Josuwa 2
2
Josuwa ta tumu nondadi koJeliko
1Ano Josuwa zaNunu makura ta tumu vagara vavali wopoAkasiya, ta va tumu kahorehore va ka tare sirongo katarerera, ta tanta asi: “Ka tareni sirongo, unene saJeliko.” Awo makura tava zi, tava ka hwilira monzugo zomukadi gohondedi, edina lyendi Rahabu, yimo va rara omo. 2Ano hompa gwaJeliko kwa mu tanterere asi: “Tara, vagara wokutunda koVaisraeli masiku vana wiza mo omu, va ya tare sirongo katarerera.” 3Makura hompa gwaJeliko yipo nye ga tumine kwaRahabu asi: “Gava vantu ava kava wizire koge, va hwilire monzugo zoge, yeeyi katarerera kana va reta, va ya tare sirongo nasinye!”
4Nye mukadi makura ta gusa owo vagara vavali, a va horeke, makura ta tanta asi: “Yosili, owo vagara yiko kava wizire kwange, nye kudiva oku kava tundire, nyame tupu ogu. 5Kapa sovaganene asi ngano va zedire evero lyositata, vagara owo makura yiyo kava pwagere mo. Diva ko nye oku kava vyukire, hawe, nyame tupu nye ogu. Opo muna kara va konkeni usimbu, ngano nomu va gwana.” (6Nye age kwa va twere keguru lyonzugo, a va tjwateke moyihengutji yolina eyi ga tura keguru lyonzugo zendi.) 7Owo vagara makura tava va konko, va gende nzira zaJorodana dogoro koyisau. Tupu va pwege vakonki vawo, evero lyositata makura tava li zedire.
8Awo simpe nokurara si, Rahabu makura ta rondo keguru lyonzugo oko vana kara, 9makura ta tantere vagara asi: “Ame na yi diva asi, sirongo esi Hompa ga si mu pa, noutjirwe wokumutjira una tu gwana, ano vanasirongo kuna kumukankama unene. 10Yeeyi ose twa zuvha asi Hompa kwa pwilikire mema gEfuta lyEgeha apa mwa tundire moEgipite, neyi mwa ruganena ohompa vavali woVaamoli, oSihoni naOgo, mesinya mwina lyaJorodana, apa mwa va zonagwire nuunu. 11Tupu twa yi zuvha, nomutjima detu nare dina dombo, nagumwesi ogu ga kwete mutjima kombinga zeni, yeeyi Hompa Karunga gweni yige Karunga ogu ga kara meguru napa pevhu. 12Ganeneni nge kwaHompa asi, moomu na mu ruganene uwa, name ngomu ruganene nge uwa nekoro lyotate. Nye peni nge sidiviso esi nani huguvara, 13ngomu parure monomfa mwenyo gotate nogu gonane nedi dovakuru vange novambya vange nedi dava va va hama navenye, nomwenyo detu ngomu di parure monomfa.”
14Owo vagara makura tava mu tantere asi: “Nomwenyo detu ngadi fe mevega lyedi deni. Nsene mu dira kuyitwara nzaya eyi yininke yetu, ntene nga tu pa Hompa sirongo, hawe, ngano ngatu mu horwera uwa noulimburukwi.”
15Rahabu makura ta va pitisire pekende, a va hegumwise nongodi, yeeyi nzugo zendi kwa zi tungilira mekuma lyositata, yiyo nye za kerera kekuma. 16Age makura ta va tantere asi: “Opo muna kara, vyukeni konondundu, vakonki veni va dire kumugwana. Ano ka vandeni mazuva gatatu kooko, dogoro noku ngava tengura vakonki veni; makura ntani nye ngomu twikira nzira zeni.”
17Owo vagara makura tava mu tantere asi: “Mugano ogu ono tu ganesa, ngano ngagu hagera paapa. 18Tara, nsene ngatu wiza mosirongo esi, rugodi rorugeha ngo ru mange pekende eli ono tu hegumwisire, ano oguhwo nonyoko novampanza woge nembo lyoguhwo nalinye li ponge monzugo zoge. 19Nkenye tupu ogu ana kupita pevero lyonzugo zoge, a ze ponze, a fe, nzo zetu sa. Ano nkenye ogu nga kara poge monzugo, ntene pa kara ogu ana kumuguma kuwoko, makura ta fu, nzo zetu. 20Nye nsene tupu ngo twara nzaya eyi yininke yetu nogu mugano ono tu ganesa, ngano kapi hena ngatu kara nonzo zago.”
21Age makura ta tanta asi: “Moomu muna kutanta, nawa.” Age makura ta va sigi va ze, makura awo tava ka za. Ano age oru rugodi rorugeha ta ru manga pekende.
22Awo makura tava zi, tava ka sika monondundu, makura tava kara mo mazuva gatatu, dogoro noku va tengura vakonki vawo, yeeyi vakonki awo kwa va paparere nzira mudima, nye kapi va va gwene. 23Owo vagara vavali tava humburuka ko hena konondundu, va rute mukuro, makura tava ka sika kwaJosuwa zaNunu, makura tava mu sansekere nayinye eyi ya ka va gwene. 24Makura tava tantere Josuwa asi: “Hawe, yosili sirongo nasinye Hompa ga si tu pa momawoko getu, yeeyi womosirongo navenye kuna kutukankama unene.”
© Egwanekerobibeli Lyanamibia 1987, 2003
© Bible Society of Namibia 1987, 2003