Levitikus 3
3
Nonzambo dombili
1“Nsene pweli ogu ana kugava simuna sendi simwe, si kare nzambo zendi zombili, kumwe novakwawo kwaHompa, zi kare zontwedu ndi zondema za hana sipo ntani. 2Age a kambeke kuwoko kwendi komutwe gosimuna, makura a si dipagere pevero lyoNkongoronzugo zoMagwanekerero. Vana vaArona wovapristeli ava sampere honde zaso komaruha nagenye gane gosizambero, 3makura awo va gave kwaHompa nzambo zonondya zomaruha gosimuna aga: Magadi nagenye geyi yemezimo, 4nonongera nomagadi gado nomagadi nagenye gekehuli. 5Vapristeli tava swakererere nye nayinye eyi posizambero kumwe nononzambo deswakerero. Edumba eli lyonzambo zonondya kwa za Hompa komutjima.
6“Nsene nzwi ndi sikombo yiso vana kugava sonzambo zombili si kare sosikungwe ndi sosindema, nye sa hana sipo. 7Ano nsene asi nzambo zonzwi ana kugava, 8a kambeke kuwoko kwendi komutwe gwazo, makura ta zi dipagere komeho zoNkongoronzugo zoMagwanekerero. Vapristeli va sampere honde zazo komaruha nagenye gane gosizambero. 9Makura awo va gave kwaHompa nzambo zonondya zomaruha gosimuna aga: Magadi nomusira nagunye gomagadi, va gu tetere pwene pedi lyago nomagadi nagenye geyi yemezimo, 10nonongera nomagadi gado nomagadi nagenye gekehuli. 11Mupristeli a swakererere nayinye eyi posizambero, yi kare nzambo zonondya kwaHompa.
12“Ano muntu nsene nzambo zosikombo ana kugava, 13a kambeke kuwoko kwendi komutwe gwaso, makura ta si dipagere komeho zoNkongoronzugo zoMagwanekerero. Vapristeli va sampere nye honde zaso komaruha nagenye gane gosizambero. 14Makura awo va gave kwaHompa nzambo zonondya zomaruha aga: Magadi nagenye geyi yemezimo 15nonongera nomagadi gado, nomagadi nagenye gekehuli. 16Mupristeli a swakererere nayinye eyi posizambero, yi kare nzambo zonondya zokuza Hompa komutjima. Magadi nagenye gaHompa. 17NoMuisraeli si nampili gumwe gokumakera kegadi ndi kohonde. Ezi yizo ngazi kara mpangera zanarunye komaruvharo geni nagenye, nkenye tupu oku ngaga ka kara.”
© Egwanekerobibeli Lyanamibia 1987, 2003
© Bible Society of Namibia 1987, 2003