Johanesa 2

Sipito somoKana

1Mezuva lyautatu kutunda poyo mwa kere sipito sononkwara moKana zomoGalireya. ZinyaJesus nage yipo ga kere. 2Jesus novarongwa vendi kwa va zigidire nawo kosipito. 3Vhinyu eyi za pwa, ozina tava tantere Jesus asi: “Awo kutupu vhinyu.” 4Jesus ta va tantere asi: “Mukadi, kutumangedera nge yisinke? Siruwo sange simpe kapi sina siki mo.” 5Ozina tava tantere vagaveli asi: “Nkenye eyi na mu tantera, nkumwe mu yi rugane.”

6Pwa kere tuvaza ntazimwe tomamanya kompo zomalikuhuro goVajuda. Nkenye kavaza heteko zako pomahemere gavali nagatatu ngoso. 7Jesus makura ta tantere vagaveli asi: “Zwideni tuvaza nomema.” Awo tava tu zwidilire. 8Jesus makura ta va tantere asi: “Vheteni mo, mu twarere mugendesi gosipito.” Awo tava ga twara. 9Ano mugendesi eyi ga makera mema aga gana lisitunuka vhinyu, age ga hana kudiva oku zina tundu (nye vagaveli ava va vhetagwire mema va yi divire), makura ta zigida mukwali, 10ta mu tantere asi: “Nkenye muntu kuhova tanko kupinda vhinyu zongwa, ano ntene vana gwana mo, ntani nye o va pe zondona. Ano ove yiyo ono horeke vhinyu zongwa nelyezuva!”

11Esi yiso sitetu sendi sokuhova. Jesus kwa si ruganenene moKana zomoGalireya, yiyo ga likidisire ko efumano lyendi. Varongwa vendi makura tava mu pura.

12Kutunda opo tava zi koKaperenaumu, mwene Jesus nozina novamumbya vendi wovagara novarongwa vendi, nye kapi va ka pukwire ko.

Jesus ta tjida varandesi montembeli

13Apa za kere Paska zoVajuda pepi, yipo ga kandukire Jesus koJerusarema. 14Age makura ta gwana montembeli varandesi wonongombe nononzwi nononkutji, novasinti woyimaliva, awo vana hingire poyitafura yawo. 15Age ta poho ngora zonongodi, makura ta va tjida mo montembeli noyimuna nayinye, nononzwi nonongombe, yimaliva yovasinti ta yi wayagwire pevhu, makura ta gandanga yitafura yawo. 16Makura ta tantere varandesi wononkutji asi: “Tuteni mo yininke eyi. Nzugo zaTate mwa ha zi paka asi zi kare sirandesero.” 17Varongwa vendi makura tava diworoka asi, momatjangwa kwa tjanga mo asi, “Kupakera mupampi nzugo zoge kwa kora nge.”

18Vajuda tava mu pura asi: “Sidiviso musinke no tu likidisa nonkondo edi ono kuruganesa yininke eyi?” 19Jesus ta va limburura asi: “Zungurureni ntembeli ezi, nye ame ngani zi tunga hena momazuva gatatu.” 20Vajuda makura tava tanta asi: “Ntembeli ezi kwa zi tunga ure wonomumvho nomurongo ne nantano?-?zimwe, ove nye yiyo ono kutanta asi ngo zi tunga mazuva gatatu?”

21Nye age kwa uyungire ntembeli zorutu rwendi. 22Ano apa ga ka vhumbukire koufe, varongwa vendi tava diworoka asi, nda yimo ngorooro ga va tanterere. Awo makura tava pura matjangwa nononkango edi ga va tanterere Jesus.

Jesus kwa diva vantu navenye

23Jesus apa ga kere moJerusarema posiruwo sosipito soPaska, sinzi sawo kwa mu pulire, morwa va mwene yitetu eyi ga rugene. 24Nye Jesus kapi ga va huguvarere, yeeyi ga divire navenye. 25Age kapi ga hepere asi muntu a mu divise eyi ya kara momuntu, morwa ga divire eyi ya kara momutjima gomuntu.

Currently Selected:

Johanesa 2: KWN

Highlight

Compare

Copy