Rukasa 14

Jesus ta verura gomafulira

1Ano mEsabata limwe apa ga wizire Jesus kembo lyomukurona goVafalisayi a ka lye, vantu makura tava mu nomene. 2Komeho zendi kwa kere mugara gouvera womafulira. 3Jesus makura ta pura valirongi womatjangwa noVafalisayi asi: “Enye va yi gava yokuverura mEsabata ndi?” 4Nye awo teete zawo. Jesus makura ta mu gusa, ta mu verura, ta mu ninki a ze. 5Age makura ta tantere Vafalisayi asi: “Opo muna kara, yilye ogu ga kara nosindongili ndi hove zi gwire metope, nye a dire kuzikoka mo usimbu‐simbu moomo mEsabata?” 6Hawe, nagumwe si googu ga vhulire kumulimburura.

Sifanekeso sava vezigido noyipundi yekuto

7Ano Jesus eyi ga mona vamwe ava va zigidire tava lihorowere mavega gokomeho, ta va tantere sifanekeso asi: 8“Nsene vana ku zigida kekwareko, wa ha ka hingira posipundi sokomeho. Nani mpamwe pweli ogu ga ku pita mekuto vana zigida ko hena. 9Ano nturagumbo ogu ana mu zigida nove nendi, ta wiza koge a tante asi, ‘Pa muntu ogu evega.’ Makura ove o tengure nye kevega lyokonyima nonomuga doge. 10Ano nsene vana ku zigida, zende o ka hingire kosipundi sokonyima, asi ogu ana ku zigida, a ku tantere asi, ‘Hewa, heda oku!’ Ngoso ntani o gwana ekuto kwava muna hingire nawo kosiliro. 11Yeeyi nkenye ogu a linenepeke mwene, ngava mu nunupika, ano ogu a linunupike mwene, ngava mu nenepeka.”

12Makura Jesus ta tantere hena nturagumbo ogu ga mu zigidire asi: “Nsene to gava mulihako ndi muzuhwa, walye o zigida vakweni ndi vakuru woge ndi vamumbya woge ndi ekoro lyoge ndi vamaparambo woge wonongawo, neisi mpamwe ngava ku zigida nove, ngo gwanene po mfuto zoge. 13Nye nsene ono rugana sipito, o zigide vahepwe noyirema noyirema yomondambo novatwiku, 14makura ngo ragope, morwa awo kutupu eyi yokukurugwidira kuwoko. Oyo ngo gwana mfuto zayo kwaKarunga pevhumbuko lyovahungami.”

Sifanekeso sosipito sosinene

15Gumwe po ogu va kere naJesus kosiliro, kwa yi zuvha tupu, makura ta mu tantere asi: “Munerago ogu nga ka kara kosiliro moUntungi waKarunga.” 16Nye Jesus ta mu limburura asi: “Mugara gumwe kwa rugene sipito sosinene, makura ta zigida vantu wovanzi. 17Rwa sika mo ruveze rokulya, makura ta tumu mukareli gwendi, a ka tanta‐tantere ava va rekerere asi, ‘Zendeni, morwa nayinye yina pu kuwapaika!’ 18Navenye makura tava tameke kunyoka, nkenye ogu pwarwendi. Gomuhowo ta tanta asi, ‘Ame kuna randa epya, nye na hepa kuza ni ka li tare. Na kanderere, ame kuna pagama.’ 19Gumwe hena ta tanta asi, ‘Ame kuna randa nohove donondjoko ntano, tani zi ni ka di heteke. Na kanderere, ame na pagama.’ 20Gumwe hena ta tanta asi, ‘Ame kuna gombora, yipo nye asi ame nokuvhura si kuwiza.’

21“Ogo mukareli makura ta zi, ta ka yi tantera hekurwendi. Nturagumbo makura ta handuka, ta tantere mukareli gwendi asi, ‘Zende usimbu mononzira nopomaharango gositata, makura o ka rete vahepwe noyirema novatwiku noyirema yomondambo!’ 22Mukareli ta tengura, ta tanta asi: ‘Hekurwange, eyi komu tanta yina pu kurugana, nye evega simpe polili.’ 23Hekurwendi ta mu tantere hena asi, ‘Zende mwa za nonzira nopomaharango, o ka va sininike va wize, embo lyange nkumwe li ya zure. 24Yipo nye na kumutanterera asi, vena kani rekere nagumwe si na huma nondya dosipito sange!’ ”

Udigu womurongwa gwaJesus

25Nombunga dononene kwa zire naJesus. Age makura ta piruka, ta va tantere asi: 26“Ntene a wiza muntu kwange, nye a dire kunyenga oguhwe nozina namukadendi novana vendi novakuru vendi novamumbya vendi wovagara nava wovakadi namwene, nokuvhura si a kare murongwa gwange. 27Nogu a dili kudamuna silivindakano sendi a kwame nge, nage kapi ga wapera kukara murongwa gwange. 28Ndi muntuke gokuhara kutunga ruhungu a dili kuhova tanko kuhingira a varure eyi ngaru pita, a tare ntene si ana kara neyi yokurutungisa dogoro ru pwe. 29Ano nsene a dira kuyirugana, nga mana tupu etateko, makura tayi mu sumpire. Ano navenye ava ngava yi mona, makura tava mu zoro, 30va tante asi: ‘Mugara ogu kwa vareka kutunga, yiyo ya mu tjindira.’ 31Hena asi hompa nsene ga kara novakwayita mayovi murongo, nye ana hara kukarwisa mukwawo, ogu ga kara novakwayita mayovi nomurongo mbali, amesi tanko ta hingire a tare tanko asi, age ntene nonkondo ko dokurwisa hompa mukwawo. 32Ano nsene yina mu vhuru, makura ta tumu ko nontumi, age mukwawo simpe ure ana kara, a ka mu hundire mbili. 33Nogu si gokudira kuzumba emona lyendi nalinye, nokuvhura si asi a kare murongwa gwange.

Mungwa gokupira mulyo

34“Mungwa muwa, nye mungwa nsenesi gu hakumpara, kosinke hena ngava gu tovesesa? 35Ago kutupu sikwafo mepya nomoruhoho si. Kugutjira tupu nye ponze. Ogu ga kara nomatwi gokuzuvhisa, a zuvhe!”

Currently Selected:

Rukasa 14: KWN

Highlight

Copy