Rukasa 15

Sifanekeso sonzwi zokuzumbana

1Vafutisi womutero novananzo kwa kere nonkedi zokuwiza kwaJesus va ya mu purakene. 2Vafalisayi novalirongi womatjangwa ngava vhunguta unene asi: “Mugara ogu kutambura vananzo, ta li kumwe nawo.” 3Jesus makura ta va tantere sifanekeso esi asi:

4“Nsenesi muntu a weka nonzwi efere limwe, makura pa zumbane zimwe, eyi na rugana yinke? Kapi na siga nani edi nomurongo ntano‐nane nononwzi ntano‐nane momburundu, a ze a ka hara‐hare zokuzumbana dogoro noku na ka zi gwana? 5Nsenesi ana ka zi gwana, ta zi likambeke komapepe gendi nehafo. 6Apa na ya sika kembo, ta zigida vakwawo novamaparambo, ta va tantere asi: ‘Hafeseseni nge ko, yeeyi nzwi zange ezi kazi zumbanene, nina zi gwana.’ 7Ame tani mu tantere asi, nemeguru namo ngosikwawo ngali kara mo ehafo lyokuhafera munanzo gumwe ogu ana litezurura, kupitakana lyokuhafera vahungami nomurongo ntano‐nane navatano?-?navane, ava va dira kuhepa elitezururo.

Sifanekeso sosimaliva sokuzumbana

8“Ndi mukadi nsene ga kara noyimaliva yomuwaya‐waya murongo, si mu zumbane po simwe, eyi na rugana yinke? Kapi na hwameka nani ramba a kombe nzugo, a si papare nawa‐nawa dogoro ta si gwana? 9Eyi na si gwana, makura ta zigida vakwawo novandambo, ta tanta asi, ‘Hafeseseni nge ko, yeeyi simaliva esi sa zumbana nge, nina si gwana.’ 10Ame tani mu tantere asi, vaengeli vaKarunga nawo ngava hafera ngosikwawo munanzo gumwe ana litezurura.”

Mumati ga zumbanene

11Jesus kwa va tanterere asi, “Pwa kere mugara ogu ga kere novana wovagara vavali. 12Munona po ta tantere oguhwe asi, ‘Tate, peni nge ko ruha rougawo oru rwa tumbukira nge.’ Guhwe makura yininke ta yi va pitire pokatji. 13Kapi pwa pita mazuva gomanzi, makura ta randesa po yininke yendi nayinye, makura ta zi kosirongo sokoure. Oko yiko ga ka hanagwilire emona lyendi moruho. 14Kwa yi mana po tupu nayinye, makura mosirongo oso tamu wiza erumbu lyenene, makura ta tameke kuhepa. 15Makura ta zi a ka likundike komunasirongo gumwe. Gwina makura ta mu tumu a ka lise yinguru yendi. 16Age kwa here ngano asi a lihote mutjeketera ogu ngayi li yinguru, nye nagumwe si ogu ga gu mu nukisire.

17“Mumati makura ta lisimonona mwene asi, ‘Tara nye, vakareli wotate kounzi nonondya edi ava li kounzi, ame nye nyame ogu nina kuyafira oku nzara. 18Tani katuka, tani zi kotate, ni ka va tantere asi, Tate, ame na zona kwaKarunga noku kweni. 19Ame kapi na fire hena kutumbura nge asi ni munweni, kuninka nge tupu name ni kare mukareli gweni.’ 20Makura ta katuka a ze koguhwe.

“Ano age simpe ure ga kere, guhwe nare ana mu mono, ta mu retere nkenda. Makura ta duka a ka gwanekere nendi, ta mu lidingire, ta mu ncumita unene. 21Ogo munwendi ta mu tantere asi, ‘Tate, ame na zona kwaKarunga noku kweni. Ame kapi na fire hena kutumbura nge asi ni munweni.’ 22Nye guhwe ta tantere vakareli vendi asi, ‘Genderereni mu ka rete sikoverero sosiwa mu ya mu dwareke, mu mu dwareke hena kalinga konyara nononkaku konompadi dendi. 23Makura nkumwe mu ka rete ntana za lilira za neta, mu ya zi dipage, tu lyeni tu hafeni. 24Yeeyi munwange ogu kwa fire, nye ntaantani nomwenyo ana kara. Kwa zumbanene, nye ana moneka.’ Awo makura tava tameke kuhafa.

25“Ano munwendi po ogu gomukurona kwa kere mepya. Ana kuninka a hede popepi nembo, makura ta zuvhu nonsumo noudano. 26Age makura ta zigida mukareli gumwe a ya mu pure asi yinke yina kara mo. 27Gwina ta mu tantere asi, ‘Mumbyoge ana wiza, makura oguhwo yiyo vana dipaga ntana za lilira za neta, morwa ana ya siki ukangure.’ 28Makura gwina ta handuka, nemembo kapi ga here kuhwilira mo. Oguhwe makura tava pwaga va ka mu lihenge. 29Nye age ta limburura oguhwe asi, ‘Tareni, nomvhura nonzi edi na mu ruganena, nye nakamwe si aka na sempunukisa po, zakeni nge ko nye nampili kakombo ni hafe novakwetu, mpaga. 30Ano opo ana wiza ogo munweni, ogo ga ka hanagwira emona lyeni moruho, yiyo sa nye muna mu dipagere ntana za lilira za neta.’ 31Oguhwe makura tava mu tantere asi, ‘Munwange, ove noge twa kara, nayinye eyi na weka, yoge. 32Nye ose twa fira kuhafa oku tatu pembura, yeeyi ogu mumbyoge kwa fire, nye ntaantani nomwenyo ana kara, kwa zumbanene, nye ntaantani ana moneka.’ ”

Currently Selected:

Rukasa 15: KWN

Highlight

Copy