Josuwa 7
7
Unzoni waAkana
1Vaisraeli kapi va limburukwire kompangera zaHompa ezi asi nokugusa si yuma yeyi nava ka hanagura. Akana yige ga gusire yuma. (Akana munwaKarumi zaSabudi mutekurwaSabudi gezimo lyaSera ga kere, ruha rwezimo lyaJuda. Hompa kwa handukilire unene Vaisraeli.)
2Josuwa kwa tumine vagara vamwe va tunde moJeliko va ze koAi, sitata sa kara koUpumezuva waBeteli pepi naBete‐Aveni. Age kwa va tanterere asi va ze va ka tare sirongo. Makura owo vagara tava zi va ka nenge Ai. 3Eyi va ka tengura, tava ya tantere Josuwa asi: “Kutupu hepero zokuza navenye. Kutuma ko tupu vagara mayovhi gavali ndi gatatu ngoso va ka rwise Ai. Neisi no tumina ko navenye asi va ka rwe; kapisi sitata sosinene aso.” 4Makura Vaisraeli wokuhura pomayovhi gatatu ngoso tava zi, nye vagara womoAi tava di rapatesa Vaisraeli va tengure. 5VaAi kwa dipagere vagara wokuhura poyiha yonomurongo ntatu navatano‐nagumwe ngoso; awo kwa tjidire po Vaisraeli perungavero lyositata, tava va rapatesa dogoro koSebalimu. Tava va dipagere porukunkumuko rondundu. Vaisraeli tagu va pwaga, tava mi.
6Josuwa ta tavagura yikoverero yendi morwaeguwo, ta gu a twe sipara pevhu komeho zoSikesa sEgwanekero saHompa. Vagendesi Vaisraeli nawo tava rara poopo nendi dogoro ngurova, awo nevhu lyawo monomutwe va likide ruhodi rwawo. 7Makura Josuwa ta tanta asi: “Hompa Karunga! Nani eyi wa tu vindakanesera Jorodana nani yinke? O ya tu gave hena koVaamoli va ya tu hanagure po? Eyi twa dilira kukara moomwina mesinya mwina lyaJorodana yinke? 8Eyi nani tanta nani diva yinke, Hompa, awo Vaisraeli vava vana pe ko nyima kononkore dawo va duke? 9Vakanani navenye ava va tunga mosirongo ngava yi zuvha. Makura ngava tu umbilikide tava tu dipaga po natuvenye! Omu ngo rugana ngo popere efumano lyoge ngapi?”
10 Hompa ta tantere Josuwa asi: “Katuka! Eyi ono rarere ngesi o twe sipara pevhu, yinke? 11Vaisraeli kava zonene! Kava tezere po malizuvho getu nawo aga na va pangera asi va ga sikise mo. Awo kava gusire yininke eyi va tokwera ezonauko. Kava yi veke, tava yi horeke, makura tava yi tura moyininke yavene. 12Yiyo nye vana kudira kusika mo mononkondo dawo. Awo kuna kupa nyima nonkore dawo va duke, morwa vene va litokwera kezonauko! Ame kapi nani kara hena neni rure, ntudi tomu hanagura yininke eyi va mu pangera asi nokuyigusa si ntani! 13Katuka! Rugana yompo eyi va hepa, o wapaike vantu va vyuke kwange. Va tantera asi va liwapaikire kuwiza kwange mungura, yeeyi ame Karunga gwaIsraeli, eyi nina kutanta yeyi asi: ‘Israeli, noyuma ono kara eyi na ku pangera asi ngo yi zonagure! Kapi nomu sika mo mononkore deni, one mwa hana kugusa mo mokatji keni yininke oyo!’ 14Ano ngurangura tomu hedere ko pamazimo geni. Ezimo eli nga gusa po Hompa, ngali hedere ko pamazimogona galyo. Ezimogona eli nga gusa po Hompa, ngali hedere ko pomapata galyo. Ano epata eli nga gusa po Hompa, ngali hedere ko pavagara valyo. 15Ogu nye ngava gwana yininke oyo, ngava mu hwika po nepata lyendi nankenye aka ga weka. Yeeyi ga rugana yihuna, age hena ga teza malizuvho aga twa lizuvha nombunga zange!”
16Josuwa kwa pindukire ngurangura zonene, ta hedesa ko Vaisraeli pamazimo gawo. Ezimo lyaJuda yilyo va gusire po. 17Ta hedesere po mazimogona gokuhamena kwaJuda, makura ezimogona lyaSera yilyo va gusire po. Ta hedesere po ezimogona lyaSera pamapata galyo, makura epata lyaSabudi yilyo va gusa po. 18Sabudi ta hedesere po epata pavagara valyo, makura Akana tava mu gusa po. Age munwaKarumi zaSabudi munwaSera gemezimo lyaJuda. 19Josuwa makura ta tantere Akana asi: “Munwange, sanseka usili oku kosipara saHompa, Karunga gwaIsraeli, o litongonone. Ntaantani tantera nge eyi wa rugana. Wa ha yi horeka nge.”
20Akana ta limburura asi: “Nhi, ame na zona kwaHompa, Karunga gwaIsraeli, eyi yiyo na rugana. 21Ame kwa mwene sikoverero soSibabironi sosiwa nosisiliveli sonokilogarama 2 nongorodo zonogarama 500. Ame kwa yi tokomenene unene, makura tani yi gusa. Nomu ka yi gwana tupu na yi vhumbika motenta zange, sisiliveli konhi zayo.”
22Josuwa ta tumu vagara vamwe va dukire kotenta, va ka yi gwana sili va yi vhumbika, sisiliveli konhi. 23Tava yi pwagesa mo motenta, tava yi twara kwaJosuwa noVaisraeli navenye, makura tava yi tura komeho zaHompa. 24Josuwa nombunga nazinye zaIsraeli tava gusa Akana nosisiliveli nosikoverero nongorodo novana vendi wovagara nava wovakadi nonongombe noyindongili nononzwi nanayinye eyi ga wekere, makura tava va twara komuramba goUdigu. 25Makura Josuwa ta tanta asi: “Yinke nye eyi wa tu reterera udigu wa hura apa? Hompa nage na ku retera udigu!” Makura vantu navenye tava dipaga Akana nomamanya; tava toona nomamanya vepata lyendi, tava va hwike noyininke yawo. 26Tava mu rundike emundambo lyenene lyomamanya, eli lina kara po nelyezuva. Yiyo, nye ava li tumbwire olyo evega nelyezuva asi Muramba goUdigu.
Hompa kapi hena ga handuka unene.
© Egwanekerobibeli Lyanamibia 1987, 2003
© Bible Society of Namibia 1987, 2003