Rukasa 13

Kulitezurura ndi kufa

1Posiruwo oso pwa kere vantu ava va tanterere Jesus yokuhamena koVagalireya, ava ga dipagere Piratusa, makura nonzambo dawo a di runga‐runge nohonde zawo. 2Ano Jesus ta va limburura asi: “One kweni asi owo Vagalireya ya horokerere oyo, asi vanzoni unene kupitakana Vagalireya vapeke ndi? 3Hawe, ame tani mu tantere asi, nsene kapi muna kulitezurura, none namuvenye yimo ngomu fa ngorooro. 4Ndi vena murongo navatano?-?navatatu rwa gwililire ruhungu rwaSiroya, one kweni asi vanzoni unene, kupitakana Vajerusarema mudima? 5Hawe, ame tani mu tantere asi, nsene kapi muna kulitezurura, none namuvenye yimo ngomu fa ngorooro.”

Sifanekeso soukuzu wokudira kuyima

6Makura Jesus ta va sansekere sifanekeso esi asi: “Mugara gumwe kwa kere nositji soukuzu esi ga tapekere mosikunino sovhinyu. Ano age ta zi a ka papare ko yiyimwa kwawo, nye nayimwesi ga ka gwene ko. 7Makura ta tantere munomeni gosikunino asi: ‘Tara, ame nomvhura nye ntatu na wiza ni ya papare yiyimwa koukuzu ou, nye nayimwesi na gwana ko. U komangera po! Yisinke nau hepekera evhu?’ 8Nye munomeni gosikunino ta mu limburura asi: ‘Hekurwange, u siga tanko mvhura ezi, nkumwe ngani u kankere ni u ture ruhoho. 9Momvhura zina kuwiza ntene ngau yima, hawe, ngano nawa; nye ntene yimo sa, ove kuvhura tupu nye kuuteta po.’ ”

Jesus ta verura mukadi gosirema mEsabata

10Jesus kwa rongere mosinagoge zimwe mEsabata. 11Pwa kere mukadi ogu ga kere nompepo zondona nomvhura murongo nantano‐nantatu. Age kwa mu kutumikire, kapi nga vhuru kuvyuka. 12Ano Jesus eyi ga mu mona, ta mu zigida, ta tanta asi: “Mukadi, uvera woge una ku tundu nye.” 13Jesus makura ta mu kambeke mawoko, naruvali si mukadi nare ana vyukilire kusikama, makura ta fumadeke Karunga. 14Nye mukurona gosinagoge kwa mu korere yokuverura Jesus mEsabata, makura ta tantere mbunga asi: “Mazuva gatano‐nalimwe ga kara gokurugana muntu, omu wize nye nomazuva ogo va ya mu verure, kapisi mEsabata.” 15Makura Hompa ta mu limburura asi: “Vayilipaki one! Opo muna kara, nagumwe si a kumununa hove ndi sindongeli sendi mEsabata, a si tware komema ndi? 16Ee, nani ogu mukadi munwaAbirahamu, ga manga Satana, gazara tupu nye nomvhura murongo nantano‐nantatu. Ee, nani nokuvhura si kumumangurura mEsabata?” 17Jesus tupu ga yi uyunga eyi, makura nonkore dendi tadi fu nomuga, nye vantu navenye tava hafere yininke yokutetura nayinye eyi ga rugene.

Sifanekeso sohuma zomositareta nesi sohingo

18Jesus ta tanta asi: “Untungi waKarunga yinke wa fana neyi nani u hetekesa, yinke? 19Untungi weguru kwa lifana nohuma zomositareta ezi ga kunine muntu mepya lyendi. Makura tazi kuru tazi kara sitji, yidira makura tayi wiza yi ya tunge yikorogo yayo monomutayi daso.”

20Jesus ta tanta hena asi: “Untungi waKarunga yinke hena nani u hetekesa? 21Untungi weguru kwa lifana nohingo ezi ga gusire mukadi, ta zi paka momahemere gatatu gousura, dogoro noku za hahesa eduwo mudima.”

Evero lyenunu

22Pokuza kwendi Jesus koJerusarema, kwa gendere mwa za yitata nonomukunda oku ta va rongo. 23Gumwe ta mu pura asi: “Hompa, ava ngava paruka nani vanunu?” Age ta va limburura asi: 24“Omu kondje, mu hwililire mokampito kompato. Yeeyi tani mu tantere asi, vanzi ngava heteka kuhwililira mo, nye kapi ngava yi vhura.

25“Mwenyembo ntene a katuka a zedire ko kevero, one mu sikame ponze mu ngongore kevero oku tomu tanta asi: ‘Hompa, Hompa, tu zegurura’ — age nga mu limburura, ta mu tantere asi: ‘Kapi na mu diva noku muna kutunda kooku.’ 26One ntani ngomu tanta asi: ‘Ose ngatu li oku tatu nu, ove kuna kututara, ove ngo rongo mononzira detu.’ 27Age nga mu limburura asi: ‘Ame tani mu tantere asi, ame kapi na mu diva noku si muna kutunda kooku. Tundeni po apa, one varugani woudona!’ 28Oko ngaku ka kara siliro nomalikwetjo gomazego, apa ngomu ka mona Abirahamu naIsaka naJakopo novaporofete navenye awo moUntungi waKarunga, one nyamweni va ka mu tjidire ponze. 29Vantu ngava tunda koUpumezuva nokoUtokero nokoMuzogo‐zogo nokoMbindakano, ngava ya lye moUntungi waKarunga. 30Ano wokuhulilira yiwo ngava kara wokuhova, ano ava wokuhova yiwo ngava kara wokuhulilira.”

Jesus ta hahura Jerusarema

31Mezuva lyoolyo Vafalisayi vamwe tava wiza kwaJesus, tava mu tantere asi: “Tunda po apa o ze, yeeyi Herodesa kuna hara a ku dipage.” 32Nye age ta va tantere asi: “Zendeni mu ka tantere mbanze ogo asi, ‘Ame tani tjida mo nompepo donondona oku tani verura vantu, naina nomungura, ano pinduko ngani mana.’ 33Nye ame mwanaina nomungura nopinduko tani twikire komeho, yeeyi yokudipagera muporofete pwapeke mwa hana asi moJerusarema, oyo nokukara po si.

34“Jerusarema, Jerusarema, ove kudipaga vaporofete, to va toona nomamanya ava va ku tumina. Rungapi na here kupongaika vana woge, moomu azi pongaike nhunhwa vana momavava gazo, nye one nokupura si. 35Tareni, nzugo zeni mawoko‐woko ngazi kara. Ame tani mu tantere asi, kutunda apa, kapi ngomu mona nge hena, dogoro nekuzuva eli ngomu ninka asi, ‘A fumane ogu ana kuwizira medina lyaHompa!’ ”

Currently Selected:

Rukasa 13: KWN

Highlight

Copy