Josuwa 3
3
Vaisraeli tava taguruka mukuro gwaJorodana
1Ngurangura zonene Josuwa yiyo ga liwapaikire, mwene noVaisraeli navenye, va tunde mokamba zaAkasiya. Makura tava wiza koJorodana va rare, awo va hana kuruta simpe. 2Ga pwa mazuva gatatu, vapitisili makura tava gendi kamba nazinye, 3makura tava tantere mbunga asi: “Sinene muna mono Sikesa sEgwanekero saHompa Karunga gweni, nye vapristeli woVarevhi vana si simbi, makura tomu katuka apa muna hingire, mu si kwame. 4Nye pa kare sinano sokuhura pokilometa ngoso pokatji keni naso. Nokusihedera si pepi, asi mu divilise nzira ezi nomu genda, yeeyi kapi mwa zi genda rumwe nzira ozo.”
5Josuwa ta tantere hena mbunga asi: “Lipongoreni, yeeyi mungura Hompa nga rugana yitetu mokatji keni.” 6Josuwa makura ta tantere vapristeli asi: “Damuneni Sikesa sEgwanekero, mu pite komeho zombunga.” Awo makura tava damuna Sikesa sEgwanekero, makura tava piti komeho zombunga.
7 Hompa makura ta tantere Josuwa asi: “Naina tani ku nenepeke moyitarameho yoVaisraeli navenye, va dive asi, ame noge na kara moomu na kere naMosesa. 8Tantera vapristeli ava vana simbi Sikesa sEgwanekero asi: Sinene muna siki konontere domema gaJorodana, makura tomu gwire mu sikame kooko konontere.”
9Josuwa makura ta tantere Vaisraeli asi: “Hedeni pepi oku, mu ya purakene nonkango daHompa Karunga gweni.” 10Josuwa ta tanta hena asi: “Apa yipo ngomu tunda mu dive asi, mokatji keni Karunga gomwenyo mo, hena asi age nga tjida nawa‐nawa Vakanani noVaheti noVahevhi noVaperesi noVagiregasi noVaamoli noVajebusi komeho zeni: 11Tara, Sikesa sEgwanekero saHompa gouzuni naunye tasi zi komeho zeni, si rute moJorodana. 12Horoworeni mo nye vagara murongo navavali momazimo nagenye gaIsraeli, nkenye mezimo mugara gumwe. 13Sinene tupu asi nompadi dovapristeli ava vana simbi Sikesa sEgwanekero saHompa, Hompa gouzuni naunye, nye dodo momema gaJorodana asi tjava, makura mema gaJorodana taga litepe, mema aga aga tundu korukanduko taga sikama ndjikiti ngwendi rukenka.”
14Mbunga makura tazi katuka mokamba zawo zi rute Jorodana, awo vapristeli wokusimba Sikesa sEgwanekero awo komeho zombunga. 15Ano vasimbi woSikesa sEgwanekero apa va wizire poJorodana, vapristeli ava va simbere Sikesa sEgwanekero va tupike nompadi dawo momema, (ago Jorodana kuhanza unene mazuva nagenye getezo), 16mema aga gokorukanduko makura taga sikama, taga liyere ngwendi rukenka rumwe tupu dogoro kositata Adamu, esi sa lizegama naSaretana, ano mema aga ga kunkumukilire kEfuta lyomburundu, kuninka asi Efuta lyoKufa, taga dongonoka pere‐pere. Mbunga makura tazi taguruka mukuro, zi livyuke naJeliko.
17Nye vapristeli ava va simbire Sikesa sEgwanekero saHompa, awo kuna sikama ndjikiti pevhu lyekukutu moJorodana, awo Vaisraeli navenye kuna kutaguruka pevhu lyekukutu, dogoro noku za pwire mbunga nazinye kutaguruka Jorodana.
© Egwanekerobibeli Lyanamibia 1987, 2003
© Bible Society of Namibia 1987, 2003