Levitikus 2
2
Nonzambo donombuto
1“Nsene pweli ogu ana kugava nzambo zonombuto kwaHompa, a hove tanko kuditwa usura wokunakuka. A tjire po magadi gononzwe, ta tura po manganganga gokututumikidisa, 2makura ta u twara kovana vaArona wovapristeli. Mupristeli ta pundu po pousura eke lyokuzura nomagadi nomanganganga gokututumikidisa, makura ta yi swakererere posizambero, ngosidiviso asi nayinye kuna yi zambere Hompa. Edumba eli lyonzambo zonondya kwa za Hompa komutjima. 3Eyi nayi hupa ko konzambo zonombuto, yi kare yovapristeli. Ayo kuna pongokerere, morwa kuna yi gusa konondya, edi vana zambere Hompa.
4“Ano nzambo, nsenesi zomboroto zokukanga mesuga, ozo kuzirugana mwa hana kuza yihaheso ntani. Azo kuvhura zi kare zonene zousura wokunakuka, vana duwu nomagadi gononzwe, ndi zi hure poyikuhuna, vana kwita magadi gononzwe.
5“Ano nzambo, nsenesi zomboroto zokukanga posipana, va zi rugane nousura wokunakuka wokuduva nomagadi gononzwe, nye nokutura mo si yihaheso. 6Zi bamagura, makura o zi tjire magadi, nsene to zi gava nzambo.
7“Nzambo, nsenesi zomboroto zokutereka mokayiga, va zi rugane nousura wokunakuka nomagadi gononzwe. 8Zi twara nye nzambo ozo kwaHompa, ove o zi gave komupristeli, makura age ta zi twara kosizambero. 9Mupristeli makura ta bamuna ko ruha rumwe, ru kare sidiviso asi nayinye kuna yi zambere Hompa. Age ta yi swakererere nye posizambero. Edumba eli lyonzambo zonondya kwa za Hompa komutjima. 10Eyi nayi hupa ko konzambo, tayi kara yovapristeli. Ayo kuna pongokerere, morwa kuna yi gusa konondya, edi vana zambere Hompa.
11“Nonzambo donombuto dokugava kwaHompa nokudirugana si noyihaheso. Monondya dokuzambera Hompa narumwe si asi o ture mo yihaheso ndi usi. 12Nzambo zorukokotwa rosipe, oru o zangura nkenye mvhura, to ru twarere Hompa, nye nokuruswakererera si posizambero. 13Tura mungwa pwankenye nzambo zonombuto, yeeyi ago sidiviso somalikwatakano pokatji koge naKarunga. 14Nsene to twara kwaHompa nzambo zorukokotwa rosipe, oru ono zangura, zamba nombuto dokukanga ndi usura wokutwa. 15Gwederera po magadi gononzwe, ove o ture po hena manganganga gokututumikidisa. 16Mupristeli ta swakerere nye ruha rumwe rousura nomagadi, yi kare sidiviso. Yimo hena manganganga nagenye gokututumikidisa, yi kare nzambo zonondya kwaHompa.
© Egwanekerobibeli Lyanamibia 1987, 2003
© Bible Society of Namibia 1987, 2003