Rukasa 16

Erenga lyoyimpempa lyonondunge

1Jesus kwa tanterere hena varongwa vendi asi: “Pwa kere mugara gumwe gongawo ogu ga kere nerenga lyendi, eli va ka hetere kwendi asi, tali mu hanagwire emona lyendi. 2Age ta li zigida, ta tanta asi, ‘Eyi nina kukuzuvhira hena yinke? Varura yininke yemepangero lyoge, yeeyi kapi ngo yi pangera hena.’ 3Erenga tali lipura lyene asi, ‘Omu ngani rugana ngapi? Yeeyi hekurwange nga gusa nge mourenga wange. Kulima nokukuvhura si, kuhehera nomuga. 4Na diva omu ngani rugana, nsene nga gusa nge hekurwange mourenga wange, vantu nkumwe ngava tambure nge momambo gawo.’ 5Makura ta zigida womakongo gahekurwendi gumwe‐gumwe. Ta pura gopomuhowo asi, ‘Makongo gokuhura kupi wa lya ko kwahekurwange?’ 6Gwina ta limburura asi, ‘Yipako yomagadi efere limwe.’ Erenga tali mu tantere asi, ‘Gusa mbapira zoge zomakongo, o tjange mo usimbu nomurongo ntano.’ 7Ga ninka ta pura hena gumwe asi, ‘Ove makongo goge papi ga hura?’ Age ta mu tantere asi, ‘Nonsako dorukokotwa efere limwe.’ Gwina ta mu tantere asi, ‘Gusa mbapira zoge zomakongo, o tjange mo nomurongo ntano‐nantatu.’ 8Ano hekurwendi makura ta kanganga erenga olyo lyoyimpempa, morwa lina rugana nonondunge. Yeeyi vantu womouzuni ou noyininke yawo kwa paka nondunge, kupitakana vantu wouzera.

9“Ame tani mu tantere asi, omu lipaparere vakweneni nemona lyoyimpempa lyouzuni ou, makura apa ngali pwa, awo ngava ka mu tambure momambo ganarunye. 10Ogu va huguvara mweyi yoyinunu, nomu mweyi yoyinene kwa mu huguvara. Ano ogu va dira kuhuguvara mweyi yoyinunu, nomu si mweyi yoyinene nokumuhuguvara si. 11Ano nsene kapi va mu huguvara memona lya hana mutompo, omu ngava mu huguvara memonazuni lyene‐lyene? 12Ano nsene kapi mwa diva kukwata nawa yininke yovakweneni, ogu nga mu pa yanyamweni oku nga tunda kupi? 13Mukareli nokuvhura si kukerera vahekuru vavali, morwa na nyenga po gumwe, ta hara po mukwawo, ndi na korera kwagumwe, ta nusa po mukwawo. None yimo nokuvhura si kukerera Karunga nomamona.”

Yompango zaKarunga

14Ano Vafalisayi ava va dowokerere yimaliva, apa va yi zuvhire nayinye eyi, makura tava mu zoro Jesus sirungu. 15Jesus makura ta va tantere asi: “Nyone omu lihungamesa koyipara yovantu, nye Karunga ga diva nomutjima deni. Yeeyi eyi va fumadeka vantu, yiyo ga nyenga Karunga.

16“Veta zaMosesa novaporofete kwa ya hagera mwaJohanesa Mukuhwi. Kutunda opo makura Mbudi zoNgwa zoUntungi waKarunga yiyo ava zi udisa, navenye yiyo ava dukire mo kononkondo. 17Eguru nevhu ereru kudongonoka po, nye koVeta nokaninke si kaaka ngaka tunda ko.

18“Nkenye ogu a zumbu mukadendi, nye a kware nage peke, ta hondere. Ano ogu a kwara mukadi ogu va zumba, nage ta hondere.

Jesus ta sanseke sifanekeso somugara gongawo naRasarusa

19“Pwa kere mugara gumwe gongawo. Age nga dwara yikoverero yopurupuli neyi yoyizera yokurerema, nga hafa nkenye ezuva, ta litumbu. 20Pwa kere hena muhepwe gumwe, edina lyendi Rasarusa. Age ga zulire masina, nga rara pevero lyongawo. 21Age nga hara asi a likutike noyintau eyi ngayi gu kosiliro songawo. Hawe, nonombwa deedi ngadi wiza di ya pehagure masina gendi. 22Ano muhepwe ogu apa ga fire, vaengeli tava mu damuna va mu tware mevha lyaAbirahamu. Ngawo nazo tazi fu, tava zi vhumbike. 23Eyi ga kankura meho mosirongo sovafe, morunyando rwendi, ta mono Abirahamu koure naRasarusa mevha lyendi. 24Age makura ta zigire asi, ‘Tate Abirahamu, fira nge nkenda o tume Rasarusa, a twe nyara zendi momema, a ya nengedeke eraka lyange. Yeeyi ame moudigu wounene na kara omu momundiro gokutwera.’ 25Nye Abirahamu ta limburura asi, ‘Munwange, gazara asi ove kwa gwene yoyiwa apa wa kere nomwenyo, ano Rasarusa age kwa gwene yoyidona. Nye age ntaantani tava mu hengagwida, nye ove to mono nye udigu wounene. 26Unene po hena empompwa eli va tura pokatji ketu lyokuninka asi, ava womu mpili va hare asi va taguruke va wize kweni, nokuvhura si, ano owo womo, nawo si nokuvhura si kutaguruka va wize kwetu.’ 27Ngawo ta tanta asi, ‘Na ku kanderere nye, tate, mu tuma nye kembo lyotate. 28Yeeyi ame kwa kara novamumbya vange wovagara vatano. Age ngano a ka va korangede unene, ngava dire kuwiza mevega eli lyorunyando.’ 29Abirahamu ta mu tantere asi, ‘Mosesa novaporofete nawo va kara, owo yiwo nava zuvha.’ 30Nye ngawo ta limburura asi, ‘Hawe, tate Abirahamu, ngano mufe gumwe ana zi ko, ngano tava litezurura.’ 31Nye Abirahamu ta mu limburura asi, ‘Nsene kapi vana kuzuvha Mosesa novaporofete, nokukapura si, nampili mu tunde gumwe koufe.’ ”

Currently Selected:

Rukasa 16: KWN

Highlight

Compare

Copy