Rukasa 12

Erondoro lyouyilipaki

1Eyi za ponga ngoso mbunga zomayovi nomayovi, kuna kulilyatanga, Jesus ta tameke kutantera varongwa vendi asi: “Omu rungararere hingo zoVafalisayi, kuninka asi uyilipaki. 2Nasimwe si esi sa vanda, ngasi dire kuhoroka, ndi si kare esi sa divama, ngasi dire kudivikwa. 3Yipo nye asi, nkenye eyi muna kuuyungira momundema, ngava yi zuvhira poruzera, yi kare eyi muna kuwowotera momatwi monzugo, ngava yi zigilira peguru lyonzugo.

Ogu nava tjira yilye?

4“Ano vakwetu, ame tani mu tantere asi, walye omu tjira ava ava dipaga rutu rwelike, makura va hana kutompora hena yuma. 5Nye ame tani mu likida ogu nomu vhura kutjira: omu tjire ogu a ninki ntene ana dipaga, age ga kara hena nononkondo dokuzugumina moMundiro gwanarunye. Hawe, ogo tani mu tantere asi, omu mu tjire.

6“Nani manzunge gatano kapi ava ga randa nosenda mbali? Nye nalimwe si eli ga divara ko Karunga. 7Nye one nonohuki deedi dokonomutwe deni da pwa kuvarura. Ano neisi nomu tjilira, yeeyi asi one mwa pitakana manzunge gomanzi.

Kutongonona Kristusa kovantu

8“Ame tani mu tantere asi, nkenye ogu nga tongonona nge kovantu, MunwaMuntu nage nga ka mu tongonona komeho zovaengeli vaKarunga. 9Nye nkenye tupu ogu a patana nge kovantu, name ngani ka mu patana kovaengeli vaKarunga. 10Nkenye ogu a uyungire MunwaMuntu nkango zondona, ngava zi mu dongwenena po. Nye ogu nga uyungira Mpepo zoKupongoka nkango zondona, nokuzimudongwenena po si.

11“Nsene ngava mu twara konosinagoge nokoyipara yovapanguli novapangeli, nokulipakera si sinka asi ngapi ndi yinke nomu ka lipoperesa, ndi asi yinke eyi nomu ka tanta. 12Yeeyi Mpepo zoKupongoka ngazi mu ronga vili zoozo eyi nomu uyunga.”

Sifanekeso songawo zongova

13Gumwe mombunga ta tantere Jesus asi: “Murongi, tantera munwamali, tu ligavere upingwa wetu.” 14Nye Jesus ta mu limburura asi: “Oviee, ogu ga paka nge asi ni kare mupanguli ndi mugaveli gweni hena yilye?” 15Jesus makura ta tantere navenye asi: “Omu takamese tomu rungarere edowo lyemona, yeeyi asi, mwenyo gomuntu kapi agu paruka kemona lyendi, mpili li kare lyenzi unene.” 16Age ta va tantere sifanekeso esi asi: “Epya lyomugara gumwe gongawo kwa yimine nawa. 17Age makura ta lipura asi: ‘Ngapi omu nani rugana, yeeyi kapi na paka yihete yokuzangwira nombuto dange?’ 18Age makura ta ninki asi: ‘Tani rugana ngesi: tani zungurura po yihete yange ni tungire po yoyinene, makura nkumwe ngani ture mo muzangu gwange noyininke yange nayinye. 19Makura ngani tantera mwenyo gwange asi: Mwenyo, ove kuna ku pungwire yininke yonomvhura dononzi. Gu ku dame nye, lya, o nwe, o hafe.’ 20Nye Karunga kwa mu tanterere asi: ‘Egova ove, masiku ganaina mwenyo goge tava gu ku gusa. Ano eyi wa lipongaikira, yalye nye ngayi kara?’ 21Yimo nye ngayi mu kara ogu a lipongaikire emona, age ga hana kungawopa mwaKarunga.”

Omu huguvare mwaKarunga

22Jesus makura ta tantere varongwa vendi asi: “Yipo nye nina kumutanterera asi, walye omu pakere sinka konomwenyo deni asi yinke nomu lya, ndi komarutu geni asi yisinke nomu ga dwareka ko. 23Yeeyi mwenyo gwa pitakana nondya, ru kare rutu naro rwa pitakana yidwara. 24Komu tara si komakorova: ago kapi aga kunu, ago hena kapi aga zangura, kapi ga paka nzugo zokupungwira ndi sihete, nye Karunga kugarera. Amesi one mwa pitakana yidira mekuto? 25Yilye ogu a vhuru morwasinka sendi kugwederera koukaro wendi kazuva kamwe? 26Nsene asi kumuvhura neyeeyi yoyinunu‐nunu, yinke nye omu pakerere sinka yapeke? 27Komu tara si nombya domosanzara omu adi kuru! Kapi adi rugana ndi asi di tungagure. Nye ame tani mu tantere asi, naSaromo si googu kapi nga dwara mouhompa wendi a fane po nampili mbya zimwe. 28Ano Karunga nsene a dwareka wayi wemepya, ou au kara po naina, nye mungura tava u paka mediko, ngapi nye omu na dira kumudwareka mu pitakane wayi, one vepurogona! 29Ano walye omu papara eyi nomu lya ndi yeyi nomu nwa, yi mu pakese woma. 30Yeeyi nomuhoko nadinye dovapagani yido adi papara nayinye eyi. Guhyeni ga diva asi mwa yi hepa nayinye eyi. 31Hoveni kupapara Untungi waKarunga, makura yininke eyi nayinye ngava yi mu gwederera po.

Vantungi po meguru

32“Walye o tjira ove mbungagona, yeeyi Karunga kuna hara a mu pe Untungi wendi. 33Randeseni po emona lyeni, mu pe ko vahepwe. Liruganeneni nondjato dokudira kukurupa. Pongaikeni emona lyemeguru, eli ali dili kupwa, omu a dili kuza muwidi ndi li likane kotundu. 34Ano oku wa kara ugawo weni, yiko kooko adi kara nonomutjima deni.

Rungarareni, one mu kare nepuro

35“Mangeni makwamo geni monombunda deni, ano noramba deni di hwame. 36Kareni ngwendi vantu vana kundindira hekurwawo ana kutunda kekwareko, asi nkumwe va ya mu zegurure usimbu‐simbu, nsene na wiza a ngongore kevero. 37Va kara nerago vakareli ava, a ya gwana hekurwawo awo simpe vazuni. Yosili nina kumutantera asi, age nga limanga ta va ninki va ze kosiliro, makura ta va yeta. 38Ano nsene a wiza pokatji komasiku ndi pomasasiku, nye ta ya va gwana ngoso, vakareli owo vanerago. 39Nye diveni oyo asi, nturagumbo ntene a diva asi muwidi ta wiza vili ezi, ngano ta takamesa embo lyendi, neisi va li pwayera: 40None si omu liwapaike, morwa MunwaMuntu nga wiza vili ezi mwa dira kudiva.”

41Peturusa ta u pura asi: “Hompa, esi sifanekeso nyoselike ono kusitantera ndi navenye?” 42Hompa ta mu limburura asi: “Lipi lyo nye erenga lyokulimburukwa lyonondunge, eli nga paka hekurwalyo moutakamesi wovantu vendi, a va pe nondya posiruwo sado? 43Mukareli gerago googu nga ya gwana hekurwendi age ta viyauka. 44Yosili nina kumutantera asi, age hekurwendi nga ya mu paka moukungi wemona lyendi nalinye. 45Nye mukareli ogo nsene a gazara momutjima gwendi asi: ‘Hekurwange kapi na wiza usimbu,’ makura nye a tameke kutoona vakareli wovagara nava wovakadi, makura ta tameke kulya oku ta nu a korwe, 46hekurwa gogo mukareli nga wiza mezuva eli ga dira kugazara, movili ezi ga dira kudiva, makura nga mu rangure, makura ta mu hamesere kwava va hana kulimburukwa.

47“Ano mukareli ogu ga diva eharo lyahekurwendi, nye age nokuliwapaika si, ndi asi a rugane moomu ga yi mu pangera, ogo ngava mu sepura unene. 48Nye mukareli gokudira kudiva eyi ga hara hekurwendi, nye a rugane yokumusepwisa, ogo ngava mu sepura nakauke. Ano muntu ogu va pa yoyinzi, ngava mu gwederera ko; ano ogu va huguvarera yoyinzi, nage ngava hepa ko kwendi yoyinzi unene.

Jesus kwa reta yita, kapisi mpora

49“Ame kwa wizira ni ya zugume mundiro pevhu. Ame kuna hara unene asi ngano nare gwa dumuka! 50Nye ame kundindira ekuhwo eli ngava kuhwa nge, nye ngani guva dogoro noku ngayi sika mo! 51One asi ame kwa wizira ni rete mpora pevhu? Hawe, kapisi mpora nina kureta, nani nye malinyengo. 52Yeeyi kutunda apa vatano vembo limwe ngava livyuka, vatatu tava vyuka vavali, ano vavali tava vyuka vatatu. 53Guhwe nga vyuka gomugara, muna gomugara nga vyuka guhwe. Zinya nga vyuka muna gomukadi, muna gomukadi nga vyuka zina, ano ngumweyi zomuntu nga vyuka ngumweyi zendi.”

Yidiviso yosiruwo

54Jesus kwa tanterere hena mbunga asi: “Nsene mu mona maremo taga tumbire mo moUtokero, tomu tanta asi, ‘Mvhura tazi wiza,’ nayo tayi kara po. 55Ano nsene mu mona mpepo zokoMbindakano tazi pepe, tomu tanta asi, ‘Naina upyu sa mundiro,’ nayo tayi kara po. 56Vayilipaki one, one kwa diva kufwatura yimoneka yepevhu nomompepo, omu ya mu puka‐puka nye yokufwatura siruwo esi?

Lizuvha nonkore zoge

57“Yinke nye omu dilire kupangura mo mwanyamweni eyi ya hungama? 58Ntene tomu zi nogu mwa zonena kompanguro, genderera kulizuvha nendi poopo muna kugenda monzira, neisi mpamwe nga ku twara komupanguli, ano mupanguli a ka ku gave komuporosi, ano muporosi nga ku ture modorongo. 59Yosili nina kukutantera, kapi ngo pwaga mo wa hana kufuta nawa‐nawa nayinye.”

Currently Selected:

Rukasa 12: KWN

Highlight

Copy