Josuwa 6
6
Ehanauko lyaJeliko
1Marungavero gaJeliko kwa ga zedilire unene, morwa kusilika Vaisraeli. Nagumwe si ga vhulire kuhwilira ndi asi a pwage mo mositata. 2Hompa makura ta tantere Josuwa asi: “Tara, hompa gwaJeliko novakwayita vendi navenye wovaradi tani va ku pe momawoko goge. 3Ove novakwayita tomu kunduruka sitata rumwe mezuva, momazuva gatano‐nalimwe. 4Vapristeli vatano‐navavali, nkenye ogu ta simbi ruvinga ronzwi zekungwe, tava piti komeho zoSikesa sEgwanekero. Mezuva lyautano‐nauvali ove novakwayita woge tomu kunduruka sitata rutano‐naruvali, awo vapristeli kuna kufuda konombinga. 5Makura vapristeli va twarerekede kufuda. Sinene muna yi zuvhu, vantu navenye va ziguruke kudimba, makura makuma gositata taga gu. Nkenye mugara ta vyukilire poopo ana vyuka mositata.”
6Josuwa ta zigida vapristeli ta va tantere asi: “Damuneni Sikesa sEgwanekero; vatano‐navavali mu pite komeho zaso, kumwe novakwayita vana kugenda komeho zoSikesa sEgwanekero saHompa.” 7Age makura ta tantere mbunga asi: “Zendeni, mu likunduruke sitata, awo vakwayita kuna kugenda komeho zoSikesa sEgwanekero saHompa.”
8Moomu tupu ga yi pangere Josuwa, vapristeli vatano‐navavali nawo tava piti komeho zoSikesa sEgwanekero saHompa oku tava fuda konombinga. 9Vakwayita kwa pitire komeho zovapristeli ava va fudire konombinga, mbunga zovantu azo kuna kukwama Sikesa sEgwanekero. Napenye opo nombinga ado kuna kuhagara. 10Josuwa kwa tanterere mbunga asi, za ha zigira ndi asi zi linungagure, dogoro kooku na va pangera ntani. 11Age makura ta tumu vapristeli kumwe noSikesa sEgwanekero va kunduruke sitata rumwe. Masiku tava wiza mokamba va ya rare.
12Josuwa kwa pindukire ngurangura zonene, makura vapristeli tava damuna Sikesa saHompa. 13Vapristeli wokusimba nombinga domakungwe gononzwi, kwa pitire komeho, awo kuna kufuda ngorooro konombinga. Vakwayita kwa pitire komeho zawo, ano mbunga azo kuna kugenda konyima zoSikesa sEgwanekero. 14Mezuva lyauvali namo ngorooro, tava kunduruka sitata rumwe, makura tava tengura kokamba. Eyi kwa yi rugene mazuva gatano‐nalimwe.
15Mezuva lyautano‐nauvali, tupu lina kugeha kwina, tava kunduruka sitata ponkedi zoozo zomuhowo rutano‐naruvali. Moomu mezuva eli amu huru yimo va kundurukidire sitata rutano‐naruvali. 16Mokukunduruka rwautano‐naruvali, awo vapristeli vana mana kufuda konombinga, Josuwa ta tantere mbunga asi: “Zigireni! Hompa ana mu pe sitata! 17Sitata neyi ya kara mo nayinye kuna yi tokwere ezonauko lyanuunu yi kare nzambo zakwaHompa. Rahabu gelike nava vembo lyendi yiwo wokuparuka, morwa ga horekere nontumi detu. 18Nye one ko, nokuguma si kweyi nava hanagura. Nsene o gusa kaninke keyi vana tokwere ezonauko, to reta udigu nezonauko kokamba zoVaisraeli. 19Nye nkenye kaninke aka va rugana kosisiliveli nongorodo nongoporo ndi kosivera, oko kukapongwera Hompa. Oyo kuyitura memona lyaHompa.”
20Makura vapristeli tava fuda konombinga. Ano mbunga kwa yi zuvha tupu, tazi zigire unene, makura ekuma tali gu. Mbunga mudima tazi vyukilire mositata, tava si kwata. 21Awo kwa dipagere navenye ava va kere mositata, vagara novakadi novadinkantu novakurupe. Awo kwa dipagere hena nonongombe nononzwi noyindongili.
22Josuwa ta tantere vagara vavali ava va ka nengere ko asi: “Zendeni membo lyohondedi mu ka mu pwagese mo kumwe nepata lyendi, moomu mwa mu tumbwidilire.” 23Awo makura tava zi, tava ka pwagesa mo Rahabu noguhwe nozina novampanza vendi nepata lyendi nalinye. Awo kwa va gusire mo navenye nomapata gawo novapika vawo, makura tava va tura ponze zokamba zoVaisraeli. 24Sitata neyi ya kara mo nayinye tava yi hwike mundiro. Yosisiliveli nongorodo nongoporo neyi yosivera yiyo yelike va gusire va yi ture memona lyaHompa. 25Nye Josuwa kwa parwire nomwenyo doRahabu nekoro lyendi nalinye, morwa ga horekere nontumi edi ga tumine Josuwa di ka nenge Jeliko. Ruvharo rwendi nelyezuva simpe moruli moIsraeli.
26Siruwo oso Josuwa ta gava erondoro lyenene asi: “Nkenye ogu nga yi hetekera asi a tungurure sitata saJeliko, nga kara mefingiliro lyaHompa.
Ogu nga tunga etateko,
nga zumbanesa mbeli zendi zongara;
ano ogu nga tunga marungavero,
nga zumbanesa nsiraura zendi gomugara.”
27 Hompa kwa kere kumwe naJosuwa, ano efumano lyendi tali lihanene mosirongo mudima.
© Egwanekerobibeli Lyanamibia 1987, 2003
© Bible Society of Namibia 1987, 2003