Rukasa 11

Erongo lyokuhamena ekanderero

1Ruveze rumwe Jesus kwa kere pevega limwe a kanderere. Apa ga mene, murongwa gwendi gumwe ta mu tantere asi: “Hompa, tu ronga ko nose kukanderera, moomu ga ronga Johanesa varongwa vendi.” 2Jesus ta va tantere asi: “Nsene tomu kanderere, omu tante asi:

‘Guhyetu,

Edina lyoge ava li pongore.

Uhompa woge au wize.

Mpango zoge ava zi sikise mo pevhu ngwendi meguru.

3Tu pa nkenye ezuva nondya edi twa hepa.

4O tu dongwenene po nonzo detu,

moomu atu dongwenene po nose wononzo detu.

Walye o tu twara momaheteko,

nye o tu popere moudona.’ ”

5Jesus makura ta tantere varongwa vendi asi: “Opo muna kara, mpamwe gumwe ta zi kembo lyamukwawo masiku, a ka mu tantere asi, ‘Hewa, kwafa nge ko nomboroto ntatu. 6Mukwetu ana tundu ure, ana gwana nge, mweli membo, nye apa na kara tumbu‐tumbu, nayimwe si nani mu pa.’ 7Mpamwe mukweni ta limburura, age monzugo asi, ‘Wa ha zogerera nge. Mupito nare tuna gu zedire, vana vange nanyamwange kuna rara. Ame nokuvhura si hena kupinduka asi ni ku pe yuma.’ 8Ngapi nye omu nayi kara? Tani mu tantere asi, nsene a dira kupinduka a ku pe nomboroto morwa age mukweni, ta pindukire a ku pe nayinye eyi ono hara, morwa kapi ono kutuda kumuhundira. 9Yiyo nye nina kumutantera asi: omu hundire ngava mu pe, omu papare ngomu gwane, omu ngongore ngava mu zegurure. 10Yeeyi asi nkenye ogu a hundire, kumupa, nogu a papara kugwana, ano ogu a ngongora kumuzegurura.

11“One oguhya vanona, kuvhura gumwe a pe munwendi ezoka, age mfi ana mu hundire. 12Ndi kuvhura kumupa nge, age nye euta ana hundire? 13Kumwe nyone wovadona mwa diva kupa vana veni yininke yoyiwa, ngaGuhyeni gemeguru yihuna nye pokugava Mpepo zoKupongoka kwava vana kumuhundira!”

Jesus ga vhura nonkondo Belisebubu

14Jesus makura ta tjida mo mpepo zondona zosipuru‐puru. Ano apa za tundire mo mpepo zondona, sipuru‐puru tasi uyunga, vantu makura tava tetuka. 15Nye vamwe tava tanta asi: “Age kutjidisa mo nompepo donondona nononkondo daBelisebubu, mukurona gonompepo donondona.” 16Ano ava vamwe ko kwa mu hetekere a va likide sidiviso seyi yeguru. 17Apa ga mwene Jesus asi yimo vana kugazara ngesi, ta va tantere asi: “Nkenye sirongo esi sa litavagana mwasene, kuhanauka po, li kare embo eli lya litavagana mwalyene, kapi ngali sika mo mouta wa kora. 18Ano Satana nsene a litavagana mwamwene, untungi wendi ngapi nye omu nau kara po? One kuna kutanta asi ame kutjidisa mo nompepo donondona kwaBelisebubu. 19Nsene asi ame nompepo donondona kuna di tjida mo nononkondo daBelisebubu, ano ava vana veni nononkondo dalye nye ava di tjida mo? Ano yipo nye ngava karera vapanguli veni. 20Ame nsene asi nompepo donondona kuditjidisa konyara zaKarunga, diveni asi Untungi waKarunga una mu wizire nye.

21“Mugara gependa nsene a kara noyikwata yendi a nomene embo lyendi, emona lyendi tali yoworoka. 22Ano nsene pa wiza ogu ga mu vhura nonkondo, nye a mu funde, makura yikwata yendi eyi ga tulire mutjima ta yi mu gusa, makura ta gaununa eyi ana hakana.

23“Ogu a dili kukara kumwe name, kwa lilimba name, ano ogu ga ha pongaike kumwe name, kuhanagura.

Etenguro lyonompepo donondona

24“Nsenesi mpepo zondona zina pwaga mo momuntu, azo kurenda‐renda mosirongo somburundu zi papare uturo. Nye apa nazi dira kuugwana, makura tazi tanta asi: ‘Tani tengura konzugo zange ezi na pwagere.’ 25Ano eyi nazi wiza ngoso, kuyagwana nzugo azo mawoko‐woko, vana zi kombo vana zi limbagura. 26Makura azo tazi zi nye zi ka rete ko nompepo nonkwawo ntano‐nambali donondona ko nye unene kuzipitakana zene. Makura tadi hwilire mo nye di ya tunge mo. Yirugana yokuhulilira yomuntu gwangesi kuyipilira kupita yomuhowo hasa nye.”

Verago lyosili

27Haga za mokuuyunga eyi, mukadi gumwe mombunga ta ziguruka kuuyunga asi: “Lya kara nerago ezimo eli lya ku simbire nomavere aga wa zamwene.” 28Nye age ta tanta asi: “Nhi, nye ava ava zuvhu nonkango daKarunga nye tava di pungura, yiwo po verago.”

Jesus tava mu pura sidiviso

29Vantu eyi va pongere, Jesus ta vareke kuuyunga asi: “Vantu vantani vadona! Awo kuhepa ko sidiviso seyi yeguru, nye awo nokusivapa si, ntudi sidiviso saJona ntani. 30Yeeyi moomu ga kere Jona sidiviso koVaninivhe naMunwaMuntu nage nga kara sidiviso kovantu vantani. 31Hompa gomukadi gokoMbindakano nga vhumbukira Mpanguro zokuhulilira kumwe novantu vantani, makura ta va pe usima. Yeeyi age kwa tundire koure unene, a ya purakene unongo waSaromo, nani nye ogu ga pita Saromo googu! 32Novantu ava va kere moNinivhe nawo ngava vhumbukira Mpanguro kumwe novantu vantani, makura tava va pe usima. Yeeyi awo kwa litezwilire pokuzuvha eudiso lyaJona, nani nye ogu ga pita Jona googu!

Uzera worutu

33“Nomuntu si ogu a hwameke ramba a ka zi tjwateke ndi a zi ture konhi zolyata, kuzitura kontunda, ntani va mona uzera ava vana hwilire mo. 34Ramba zorutu roge eho. Nsenesi meho goge ga kanguka, makura rutu roge mudima taru litarere. Ano nye meho goge nsenesi ga yipa, rutu roge mudima taru kara momundema. 35Takamesa asi uzera ou wa kara moge wa ha kara mundema! 36Ano rutu roge nsene ru kara mouzera, nye napasi runa sovagana, taru kara nye mouzera mwelike, moomu au ku minikire uzera woramba.”

Jesus ta rondora Vafalisayi novalirongi womatjangwa

37Ano Jesus haga za mokuuyunga, Mufalisayi gumwe ta mu zigida a ka lye nendi. Age makura ta zi a ka lye. 38Mufalisayi kwa tetukire pokumumona asi ta li age ga hana kuhova kulikuhwa. 39Nye Hompa ta mu limburura asi: “One Vafalisayi kukuhwa nkinda nosiyaha kooko kontunda, nye monda one kwa zura mahaka noumbudi. 40Magova one! Nani Karunga ogu ga rugana yokontunda, nani kapisi yige ga rugana hena yomonda? 41Nye yomonda yi gaveni uhwi kovahepwe, makura nayinye ngayi mu zerera.

42“Ani nane vakwetu one Vafalisayi! One kugava kwaKarunga yiumurongo yehidi lyokutovesesa noyihaperera nayinye, nye one kapi omu pakere mbili uhungami neharo lyakwaKarunga. Eyi yiyo mwa hepa kurugana, one mwa hana kusiga yikwawo.

43“Ani nane vakwetu, one Vafalisayi! One kwa hara yipundi yovanamakuto monosinagoge nomalikunda‐kundo pomarandero. 44Onesi udigu musi kweni! One kwa lifana nonontonko edi adi dili kumoneka, vantu kugenda kontunda zado, awo nkara dawo.”

45Mulirongi gumwe gomatjangwa ta tantere Jesus asi: “Murongi, nsene o uyunga ngoso, nose to tu swaura.” 46Jesus ta tanta asi: “Nane vakwetu, one valirongi womatjangwa! One kumangaika nomudigo donondigu, tomu di kambaike vantu, nye nyamweni kapi omu gumu ko konomudigo nampili nyara zimwe. 47Ani nane vakwetu, one kutunga nontonko dovaporofete, awo nye ozinyakurweni va va dipaga. 48One kukoreka yirugana yozinyakurweni, namuvenye none nawo kwa yi panda, yeeyi awo yiwo va va dipaga, one yiyo muna kutunga nontoko dawo. 49Yiyo nye wa tantera Unongo waKarunga asi, ‘Ame ngani va tumina vaporofete novapostoli, ano vamwe mo ngomu ya va dipaga tomu ya va tjida‐tjida.’ 50Ano honde zovaporofete ezi za zoza kutundililira kesito lyouzuni, ngava zi tondora kwava vana kara po: 51kutunda kohonde zaAbeli dogoro kwezi zaSakaliya ogu ga fililire pokatji kosizambero nontembeli.

52“Ani nane vakwetu, one valirongi womatjangwa! One kwa gusa nsapi zediwo. Nye one nyamweni kapi mwa za mo moUntungi waKarunga, ano ava va hara kuza mo yiyo mwa va limba!”

53-54Ano Jesus eyi ga yi va tantera, makura valirongi womatjangwa noVafalisayi tava tameke kumupura?-?pura mapuro gomanzi. Awo makura tava mu vandere asi va mu kwatese kononkango dokutunda mwendi, asi ngava ka mu hetese ko.

Currently Selected:

Rukasa 11: KWN

Highlight

Copy