Josuwa 1
1
Karunga ta tantere Josuwa a ka funde Kanani
1Konyima zonomfa daMosesa, mukareli gwaHompa, makura Hompa ta tantere Josuwa, munwaNunu, mukwafi gwaMosesa 2asi: “Muntu gwange Mosesa ana fu. Ove liwapaika, mu taguruke mukuro ogu gwaJorodana nezi mbunga nazinye, mu ze mosirongo esi na va pa Vaisraeli. 3Nkenye pevega ngazi ka lyata mpadi zeni, ngani li mu pa, moomu na uyungire naMosesa. 4Nomururani deni ngadi ka twa kutunda komburundu korwaMbindakano zoNondundu daLibanoni nokorwaMuzogo‐zogo dogoro koMukuro gomunene gwaEufurata korwaUtokero, tagu piti mosirongo soVaheti gu vyuke kEfuta lyEgeha korwaUtokero. 5Kutupu ogu nga ku pita mononkondo ukaro woge naunye. Moomu tupu na kere naMosesa, yimo ngani kara noge. Ame kapi ngani ku tarerera ndi asi ni ku sige. 6Kora, o kwate mutjima, yeeyi nyove ngo gaunwina ezi mbunga upingwa wosirongo esi na tumbwidira ozinyakurwawo nomugano asi yiwo ngani si pa. 7Kora unene o kwate mutjima oku to sikisa mo nawa‐nawa Veta ezi ga ku pa Mosesa, muntu gwange. Nokuzizapukira si korulyo ndi korumoho, asi ngo kare nerago nkenye oku ngo vyuka. 8Nonkango edi dobuke ezi zoVeta, walye adi tundu mo mokana koge, nye o di tede mutenya nomasiku, asi o sikise mo nawa‐nawa nayinye eyi va tjangera mo. Morwa ntani ngayi ku wapera nononzira doge, ove ngo kare nerago. 9Amesi na ku tantere asi: Kora, o kwate mutjima. Nokukupwaga si ndi asi o tukuke, yeeyi Hompa Karunga goge pweli poge nkenye oku ngo za.”
Josuwa ta gava nompangera kombunga
10Josuwa makura ta tantere vapitisi wombunga asi: 11“Zendeni mokamba mu tantere mbunga asi: ‘Liwapaikireni nkuta, yeeyi konyima zomazuva gatatu ngomu taguruka mukuro gwaJorodana, mu ka guse sirongo esi ana kumupa Hompa, asi si kare seni.’ ”
12Josuwa yiyo ga tanterere Varubena noVagada noharufa zezimo lyaManase asi: 13“Gazareni nkango zaMosesa, muntu gwaHompa, ezi ga mu tanterere asi, Hompa Karunga gweni nga mu pa sirongo sokorwaupumezuva womukuro gwaJorodana si kare seni. 14Vakadi veni, novana veni, noyimuna yeni yi kare mosirongo esi ga mu pa Mosesa soupumezuva waJorodana. Nye one ko nyamweni, nontoni namuvenye noyikwata yeni, tomu piti komeho zovakweneni, mu va kwafe. 15Hompa a pe vakweneni ngwendi nyone epwizumuko, nawo ngava guse sirongo esi nga va pa Hompa Karunga gweni. One ntani nye muna kutengura kosirongo seturo lyeni, esi ga mu pa Mosesa, muntu gwaHompa, si kare seni, soUpumezuva waJorodana.”
16Awo makura tava limburura Josuwa asi: “Nkenye eyi ono kututantera tatu yi rugana, ose hena nkenye oku ono kututuma, tatu zi. 17Moomu ngatu zuvhu Mosesa, nove ngorooro natu ku zuvha. Hompa Karunga goge ngano a kare tupu poge moomu ga kere naMosesa. 18Nkenye ogu ana kunyoka nompangera doge, a dire kuzuvha nonkango edi ono kumupangera, va mu dipage. Kora tupu, o kwate mutjima!”
© Egwanekerobibeli Lyanamibia 1987, 2003
© Bible Society of Namibia 1987, 2003