Johanesa 3

Jesus naNikodemusa

1Mwa kere mugara gumwe mokatji koVafalisayi, edina lyendi Nikodemusa, esimbi limwe lyoVajuda. 2Age kwa zire kwaJesus masiku, makura ta ka mu tantera asi: “Murongi, twa diva asi ove o murongi ga tuma Karunga, yeeyi nagumwe si a vhuru kurugana yitetu ngeyi o rugana, ntudi Karunga a mu kwafe no.” 3Jesus ta mu limburura asi: “Yosili nina kukutantera, muntu nokuvhura si kumona Untungi waKarunga, ntudi kuna mu hampurukurura ntani.” 4Nikodemusa ta mu pura asi: “Ngapi omu nava mu hampurukurura muntu, age mukurona? A tengwire hena mezimo lyozina, va ka mu hampurukurure ndi?” 5Jesus ta limburura asi: “Yosili na kukutantera, muntu nokuvhura si kuhwilira moUntungi waKarunga, ntudi va mu hampurukurure momema nomoMpepo ntani. 6Eyi aru reta rutu yorutu, ano eyi azi reta Mpepo yompepo. 7Ya ha ku tetura eyi na ku tantere asi: Namuvenye ava mu hampurukurure ntani. 8Mpepo kupepera oku zina hara. Ove to zi zuvhu, nye nokudiva si oku zina tundu noku zina kuza. Nava navenye va hampurukira moMpepo yimo nye.” 9Nikodemusa ta pura asi: “Yene eyi kuvhura kuhoroka ngapi?” 10Jesus ta limburura asi: “Ove murongi gomukurona gwaIsraeli, nye simpe wa diva yininke eyi? 11Yosili nina kukutantera asi, ose kuuyunga eyi twa diva, ose hena kugava undipo weyi twa mona, nye undipo wetu kapi omu u tambura. 12Ano nsene ni mu sansekera yininke yepevhu, one nokupura si, ngapi nye omu nomu pura, nsene ni mu sansekera yeguru? 13Nagumwe si ga ronda meguru, ntudi MunwaMuntu no, ogu ga tunda meguru.

14“Nye moomu ga tulikire Mosesa ezoka momburundu, naMunwaMuntu nage yimo ngava mu tulika, 15asi nkenye ogu a mu pura, a gwane mwenyo gwanarunye. 16Yeeyi Karunga kwa here uzuni unene‐nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye. 17Yeeyi Karunga kapi ga tumina Munwendi asi, a ya u pangure, nye asi uzuni u parukire mwendi.

18“Ogu ga mu pura nokumupangura si, nye ogu ga dira kumupura nare ga pwa kupangura, morwa kapi ga pura Munwa gelike a huru gwaKarunga. 19Nye yokureta mpanguro yeyi yokuninka asi, uzera apa wa wiza mouzuni, pomundema nouzera vantu kwa here po mundema. 20Yeeyi nkenye ogu a rugana udona, kwa nyenga uzera, age kapi a wiza kouzera, yirugana yendi neisi yi horoka. 21Nye ogu a rugana yosili, age kuwiza kouzera, uzera u horore asi, yirugana yendi kwa yi ruganena mwaKarunga.”

Jesus naJohanesa

22Kutunda poyo Jesus kwa zire kumwe novarongwa vendi mosirongo saJudeya. Yiko nye ga kere nawo, age ta kuhu. 23Johanesa nage nga kuhu moHainoni, pepi naSalimi, yeeyi yiko kwa kere mema gomanzi. Vantu yiyo ngava zaaza kwendi, va ka va kuhwe. 24Eyi kwa horokere, Johanesa age simpe nokumutura si modorongo.

25Kutunda opo varongwa vaJohanesa makura tava lipatana noMujuda gumwe yokuhamena ekuho. 26Makura tava wiza kwaJohanesa, tava mu tantere asi: “Murongi, mugara ogu wa kere nendi mesinya mwina lyaJorodana, ogu wa sanseka, ko tara si, ta kuhu sa, ano navenye yiyo vana kuza kwendi.” 27Johanesa ta limburura asi: “Muntu nokuvhura si kuligusira yuma, ntudi meguru vana yi mu pe ntani. 28One nyone nombangi dange deyi na tente asi, kapisi nyame Kristusa, nye ame kwa hova tupu kutuma nge komeho zendi. 29Yige muvandekeli ogu ga hamena mbandeki. Ano ogu ga likwata ukwawo nombandeki, nye a sikame pwendi, a mu purakene, age kuhafera unene ezwi lyomuvandekeli. Yiyo nye lina sikilire mo nye ehafo lyange. 30Age yige na nenepa po, ame ni nunupe.

Ogu ga tunda meguru

31“Ogu ga tunda meguru, kwa pita navenye. Ogu ga tunda pevhu gepevhu tupu, age kuuyunga yininke yepevhu. Ogu ga tunda meguru, kwa pita navenye. 32Eyi ga mona neyi ga zuvha, yiyo a gava undipo wayo, nye nagumwe si a tambura undipo wendi. 33Ogu a tambura undipo wendi, kukoreka asi, Karunga Munasili. 34Ogu ga tuma Karunga, age kuuyunga nonkango daKarunga, yeeyi Karunga kugava Mpepo, ta zi gaverere. 35Guhwe kwa hara Munwendi, yiyo ga gava yininke nayinye mepangero lyendi. 36Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.”

Currently Selected:

Johanesa 3: KWN

Highlight

Compare

Copy