Levitikus 4
4
Nonzambo dononzo
1 Hompa kwa pangerere Mosesa 2a tantere mbunga zaIsraeli asi: “Nsene gumwe ta zono, a teze po sipango simwe saHompa, nye kapisi mowina, ga hepa kusikisa mo nye nompangera edi.
3“Nsene mupristeli gomunene ana zono, a retere mbunga unzoni, a gave ntwedu za pira sipo. Age a zi zambere Hompa morwanzo zendi. 4Mupristeli a tware ntwedu pevero lyoNkongoronzugo zoMagwanekerero, ano kuwoko kwendi a ku kambeke komutwe gwazo, makura ta zi dipagere poopo kosipara saHompa. 5Makura mupristeli gomunene ta gusa ko honde zimwe zontwedu, a zi tware moNkongoronzugo. 6Age a tupike nyara zendi mohonde rutano‐naruvali, makura a zi nagagere komeho zekehe lyokupongoka. 7Honde zimwe a zi kwite konombinga dokomakovhu gosizambero sokututumikidira yedumba lyewa somoNkongoronzugo zoMagwanekerero. Honde ezi zina kuhupa po ta zi tjire petako lyosizambero, esi ava ruganene nonzambo deswakerero, sepevero lyoNkongoronzugo. 8Kozo ntwedu a guse ko hena magadi nagenye naga geyi yemezimo 9nonongera nomagadi gado, nomagadi nagenye gekehuli. 10Moomu tupu ava rugana magadi gokontwendu zokudipagera nzambo zombili, napa mupristeli a guse magadi aga, a ga swakererere posizambero, esi ava ruganene nonzambo deswakerero. 11A guse sipapa sazo nonyama nazinye nomutwe noyirama neyi yemezimo nofwati zayo, 12makura ta yi twara ponze zokamba, kevega eli lya kuhuka pampo, oku ava kombere enoto, makura ta ka yi swakererera kooko pomundiro.
13“Nsene asi mbunga nazinye zaIsraeli yiyo zina zono, zi teze po sipango simwe saHompa, nye kapisi mowina, 14sinene zina divikwa ozo nzo, makura mbunga zi tware ntwedugona, zi kare nzambo zononzo. Va zi tware koNkongoronzugo zoMagwanekerero. 15Vagendesi wombunga va kambeke mawoko gawo komutwe gwazo kosipara saHompa, makura va zi dipagere poopo. 16Mupristeli gomunene a guse nye honde zimwe zontwedu ozo, makura a zi tware moNkongoronzugo zoMagwanekerero. 17Age a tupike nyara zendi mohonde rutano‐naruvali, makura a zi nagagere komeho zekehe lyokupongoka. 18Honde zimwe a zi kwite konombinga dokomakovhu gosizambero sokututumikidira yedumba lyewa somoNkongoronzugo zoMagwanekerero. Honde ezi zina kuhupa po, ta zi tjire petako lyosizambero, esi ava ruganene nonzambo deswakerero sepevero lyoNkongoronzugo. 19Makura ntani ana kugusa magadi gazo nagenye, a ga swakererere posizambero. 20Ntwedu ezi nazo kuzirugana moomu a rugana ntwedu zonzambo zononzo. Monkedi zangesi mupristeli ta zamba nye nzambo zononzo dombunga, makura tava di va dongwenene po. 21Age a pwagese nye ntwedu ponze zokamba, a zi swakerere, moomu tupu a swakerere ntwedu, ezi a zambere nonzo damwene. Ezi yizo nzambo zokugusisisa po nonzo dombunga.
22“Nsene asi mupangeli ana zono, a teze po sipango simwe saHompa, nye kapisi mowina, 23sinene zina nongonokwa ozo nzo, makura age a tware nzambo zendi zekungwe lya hana sipo. 24Age a kambeke kuwoko kwendi komutwe gwalyo, makura a li dipagere korwaMuzogo‐zogo gosizambero, oku ava dipagere yimuna yononzambo deswakerero. Ezi yizo nzambo zokugusisisa po nonzo. 25Mupristeli a tupike nyara zendi mohonde zosimuna, a zi kwite konombinga domakovhu gosizambero. Honde ezi zina kuhupa po, ta zi tjire petako lyosizambero. 26Age a swakererere nye magadi galyo nagenye posizambero, moomu tupu a rugana magadi goyimuna yokudipagera nonzambo dombili. Monkedi zangesi mupristeli ta zamba nye nzambo zononzo domupangeli, makura age tava di mu dongwenene po.
27“Nsene asi nkaramuntu tupu ana zono, a teze po sipango simwe saHompa, nye kapisi mowina, 28sinene zina nongonokwa ozo nzo, makura age a tware nzambo zendi zosikombo sosikadi sa hana sipo. 29Age a kambeke kuwoko kwendi komutwe gwaso, makura a si dipagere korwaMuzogo‐zogo gosizambero, oku ava dipagere yimuna yononzambo deswakerero. 30Mupristeli a tupike nyara zendi mohonde zosimuna, makura a zi kwite konombinga dokomakovhu gosizambero. Honde, ezi zina kuhupa po, ta zi tjire petako lyosizambero. 31Age a guse ko magadi gaso nagenye, moomu tupu a gusa magadi goyimuna yokudipagera nonzambo dombili, a ga swakererere posizambero. Edumba eli kwa za Hompa komutjima. Monkedi zangesi mupristeli ta zamba nzambo zonzo zankaramuntu tupu, makura tava zi mu dongwenene po.
32“Nye nsene nkaramuntu ana kutwara nzwi zonzambo zonzo zendi, zi kare nzwi zonkadi za hana sipo ntani. 33Age a kambeke kuwoko kwendi komutwe gwazo, makura a zi dipagere korwaMuzogo‐zogo gosizambero, oku ava dipagere yimuna yononzambo deswakerero. 34Mupristeli a tupike nyara zendi mohonde zosimuna, makura a zi kwite konombinga domakovhu gokosizambero. Honde, ezi zina kuhupa po, ta zi tjire petako lyosizambero. 35Age a guse ko magadi gazo nagenye, moomu tupu ava gusa magadi gononzwi gokudipagera nonzambo dombili, a ga swakererere posizambero kumwe nononzambo donondya, edi vana gava kwaHompa. Monkedi zangesi mupristeli ta zamba nzambo zonzo zankaramuntu tupu, makura tava zi mu dongwenene po.
© Egwanekerobibeli Lyanamibia 1987, 2003
© Bible Society of Namibia 1987, 2003