga horoka MunwaMuntu, yimo ngayi kara ngorooro.

31“Mezuva olyo ogu nga kara peguru lyonzugo, ayo yininke yendi monzugo, ga ha humburuka asi a ka yi hare. Nogu nga kara mepya, kapi nga tengwira eyi na sigi kembo. 32Gazareni mukadaRoto! 33Nkenye ogu ga ruva mwenyo gwendi nga gu zumbanesa, ano ogu ana kuguzumbanesa, nga gu parura. 34Ame tani mu tantere asi: momasiku ogo vavali ngava rara pouro umwe; gumwe ngava mu gusa po, mukwawo tava mu sigi po. 35Vakadi vavali wokutwa sini simwe, ngava gusa po gumwe, ogu mukwawo tava mu sigi po. 36(Vavali ngava kara mepya; gumwe ngava mu tambura, ano ogu gumwe ngava mu siga po.”) 37Varongwa vendi tava mu pura asi: “Nani kupi, Hompa?” Jesus ta va tantere asi: “Oku ali kara erambo, yiko aga pongo makuvi kooko.”

Currently Selected:

Rukasa 17: KWN

Highlight

Compare

Copy