Josuwa 4
4
Mamanya gediworokeso moJorodana nomoGiligali
1Ano apa za mene mbunga nazinye kutaguruka Jorodana, Hompa makura ta tantere Josuwa asi: 2“Horoworeni mo mombunga vagara murongo navavali, mwankenye ezimo mugara gumwe, 3mu va tantere asi: ‘Guseni mamanya murongo nagavali opo pokatji kaJorodana, apa kava sikama vapristeli, mu ga piture mu ze nago, makura mu ka ga ture pevega eli nomu ka rara masiku ganaina!’ ”
4Josuwa makura ta zigida owo vagara murongo navavali, ava ga horowere moVaisraeli, nkenye mezimo mugara gumwe. 5Josuwa makura ta va tantere asi: “Piteni komeho zoSikesa sEgwanekero saHompa Karunga gweni, dogoro mwene moJorodana, nkenye ogu a ka damune mo emanya a li likambeke posipepe, ga hure posivaro soVaisraeli, 6nkumwe nga ga kare sidiviso mokatji keni. Nsene ngava yi mu pura vana veni komeho asi: ‘Gene aga mamanya, yinke aga tanta ko kweni?’ 7Makura tomu va tantere asi: ‘Yeeyi mema gaJorodana ga litepanene komeho zoSikesa sEgwanekero saHompa apa sa tagurukire Jorodana — mema gaJorodana yiyo ga litepanene, anonye aga mamanya sidiworokeso sayo sanarunye‐narunye koVaisraeli.’ ”
8Vaisraeli nawo tava rugana moomu ga va tanterere Josuwa, tava damuna mamanya murongo nagavali pokatji kaJorodana gokuhura posivaro somazimo gaIsraeli, moomu ga tanterere Hompa Josuwa. Kwa ga damwine, makura tava taguruka va ze nago pevega eli va ka rere, makura tava ga tura. 9Josuwa nage kwa dikire mamanya murongo nagavali mokatji kaJorodana, pevega eli va sikeme vapristeli ava va simbire Sikesa sEgwanekero (ogo mamanya nelyezuva pogeli). 10Ano vapristeli ava va simbire sikesa saHompa, tava sikama pokatji kaJorodana dogoro noku ya pwa nayinye eyi ga tanterere Hompa Josuwa asi a yi tantere mbunga, moomu ya kara po nayinye eyi ga tanterere Mosesa Josuwa.
Ano mbunga kwa gendererere kutaguruka mukuro.
11Ano mbunga nazinye apa za mene kutaguruka mukuro, makura sikesa saHompa novapristeli nawo tava taguruka, va pite komeho zombunga. 12OnkwaRubena nava onkwaGada noharufa zezimo lyaManase, awo noyikwata yawo va tagurukire va gende komeho zoVaisraeli, moomu ga va tanterere Mosesa. 13Ava va kere noyikwata yokurwisa kwa hulire poyiha yomayovhi nomurongo ne, awo kwa tagurukire va gende komeho zoSikesa sEgwanekero saHompa, awo kuna tara komazana gopopepi naJeliko. 14Ezuva olyo Hompa kwa zerwire Josuwa moyitarameho yaIsraeli mudima. Yipo nye ngava mu fumadeke ukaro wendi mudima moomu ngava fumadeke Mosesa.
15 Hompa makura ta tantere Josuwa asi: 16“Tantera vapristeli ava vana simbi sikesa soVeta asi va kanduke mo moJorodana.” 17Josuwa makura ta tantere vapristeli asi: “Zaukeni mo moJorodana.” 18Ano vapristeli wokusimba Sikesa sEgwanekero saHompa, apa va kandukire mo moJorodana, tupu da ya lyete nompadi dovapristeli kevhu lyekukutu, makura mema gaJorodana taga tengwire pevega lyago, mukuro yigo pa nokonontere ngwendi mwanare.
19Mbunga kwa zaukire mo moJorodana mezuva lyomurongo lyokwedi komuhowo. Makura tava dike kamba zawo poGiligali, korwaUpumezuva womururani gwaJeliko. 20Mamanya murongo nagavali aga va damwine moJorodana, Josuwa makura ta ga dike poGiligali. 21Age makura ta tantere Vaisraeli asi: “Nsene vana veni ngava pura komeho oguhyawo asi: ‘Gene aga mamanya yinke aga tanta?’ 22ngomu divise vana veni asi: ‘Israeli kwa gendere pevhu lyekukutu moJorodana omu.’ 23Yeeyi asi Hompa Karunga gweni kwa pwilikire mema gaJorodana komeho zeni, dogoro noku mwa tagurukire, moomu ga ruganene Hompa Karunga gweni, a tu pwilikire Efuta lyEgeha komeho zetu dogoro noku twa tagurukire, 24asi di dive nombunga nadinye dokontunda zevhu asi, kuwoko kwaHompa nonkondo, none ngomu tjire nkenye apa Hompa Karunga gweni.”
© Egwanekerobibeli Lyanamibia 1987, 2003
© Bible Society of Namibia 1987, 2003