Josuwa 8
8
Ezonaguro lyaAi
1 Hompa kwa tanterere Josuwa asi: “Wa ha tjira ndi asi gu ku tororoke. Gusa vakwayita navenye mu ze nawo koAi. Ame tani ku pe efundo kwahompa gwaAi, novantu vendi nositata, ano sirongo naso ngasi kara seni. 2Ai nahompa gwendi tomu mu rugana moomu mwa rugene Jeliko nahompa gwendi, nye apa ngesi yininke kugusa tupu, nonongombe tadi kara danyamweni. Sitata tomu si rwisa mokusitundilira konyima.”
3Josuwa makura ta liwapaike a ze koAi kumwe novakwayita navenye. Age kwa gusire vagara womapenda 30 000, ta va tumu masiku va ze. 4Ta va pe nompangera edi asi: “Tomu ka vanda kesinya kwina lyositata. Nye nokulinapa si naso unene, tomu kara momarwiro. 5Ame ko nava vange tatu vyukilire kositata. Nsene vana pwaga asi va tu vyuke, ose tatu duka, moomu tupu twa yi rugene muhowo. 6Ngava tu tjida dogoro tatu va twara ure nositata. Makura ngava gazare asi yiwo tuna kuduka, moomu momuhowo. 7One makura tomu vhumbauka po nye apa muna vanda‐vanda, tomu kwata sitata. Hompa Karunga gweni nga si mu pa. 8Sinene muna gusa sitata, tomu si hwike, moomu tupu ana mu pangere Hompa. Edi yido nompangera deni.” 9Makura Josuwa ta va tumu va ze komavega aga va ka vanda‐vandere, korwaUtokero waAi, pokatji kaAi naBeteli. Masiku ogo Josuwa kwa kere mokamba.
10Ngurangura zonene Josuwa ta pinduka, ta zigida vakwayita va ponge. Makura age novagendesi Vaisraeli tava va pitisire koAi. 11Vakwayita kumwe nendi kwa vyukililire kerungavero lyositata, makura tava dike kamba zawo korwaMuzogo‐zogo, ago muramba guna kara pokatji kawo naAi. 12Ta gusa vagara 5 000, ta va ninki va vande korwaUtokero wositata, pokatji kaAi naBeteli. 13Vakwayita yimo nye ngoso va va pompekerere yirwa: Kamba zonene po korwaMuzogo‐zogo gositata, ano ava vamwe po korwaUtokero. Josuwa kwa rere masiku ogo momuramba. 14Hompa gwaAi eyi ga mona vantu vaJosuwa, kwa gendererere ko usimbu. Age novantu vendi navenye tava vyuka komuramba gwaJorodana, va ka rwisire Israeli pevega lyomuhowo. Kapi ga divire asi nava mu rwisira konyima. 15Josuwa novantu vendi kwa lininkisire asi vana tewa, makura tava duka va vyuke koyiha yomburundu. 16Vagara navenye womositata kwa va pongaikire asi va va konke. Ano eyi vana kutjida Josuwa ngoso, nani kuna kulinapa nye nositata. 17Nkenye mugara gomoAi kwa konkere Vaisraeli. Sitata kwa si siga hasa zahamena, nagumwe mo si gokusipopera.
18Makura Hompa ta tantere Josuwa asi: “Lika egonga lyoge koAi; ame tani mu ku pe.” Josuwa nage ta rugana moomu va mu tanterere. 19Kwa gonona tupu kuwoko kwendi, makura vagara ava va vanderere, nare vana vhumbauka mo, tava dukire kositata, tava si kwata. Makura tava hwike usimbu‐simbu sitata. 20Vagara womoAi eyi va setuka konyima zawo, tava mono esi lina ka kwata peguru pe. Nye kapi nye va gwene ruveze rokuduka, morwa Vaisraeli ava va dukilire momburundu, awo nawo vana piruka nye va va vyuke. 21Josuwa novantu vendi apa va mwene asi vakwaawo vana gusa sitata, kuna kupya sina kupya, tava piruka va dipage vagara womoAi.
22-23Vaisraeli ava va kere mositata, tava pwaga mo va vyuke vagara womoAi. Awo kwa va kundurukidire nuunu Vaisraeli, tava va dipaga po; nagumwe si ga hendaukire ndi asi a paruke po, ntudi hompa gwaAi no. Awo kwa mu kwete, tava mu twara kwaJosuwa.
24Vaisraeli kwa dipagere nonkore nadinye momburundu omu da va tjidilire. Makura ntani vana kutengura koAi, va ka dipage ava va kere mo. 25Vantu navenye womoAi kwa va dipagere ezuva olyo vagara novakadi 12 000. 26Josuwa kwa vyukisire ngorooro egonga lyendi koAi, kapi ga li tulire dogoro noku va pwa kuvadipaga mo navenye. 27Vaisraeli tava gusa nongombe noyininke eyi va kwete mositata, moomu tupu ga tanterere Hompa Josuwa. 28Josuwa ta hwike Ai, ta si sigi monontunta danarunye nanaina ngesi eli. 29Ta tulike hompa gwaAi kositji, ta mu sigi kooko dogoro kongurova. Eyi lya toka, Josuwa ta gava mpangera asi va mu guse ko, va mu zugumine perungavero lyositata. Makura tava mu rundaike ndambo zonene zomamanya, ezi zina kara po nanaina ngesi.
Veta tava zi resa pondundu zaEbali
30Josuwa makura ta tungire sizambero Hompa Karunga gwaIsraeli poNdundu zaEbali. 31Age kwa si rugene pefaneko eli ga gavere Mosesa, muntu gwaHompa koVaisraeli, moomu va yi tanta moVeta zaMosesa asi: “Sizambero somamanya aga va dira kuhonga noyiruganeso yosivera.” Awo kwa swakererere po nonzambo dakwaHompa deswakerero, oku tava gava nonzambo dawo dombili. 32Opo ngoso awo Vaisraeli kuna kutara, makura Josuwa ta tjokwere pomamanya gosizambero Veta ezi ga tjangere Mosesa. 33Vaisraeli navenye novagendesi vawo novapitisi vawo novapanguli novanayirongo ava va kara nawo, awo kuna sikama komaruha nagenye goSikesa sEgwanekero saHompa, vana tara yipara kovapristeli woVarevhi ava va si simbire. Harufa zombunga kwa pirukilire kondundu zaGelisimu, ano ezi harufa nkwawo kondundu zaEbali. Mosesa, mukereli gwaHompa, ga yi va tanterere eyi asi yimo ngava rugana, nsene sina siki mo siruwo sawo sokutambura etungiko. 34Josuwa makura ta ziguruka kuresa Veta mudima, rambangako nomatungiko nomafingiliro, moomu tupu va yi tjanga moBuke zoVeta. 35Nompangera nadinye daMosesa, Josuwa kwa di reserere vantu mudima, novakadi novanona novanayirongo ava va kara nawo.
© Egwanekerobibeli Lyanamibia 1987, 2003
© Bible Society of Namibia 1987, 2003